Allin cristianokunaqa runamasinkutam yanapanku

DIOS serviyninpim Jesusqa iskay ruraykunapi astawan kallpanchakurqa. Punta kaq, payqa kallpanchakurqa runakunata cambiachinanpaqmi manam gobiernokunata cambiachinanpaqchu. Piensarisunchik Ancha Reqsisqa Yachachikuyninpi ima nisqanmanta. Lliw runakunapaq qatiqninkuna kachi hina chaynataq achkiy hina kasqankumanta manaraq willachkaspanmi nirqa: ‘Diostam necesitani niqkuna’ kusisqa kasqankumanta. Ichaqa manam paykunallachu, aswanqa: ‘llampu sonqoyoqkuna’, ‘limpio sonqoyoqkuna’ chaynataq ‘amachaqkunapas’ kusisqa kaytaqa atinmankum (Mateo 5:1-11). Qatiqninkuna kayta entiendenankutam Jesusqa munarqa: Bibliapa nisqanman hina kawsanankuta chaynataq Diosta tukuy sonqonkuwan servinankutapas.

Iskay kaq, Jesusqa ñakariq runakunataqa llakipayarispanmi yanapaykurqa. Ichaqa manam runakunawan huñunakuruspa kay pachapi lliw ñakariykunata chinkachinanpaqqa imatapas rurarqachu (Mateo 20:30-34). Onqoqkunatam hampirqa, ichaqa manam onqoykunaqa chinkarqachu (Lucas 6:17-19). Ñakarichisqa runakunatam yanaparqa, ichaqa manamá mana allin ruraykunaqa chinkarqachu. Yarqasqakunatapas mikuchirqam, ichaqa hinallam kay pachapi yarqayqa karqa (Marcos 6:41-44).

Runakunata cambiachispankum llakinkupi yanapaykunku

¿Imanasqataq Jesusqa runakunapa sonqonta cambiachispan llakinkunapi yanapaykurqa? ¿Imanasqataq mana afanakurqachu tukuy ima ñakariykunata chinkachinanpaq chaynataq gobiernokunapa imayna kasqanta cambiachinanpaqpas? Yacharqam chaykunataqa Diosña Gobiernonwan hamuq tiempopi chinkachinanmanta (Lucas 4:43; 8:1). Chayraykum onqoqkunata hampiypi astawan tiempochakunanpaq qatiqninkuna niptinku payñataq kaynata nirqa: “Hakuchik hichpapi llaqtachakunaman, chaykunapipas willakamunaypaqmi hamurqani kay pachamanqa”, nispan (Marcos 1:32-38). Runakunapa nanayninta samaykachispanpas Taytanmanta yachachiytam vidanpiqa puntapi churarqa.

Kunan tiempopi Jehová Diospa testigonkunapas Jesustam qatipakunku Bibliamanta yachachispanku. Kallpanchakunkutaqmi sasachakuypi tarikusqankuta reqsikuq runamasinkuta yanapaykunankupaqpas. Ichaqa manam kallpanchakunkuchu kay pachapi tukuy mana allinkunatawan tukuy ima ñakarichiq kaqkunata chinkachinankupaqqa, chaykunataqa Dioslla Gobiernonwan chinkachinanmantam seguro kanku (Mateo 6:10). Aswanqa Jesus hinam kallpanchakunku runakunata cambiachinankupaq manam gobiernokunata cambiachinankupaqchu. Runakunaqa manam gobiernokunapa kamachisqanwanchu sasachakunku aswanqa kikinku imayna runa kasqankuwanmi.

Allin kawsakuqkuna

Jehová Diospa testigonkunaqa yachankum allin cristiano kaspa runamasinkuwan allin kawsakunankuta. Chayraykum autoridadkunatapas kasukuspanku respetanku, chaymantapas qellqankuwan chaynataq predicasqankuwanmi runamasinkuta kallpanchanku chayna kawsanankupaq. Ichaqa, Diospa mana munasqanta ruranankupaq gobiernokuna kamachiptinkuqa  manam kasukunkuchu. Paykunaqa Jehová Diostam puntataqa kasukunku runakunamantaqa (Hechos 5:29; Romanos 13:1-7).

Chaymantapas, mana imallapaqmi runamasinkuman Bibliamanta yachachinku wasin-wasin rispanku. Chayna rurasqankuwanmi millonnintin runakunata yanapanku vidankuta cambianankupaq. Chayna yachachisqankuwantaqmi sapa wata pachaknintin runakuna saqechkanku: huchallikuypi puriyninkuta, tomayman qokuyninkuta, drogakuyninkuta chaynataq qollqepaq apuestayninkutapas. Paykunaqa Bibliamanta yachasqankuta kasukuspankum llaqtankupipas respetakuq chaynataq sumaq kayniyoq runakuna kawsakunku.

Bibliamanta kay yachachikuykunaqa yanapantaqmi familiapi respetakuq kanankupaq chaynataq casarasqakuna, tayta-mamawan churi-wawakuna chaynataq wawqe-panintin rimanakunankupaqpas. Allin kawsakuq familiakunaqa yanapantaqmi llaqtapi kaq runakuna allin kanankupaqpas.

Kay yachachikuykunata leeruspayki ¿imatam yacharunki? ¿Allinpaqchu Bibliaqa hapin gobiernokunawan religion hukllawakuyta? Manam ¿aw? Chayna kaptinpas, cheqap cristianokunaqa runamasinkunawan allin kawsakuqmi kananku. ¿Imaynata? Jesuspa nisqanman hina llapa runakunapaq kachi hina chaynataq achkiy hina kaspankum.

Jesucristopa yachachikuyninkunata kasukuqkunaqa yanapakuykunatam tarinqaku, yanapanqakutaqmi familiankutawan llaqtankupi kaqkunatapas. Sichu astawan yachayta munanki llaqtaykipi imayna yachachisqankumanta, hinaptinqa kallpanchaykikum Jehová Diospa testigonkunawan rimanaykipaq. *

[Willakuy]

[10 kaq paginapi suti rikuylla kaq willakuy]

Runakunata cambiachinanpaqmi Jesusqa kallpanchakurqa manam gobiernokunata cambiachinanpaqchu

[11 kaq paginapi suti rikuylla kaq willakuy]

Jehová Diospa testigonkunaqa yachankum allin cristiano kaspa runamasinkuwan allin kanankuta