¿Imaynatam runakunata yanapan Bibliamanta yachachikuykuna?

ÑAM qawarunchikña cheqap cristianokunaqa gobiernokunaman mana chaqrukusqanta. Chaynaqa, ¿imaynatataq runakunapi interesakusqankuta qawachinmanku? Jesuspa kayna nisqanta kasukuspankum: ‘Chaynaqa llapallan nacionpi runakunaman rispayá willamuychik qatiqniykunaña kanankupaq hinaspayá bautizamuychik Taytapa, Churipa hinaspa chuya espiritupa sutinpi. Yachachimuychikyá qamkunaman tukuy ima kamachisqayta kasukunankupaq. Sapa punchawmi ñoqaqa qamkunawan kasaq kay pacha puchukanankama’ (Mateo 28:19, 20).

Cristianokuna kachi hina chaynataq achkiy hina runakunapaq kasqankuqa tupanmi runakunaman willamunankupaq Jesucristopa kamachisqanwan (Mateo 5:13, 14). ¿Imapitaq tupan? Hinaspa ¿imapitaq runakunata yanapan Jesuspa qatiqninkuna kanankupaq yachachisqankuqa?

Jesucristopa yachachikuyninqa kachipiwan achkiy hinam

Aychaman runapa kachi hinasqanmi yanapan aycha allin kananpaq, chaynam Diosmanta willakusqankupas runakunata yanapan. Jesuspa yachachikuyninkunata uyarispan kasukuqkunaqa cuidakunkum kay tiempopi mana allin ruraykunamanta. Chayraykum cristianokunaqa cigarro pitaytawan cuerponkuta qachachaq mana allin ruraykunataqa mana rurankuchu, hinaspankum kallpanchakunku: hawkalla, kuyakuq, pacienciakuq, llakipayakuq chaynataq huk sumaq kayniyoqkuna kanankupaq (Galatas 5:22, 23). Kay rurasqankuwanmi  runamasinkunawan allin qawasqa kanku. Chayna kaspankum runamasinkupi interesakusqankuta qawachinku.

Ichaqa, ¿imapitaq tupan achkiyqa willakusqankuwanqa? Imaynam killapas intipa achkiyninta kanchan chaynam cristianokunapas Jehová Diospa ‘achkiyninta’ qawachinku paymanta willakusqankupiwan allin kawsakusqankuwan (1 Pedro 2:12).

Qatiqninkunapa imayna kawsayninku achkiywan tupasqantaqa astawanraqmi Jesusqa entiendechirqa kayna nisqanwan: “Mecherotaqa ratachina manam cajonpa ukunman churarunapaqchu, aswanqa altomanmi churana wasipi llapallan kaqkunata achkinanpaq. Chaynayá qamkunapas achkichkaq mechero hina kaychik runakunapa qayllanpi”. Mecheropa achkiynin hinam cheqap cristianokunapa predicasqankupiwan imayna kayninkuqa sutillata qawakunan. Runakuna chayta qawaspankuqa manam cristianokunatachu alabanqaku aswanqa hanaq pachapi kaq Diosninchiktam (Mateo 5:14-16).

Llapallan qatiqninkunam rurananku

¿Pikunamantam Jesusqa rimachkarqa “qamkunaqa runakunapaqmi achkiy hina kankichik” chaynataq “qamkunapas achkichkaq mechero hina kaychik” nispanqa? Llapallan qatiqninkunamantam. ¿Imanasqa? Achka religionkunapi kaspa aslla kasqankuraykum willakunankupaq kamachisqantaqa mana cumpliyta atinmankuchu karqa. Chayraykum llapallan paypi iñiqkunaqa “achkichkaq” hina kananku. Qanchis millon Jehová Diospa testigonkunaqa iskay pachak kimsa chunka masnin nacionkunapim kallpanchakunku Jesuspa kamachisqanman hina runamasinkuman predicanankupaq.

¿Imamantataq willakunku? Jesusqa manam kamachirqachu gobiernokunata cambiachinankupaqqa, religiontawan gobiernokunata chaqruchinankupaqqa nitaq chayman rikchakuq kaqkunata ruranankupaqpas. Payqa nirqam: “Diospa munaychakusqanmanta kay allin noticiam willakusqa kanqa enterollan kay pachapi chaynapi llapallan nacionpi runakuna yachananpaq”, nispa (Mateo 24:14). Chaytam kunan tiempopi cheqap cristianokunaqa rurachkanku. Jesuspa kamachisqanman hinataqmi yachachinku Diospa Gobiernollan kay pachapi kamachiq Satanaspa munaychakusqanta chinkachispan hawkayay apamunanmantapas.

Bibliam willawanchik predicasqanpi Jesus imayna kasqanmanta. Chaymi qatiqnin yachachikuypi qawasun chayna kayninkuna Diosmanta willakuyninkupi cristianokunata imayna yanapasqanmanta.

[8 kaq paginapi suti rikuylla kaq willakuy]

¿Imaynanpitaq cristianokunapa willakusqankuqa kachi hina?

[9 kaq paginapi suti rikuylla kaq willakuy]

¿Imanasqataq cristianokunapa willakusqankuqa tutayaypi achkichkaq mechero hina?