Revistanchikta leeqkunam tapukunku

¿Chinkanqachu kay Allpa pacha?

▪ Wakin runakunam piensarqaku kay pasaq 21 octubre 2011 watapi Allpa pacha chinkachisqa kananmanta. Ichaqa manam chinkarqachu. Radiopi rimamuq Harold Camping runapa nisqanmi yanqa rikurirurqa. Paymi nirqa 21 mayo 2011 watapi puchukay punchaw chayamunanmanta. Chay killapim manchakuypaq terremoto kay allpa pachata kuyuchinan karqa, 5 killamantañataq 21 octubre killapi Allpa pacha chinkanan karqa.

Allpanchikqa manamá chinkachisqachu kanqa, Unanchaqninmi chayna kananta mana saqenqachu. Bibliam nin: “Qanmi kay pachata hinapi kananpaq takyachirqanki”, nispa (Salmo 119:90).

Chayna kaptinpas, Bibliata wakin leeqkunaqa chaytam mana allinpaq hapinku, hinaspam piensanku Allpa pachaqa ninawan kañasqa kananmanta. Chaypaqqa 2 Pedro 3:7, 10 nisqantam servichikunku, chaypim nin: “Kunan kaq cielokunatawan kay pachataqa Diospa rimarisqanmi waqaychachkan ninapaq, chay ninapim juicio punchawpi huchasapa runakunapas rupanqa [. . .]. Señorqa hamunqa tutallan suwa hamuchkaq hinam, chay punchawmi cielokuna tukunqa hatun qapariywan, cielopi kaqkunapas kañasqam kanqa hinaptinmi kay pachapas tukuy imantin chinkanqa”, nispa. ¿Chaywanqa kay Allpa pacha chinkachisqa kananmantachu nichkarqa apostol Pedroqa?

Manamá. Kay versiculopa nisqankunaqa tupananmi apostol Pedropa chay cartapi llapan qellqasqanwan, chaynataq Bibliapi wakin librokunawanpas. Sichu chay versiculokunapa nisqanta mana allinta entiendespaqa, piensachwanpaschá runakuna mana allin rurasqankuraykulla cielokuna otaq universonchikpi kaq mana yupay atina lucerokunapas chaynataq tukuy imakunapas ninawan kañasqa kananmanta. Kaypi piensay, ¿yaqachu enteron kaspantin sarata wikaparuwaq partellan utuskurusqa kasqanraykulla? Manachá. Chaynallataqmi Jehová Diospas, manapunim unanchasqan Allpa pachataqa chinkachinmanchu mana allinkuna kasqanraykullaqa.

Chaymantapas, “kay Allpa pacham chinkachisqa kanqa” nisqankuqa manamá tupanchu Jesuspa kayna nisqanwanqa: “Mayna kusisqam llampu sonqoyoqkunaqa, paykunaqariki herenciapaqmi kay pachata chaskinqa” (Mateo 5:5; Salmo 37:29). ¿Yaqachu allin taytaqa familianpaq sumaq wasita ruraruspan kañarunman? (Salmo 115:16.) ¡Manamá pipas chaytaqa ruranmanchu! Jehová Diosqa manam tukuy ima Unanchaqllachu, aswanqa ancha kuyapayakuq Taytam (Salmo 103:13; 1 Juan 4:8).

2 Pedro 3:7, 10 nisqanpiqa apostol Pedro kay pacha nispanqa rimachkarqa mana allin runakunamantam. Chaypim Pedroqa juicio punchawta Noeypa tiemponpi sinchi parawan tupachirqa (2 Pedro 3:5, 6). Chay kutipiqa mana allin ruraqkunallam chinkarqaku. Ichaqa, kay Allpa pacha chaynataq Noeywan familiankunaqa manam chinkachisqachu karqaku. Chaynallataqmi Pedroqa chay versiculokunapi cielokuna nispanqa rimachkarqa kay pachapi gobiernokunamanta. Hinaptinqa, mana allin ruraqkunawan mana allin gobiernokunaqa chinkachisqam kanqaku, chaykunapa rantinpiñataqmi hanaq pachapi Diospa Gobiernonña kanqa (Daniel 2:44).

Hinaptinqa ¿chinkanqachu kay Allpa pachanchikqa? Manapunim. Chinkanqaqa Allpa pachawan tupachisqa mana allin runakunam. Allpa pachanchik hinaspa Diosta kasukuq runakunaqa hinallam wiñaypaq takyanqa (Proverbios 2:21, 22).