‘Diospa Gobiernonmantam allin noticia willakusqa kanqa’

‘Diospa Gobiernonmantam kay allin noticia willakusqa kanqa enterollan kay pachapi chaynapi llapallan nacionpi runakuna yachananpaq, chayñam kay tiempoqa tukunqa.’ (MATEO 24:14)

¿Imatam Jesusqa chaywan niyta munarqa? Bibliata qellqaq Lucaspa nisqanman hinam Jesusqa ‘llaqtakunapi chaynataq llaqtachakunapipas Diospa munaychakuyninmanta willakurqa’ (Lucas 8:1). Kikin Jesusmi nirqa: “Diospa munaychakusqanmanta allin noticiataqa wakin llaqtakunapipas willakunaymi”, nispan (Lucas 4:43). Qallariypiqa qatiqninkunatam kamachirqa chay noticiamanta hichpa kaq llaqtakunapi chaynataq llaqtachakunapi willakunankupaq, nirqataqmi ‘ñoqamantam willakunkichik [. . .] kay pachapa cantonkama’, nispan (Hechos 1:8; Lucas 10:1).

Ñawpa cristianokunapa ejemplon. Jesuspa qatiqninkunaqa kamachisqantam chaylla rurarqaku. Hechos 5:42 nin: “Mana samaykuspankum sapa punchaw templopi hinaspa wasikunapi yachachiqku hinaspa Jesucristomanta willakuqku”, nispa. Llapankum chayta rurarqaku manam akllasqa kaqkunallachu. Ñawpa tiempomanta willakuq August Neander sutiyoq runam cristianokunata cheqniq Celso sutiyoq runapa burlakuspa rimasqanmanta nirqa: ‘Millwa tisaqkuna, zapato allichaqkuna, maraypi kutaqkuna chaynataq qalaypaq mana educacionniyoq runakunapas tukuy sonqonkuwanmi predicanku’, nisqanmanta. Jean Bernardi sutiyoq runapas ñawpa cristianokunamantam huk qellqanpi nirqa: ‘Predicaqmi lloqsiqku tukuy hinastinman chaynataq lliw runaman. Ñankunapi, llaqtakunapi, parquekunapi chaynataq wasin-wasinpas. Predicarqakum allin tiempopipas otaq mana allin tiempopipas’, nispa. (Les Premiers Siècles de L’Église.) Chay runapa nisqanman hinam ‘kay pachapa cantonkama’ predicarqaku.

 ¿Pikunataq kunanpas chaynata ruranku? David Watson sutiyoq sacerdotepa nisqanman hinam ‘kay tiempopi runakunaqa hukmanyasqa tarikunku religionpi kaqkuna mana predicaptinku chaynataq mana yachachiptinku’. Perú nacionmanta José Luis Pérez Guadalupe sutiyoq sacerdotem ¿Por qué se van los católicos? nisqa libronpi nirqa: ‘Jehová Diospa testigonkunallam qayllasta wasin-wasin predicanku wakin religionkunamantaqa’, nispa.

Jonathan Turley sutiyoq runapas qellqasqanpim nirqa: ‘Yaqa lliw runakunam yachanku imatapas rurachkaptinku Jehová Diospa testigonkunalla predicanankupaq punkunku takasqankumanta. Wasin-wasin predicayninkuqa manam creesqankumanta willakunallankupaqchu aswanqa iñiyniyoq kasqankutam qawachinku’, nispa. (Cato Supreme Court Review, 2001-2002.)

[9 kaq paginapi recuadro]

¿Musyarunkiñachu pikunataq cheqap cristiano kasqanta?

Kaykama leemusqanchikman hinam Biblia yachachiwanchik imakuna rurasqankuwan cheqap cristianokuna reqsichikusqankuta. ¿Yachankiñachu pikuna kasqanmanta? Kanmi cristianowan sutichasqa achka-achka religionkuna. Ichaqa reparanaykim Jesuspa kayna nisqanpi: ‘Manam: “¡Señorlláy, Señorlláy!” nispa llapallan niwaqniykunachu Diospa munaychakusqanmanqa yaykunqa aswanqa Taytaypa munasqan ruraqllam’, nispa (Mateo 7:21). Diospa Gobiernonpi wiñaypaq bendicionninkunata chaskinapaqqa paypa munaynin ruraqkunata otaq cheqap cristianokunatam maskana. ¿Munawaqchu Diospa Gobiernonmanta astawan yachayta hinaspa ima bendicionkuna kanantapas? (Lucas 4:43.) Chaynaqa Jehová Diospa testigonwan rimanaykipaq kallpanchaykiku.