Ancha llakikuypaqmi

“Warmikuna ñakirichisqankuta qawaspaymi manaña munanichu kawsaytapas.” ZAHRA (15 WATANPI), GEO sutiyoq revistapim paymanta willakurqa.

KAY fotokunapa hawanpi Zahrapa nisqanqa llakikuypaqmi, yuyayniyoq warmikunapas chaynataq warmi warmachakunapas enteron Pachapim imawanpas ñakarichisqa kanku. Qatiqninpi wakin willakuykunapi reparasun.

● Wawanku qari kanantam munanku. Asia law nacionkunapiqa wawanku qari kanantam munanku. Naciones Unidas institucionpa nisqanman hinam 2011 kaq watapi chay nacionkunapiqa yaqa 134 wara-waranqa warmikuna wañurqaku, wakinpiqa abortasqa kasqankuwan, wawallaraq kachkaptinku wañuchisqa kasqankuwan otaq saqesqa kasqankuwanpas.

● Manam educacionta chaskinkuchu. Allpantinpi 10 warmi warmachakunamantam yaqa 7 warmachakuna escuelaman tawa watalla rinku.

● Abusasqam kanku. 2.600 millon masnin warmikunam yachanku qosankupa abusasqan, leypa mana amparasqan nacionpi.

● Doctorpa mana atiendesqanmi kanku. Wakcha nacionkunapiqa sapa punchawmi achka warmikuna wañunku wiksayoq kasqankuwan otaq wachakuchkaptinku doctor mana atiendesqanwan.

● Manam herenciatapas chaskinkuchu. Allpantinpi tukuy rikchaq kawsaykunata warmikuna tarpuptinkupas manam kikinkupaqqa allpanku otaq herenciankuqa kanchu.

¿Imanasqataq warmikunata chaynata ñakarichinku? Wakin llaqtakunapiqa religionninkupi yachasqankum runakunata kallpanchan warmikunata mana respetanankupaq, ñakarichisqa kasqankutapas allinpaqmi qawanku. Huk periodicopim qellqarqaku India nacioniyoq Chandra Rami Chopra sutiyoq abogadapa nisqanta, paymi nirqa: ‘Yaqa lliw religionkunapim warmikunata mana allinpaq qawanku’, nispa.

¿Chaynatachu qampas piensanki? Bibliapi yachachikuykunapas, ¿ninchu warmikunata mana respetanapaq? Bibliapa wakin yachachikuyninkunata leesqankuwanmi wakinqa chaynata piensanku. ¿Imaynatam Jehová Diosqa warmikunata qawan? Diospa ima nisqanmanta yachanapaqqa allintam entiendenanchik.

[3 kaq paginapi dibujo]

[3 kaq paginapi dibujo]

[3 kaq paginapi foto]

[Reqsikunchikmi]

© G.M.B. Akash/Panos Pictures