Sutikimantam willarqani

‘Kay pachamanta qowasqayki runakunamanqa ñam willaniña [sutikimanta]. Yachachirqanim pim kasqaykita, chaywanpas hinallaraqmi yachachisaq.’ (JUAN 17:6, 26)

¿Imatam Jesusqa chaywan niyta munarqa? Jesusqa Diospa sutinmantam willarqa Hebreo Rimaypi Diospa Palabranta leespan (Lucas 4:16-21). Diosta imayna mañakunankupaqmi qatiqninkunaman kaynata yachachirqa: “Taytayku, sutiki yupaychasqa kachun”, nispa (Lucas 11:2).

Ñawpa cristianokunapa ejemplon. Jerusalenpi ancianokunawan rimaspanmi apostol Pedro nirqa Diosqa mana judio kaqkunamanta ‘sutinpaq llaqtan’ akllasqanmanta (Hechos 15:14, Versión Reina-Valera). Jesuspa apostolninkunawan qatiqninkunaqa kaynatam predicaqku: “Jehová Diospa sutinmanta rimaqkunaqa salvakunqakum”, nispa (Hechos 2:21; Romanos 10:13, NM). Qellqankupipas Diospa sutintam qellqarqaku. Judiokunapa leyninkunamanta willaq Tosefta sutiyoq qellqapim willakun ñawpa tiempopi cristianokunapa qellqanku kañasqa kasqanmanta. Chay qellqakuna kañasqa kananmanta willaspanmi nirqa: ‘Diospa sutinpas chaynataq paykunapas kañasqayá kachun’, nispa.

¿Pikunataq kunanpas Diospa sutinmanta willakunku? Revised Standard Version nisqa Bibliapa qallariyninpim nin: ‘Chullalla cheqap Diospa sutintaqa manañam rimanachu achka dioskunapas kanman hinaqa, judiokunam cristianokuna manaraq rikurichkaptin Diospa sutintaqa manaña rimarqakuchu chaymi cristianokunapaqqa mana allinchu kanman Diospa sutinta rimayninkuqa’, nispa. Chayraykum chay Bibliapiqa Diospa sutinpa rantinpi Señor nispalla qellqarqaku. Catolica iglesiapi umalliqkunam Vaticano llaqtapi tantearqaku ‘misa rurasqankupi, takisqankupi chaynataq rezakusqankupipas hebreo rimaypi Diospa kayna YHWH sutinta manaña rimanankupaq’. *

¿Kanmanchu mayqen religionpas Diospa sutinmanta willaq? Sergey sutiyoq mozom chaymanta cuentata qokurqa. Paymi warmachallaraq kachkaspan Kirguistán nacionpi huk videota qawaspan yacharqa Diospa sutinqa Jehová kasqanta. Chunka wata pasaytam chay sutita kaqmanta uyarirqa Estados Unidos nacionpi iskay Testigokuna wasinman rispa Diospa sutinta Bibliapi qawachiptinku. Paymi kusikurqa Diospa sutinmanta willaq religionta tariruspan. Jehová Diospa sutinmantam huk diccionario nin: “Jehová Diosqa” mayqen dioskunamantapas Testigonkunapa yupaychasqan ancha respetana Diosmi”, nispa. (Webster’s Third New International Dictionary.)

[Willakuy]