Diospa Palabranmanta yachay

¿Ninchu Biblia hamuq tiempomanta?

Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuykunamanta yachanaykipaq yanapasunkiman.

1. ¿Cheqapchu kanman hamuq tiempomanta Bibliapa nisqankuna?

Tukuy atiyniyoq Diosllam hamuq tiempomantaqa allinta yachanman (Amos 3:7). Runapa unanchasqa kasqan tiempomantam Payqa nirqaña Mesias otaq Cristo hamunanmanta. Nirqataqmi Abrahampa miraynin kananmanta chaynataq kamachikuq kaspan lliw onqoykunata chinkachispan kasukuq runakunata wiñay kawsayniyoq kanankupaq yanapananmantapas (Genesis 22:18; Isaias 53:4, 5). Chaymantañataqmi nirqa Belen llaqtapi nacenanmanta. (Leey Miqueas 5:2.)

Nacesqanmanta qanchis pachak wata ñawpaqtaraqmi Bibliaqa nirqaña doncella sipasmanta Jesus otaq Mesias nacenanta, cheqnisqa kananmanta, runakunapa huchanrayku vidanta qonanmanta hinaspa apukunapa sepulturanpi pampasqa kananmantapas (Isaias 7:14; 53:3, 9, 12). Chaynataqmi, pichqa pachak wata ñawpaqtaraq Bibliaqa nirqaña asnopi sillada Jerusalen llaqtaman yaykunanmanta chaynataq kimsa chunka qollqepaq traicionasqa kananmantapas. ¡Tukuymi cumplikurqa! (Leey Zacarias 9:9; 11:12.)

2. ¿Ninchu haykapi imapas pasakunanta?

Pichqa pachak wata ñawpaqtaraqmi Biblia nirqaña ima watapi Mesias rikurinanmanta. Chaypaq hayka watakuna pasasqantam Bibliaqa rikchanachirqa semanakunawan, sapa semanaqa 7 wata ninanmi karqa. Bibliam nin 7 hinaspa 62 semanakuna pasananmanta. Llapanpiqa 69 semanakunam otaq 483 watakunam. ¿Haykapimantam yupasqa karqa? Bibliapa nisqanman hinaqa, Diosta serviq Nehemias Jerusalen llaqtata kaqllamanta hatarichisqan tiempomantam. Persia nacionpi tukuy imakuna pasasqanmanta willakuymi nin cristianokunapa tiemponmanta 455 wata ñawpaqtaraq qallarisqanta (Nehemias 2:1-5). Jesusñataqmi bautizakurqa 483 wata pasaruptin, chayqa karqa cristianokunapa tiempon 29 watapim. ¡Bibliapa nisqanmi cumplikurqa! (Leey Daniel 9:25.)

  3. ¿Cumplikuchkanchu Bibliapa willakusqankuna kunan tiemponchikpi?

Jesusmi rimarqa kunan tiemponchikpi admirakuypaq tukuy imakuna pasananmanta. Willakuyninpim Diospa Gobiernonmanta rimarqa, chay Gobiernomanta allin noticiakunam Unanchaqninkuta kuyaq runakunata hawkayachinman. Chay Gobiernom kay pachapi mana allinkunata chinkachinqa. (Leey Mateo 24:14, 21, 22.)

Bibliapi tukuy ima pasakunanmanta willakuykunam sumaqtapuni qawachin manaraq tukupay punchaw chayamuchkaptin imakuna pasakunanmanta. Qawachiwanchikmi, allin kawsakuyta tarinankumantaqa runakuna kay pachata purmachinankumanta. Guerrakuna kasqanraykum ñakariykuna, muchuykuna, terremotokuna, chaynataq onqoykunapas yapakunan karqa (Lucas 21:11; Apocalipsis 11:18). Runakunam mana allinllataña rurananku karqa. Chay sasachakuy tiempokunapitaqmi Jesuspa qatiqninkunaqa enteron pachapi Diospa Gobiernonmanta willakunanku karqa. (Leey Mateo 24:3, 7, 8; 2 Timoteo 3:1-5.)

4. ¿Ima suyakuytaq kachkan allin ruraq runakunapaq?

Tukuy atiyniyoq Diosqa kasukuq runakunamanmi achka bendicionkunata qonqa. Hanaq pachapi Diospa Gobiernonpa Reynin Jesucristopiwan kay pachamanta akllasqa runakunam waranqa wata kamachimunqaku kay pachata. Chaypim wañusqakunapas kawsarimunqaku hinaspam wiñaypaq kawsanqaku. Lliw runakunam mana allinkunamanta librasqaña kanqaku, manañam kanqachu wañuypas nitaq nanaypas. (Leey Apocalipsis 5:10; 20:6, 12; 21:4, 5.)

Astawan yachayta munaspaqa qawariy, ¿Imatapunim Bibliaqa yachachin? libropa 23-25 paginankunatawan 197-201 paginankunata