Servisqay Diostam reqsiruni

Kaytam willakun Marieta Manuel Bacudio

Pentecostal religionmanta onqoqkunata sanoyachinanpaq atiyniyoq nisqanku pastormi watukamuwarqaku. Llachpaykuwaptinmi pampaman sawakururqani “chuya espiritu” yaykuruwaptin. Qonqayta rikchariruspaymi musyarurqani onqoqkuna hampinaypaq atiy chaskisqaymanta, anchatam chaytaqa munachkarqani. ¿Imaynanpitaq chaynapi tarikurqani? Puntatayá willasqaykichik ñawpa vidaymantaraq.

ILOCOS Norte law Filipinas nacionpim nacerqani 1968 kaq watapi diciembre killapa 10 punchawninpi. Chunka turi-ñañaykunamanta qanchis kaqmi kani. Warmacha kaptiymi Catolica religionpa yachachisqanman hina yachachiwarqaku. 1986 kaq watapi colegioyta tukuruspaymi enfermera kayta munarqani. Ichaqa ancha onqosqaywanmi enfermera kaytaqa mana atirqanichu, wañuytañam piensarqani. Llumpay hukmanyasqa kaspaymi allinyarunaypaq Diosta ruegakuspay payllataña servinaypaq prometekurqani.

Allinyasqayman hinam prometekusqayta cumplinaypaq tanteakurqani. Chaymi 1991 watapa junio killanpi Pentecostal religionpi Biblia estudianaypaq matriculakurqani. Chaypi estudiaqkunaqa piensarqanikum ayunaspa hinaspa orakuspaykuqa “chuya espiritu” chaskinaykuta. Onqoqkunata hampinaypaqmi ñoqaqa chayta chaskiyta munarqani. Huk kutipim orakusqayku hora estudiaqmasiy kallpawan mañakuchkarqa. Estudiaqmasiykunaman chuya espiritu chaskisqayta creechinaypaqmi mañakusqanta uyarinaypaq pakanpalla asuykurqani. Mañakuyta tukurunanpaqña kachkaptinmi apuraylla kutirqani qonqoranpa kasqay sitioman. Chaymantam mañakusqankunamanta yachasqayta nirqani. Hinaptinmi atiyniyoq kasqayta creerurqa.

Estudiasqayman hinam chaypiqa iskayrayayta qallaykurqani. Bibliapim Mateo 6:9 nisqanpi Jesusqa rimarqa ‘Taytanmanta’ hinaspa ‘sutinmanta’. Chaymi piensarqani: ‘¿Pitaq Taytaqa? ¿Imanasqataq sutinqa chuyanchasqa kanan?’, nispa. Chayna tapukuyniykunamanta yachachiwaqniykunapa contestawasqanqa manam sonqoyta tiyachirqachu. Hukmanyasqam tarikurqani Taytapas churipas chaynataq chuya espiritupas huk cuerpollapi kimsanku kasqankuta yachachiwasqankuwan, ichaqa mana entiendey atina kasqanmantam niqku. Chayna kaptinpas pastora kanaypaqmi hinalla estudiarqani.

Jehová Diospa testigonkunamanta uyarisqay

Escuelapim niwaqku llapallan religionkunamanta Testigokuna pasaypaq kasqankuta chaynataq anticristo kasqankutapas. Chaymi paykunata cheqnirqani.

Iskay wataña estudiasqaymantam tayta-mamay watukuq rirqani. Mayor ñañay Carmenmi  chaypi kasqayta yacharuspan tupaykunaykupaq hamusqa. Payqa Testigoñam kasqa. Precursora otaq killapi 70 horata predicaq. Diosmanta willawayta munaptinmi piñallaña nirqani: ‘Ñoqaqa reqsiniñam servisqay Diostaqa’, nispa. Trataparuspaymi tanqaykurqani hinaspam yachasqanmanta ima willawanantapas mana munarqanichu.

Estudiasqayman kutiptiymi Carmenqa ¿Debería creer usted en la Trinidad? * niq folletota apachimuwasqa. Chaytaqa chaylla llikiparuspaymi kañarurqani. Ñañaypaqqa hinallaraqmi llumpay piñasqa karqani.

Munasqaytam chaskiruni

Estudiachkaspayraqmi runakunata yanaparqani religionniyman yaykunankupaq. Anchatam kusikurqani mamaywan turiy Pentecostal religionniypi kasqankuwan.

1994 kaq watapi estudiayta tukuruspaymi pastoraña karqani. Qallariypi nisqayman hinam chay punchawqa huk pastor watukamuwarqaku. Llapaykum payman asuykuyta munarqaniku sanoyachinapaq atiy qosqanta piensaspayku. Altoman seqaruspam bandapa waqasqanman hina taqllakuspa pawaykacharqaniku. Hinaptinmi pastorpa tupaykusqan kaqkunata espirituqa pampaman sawarurqa otaq laqarurqa. * Tupaykuwaptinmi ñoqapas pampaman sawakuspay sonsayarurqani. Serniy kutiramuptinmi mancharisqa hatarirurqani, ichaqa kusikurqanim sanoyachinaypaq atiy chaskisqaywan.

Chaymanta qepatam chay atiyniywan calenturawan kaq warmi warmachata sanoyachirqani. Orakuyta tukuruptiymi warmachaqa sudayta qallaykurqa hinaptinmi calenturan chinkarurqa. Diosman prometekusqayman hinam rurayta qallaykurqani. Ichaqa hukmanyasqam sientekurqani. Yacharqanim Diosqa chullalla kasqanta ichaqa manamá allintachu reqsirqani. Religionniypi yachachisqankumantapas iskayrayarurqanim.

Imapi creesqaykunatam saqerurqani

Testigokunata cheqnisqayqa astawanraqmi karqa. Mayqen qellqankutapas tariruspayqa chayllam kañaruq kani. Tiempopa risqanman hinam yacharurqani huñunakuyniykuman mamay manaña riy munasqanta, ñañay Carmenwan Biblia estudiasqanrayku. Chaymi ñañaytaqa rikuytapas munarqanichu.

Huk kutipim mamaypa wasinpi ¡Despertad! sutiyoq revistata tarirurqani. Kañaruyta munaspaypas yachaykuytam munarqani mamaypa imakuna yachasqanmanta chaymi leeyta munarqani. Anchatam admirakurqani kayna leesqaymanta, huk señormi religionninpa yachachisqanta tukuy sonqonwan creechkaspanpas Testigokunapa qellqankunawan yanapachikuspa Biblia estudiayta qallaykusqa. Entienderusqam Bibliapa ima nisqanta: Taytamanta, churimanta, chuya espiritumanta, infiernomanta chaynataq almamantapas. Chaykunamanta leesqayqa sonqoymanmi chayarurqa. Ñoqapas  chaykunamantam yachaykuyta munarqani.

¡Despertad! revistapiqa leerqanitaqmi huk señorpas Bibliata estudiaspan sinkakuyta chaynataq drogakuyta saqesqanmanta. Chayna willakuykunata leesqaywanmi Testigokunapa qellqankuna leeyqa gustaruwarqa. Chaynapim tarirurqani El nombre divino que durará para siempre niq qellqata, chaypim yacharurqani Diospa sutinqa Jehová kasqanta. * Sapallan cheqap Diosta reqsisqaymi anchata kusichiwarqa (Deuteronomio 4:39; Jeremias 10:10).

Mana pipapas yachasqallantam Bibliapa yachachisqankunata estudiarqani. Pastora kanaypaq estudiasqaypim yachachiwarqaku Jesusqa Dios kasqanta, Bibliapim ichaqa yacharqani payqa “Diospa Churin” kasqanta (Mateo 16:15, 16).

Sonqoymi tiyarurqa

Ñañay Carmenwan yapamanta tupaptiymi qellqakunata mañakuptiy admirakururqa, astawanraqmi El nombre divino que durará para siempre niq qellqata mañakuptiyqa. Pastora kanaypaq unay watakuna estudiasqaypim pantay yachachikuykunata yacharurqani. Bibliapa yachachisqankunata yachasqaywanmi ichaqa anchata kusikurqani. Jesuspa nisqanman hinam pasawachkarqa, paymi nirqa: ‘Yachankichikmi cheqap kaqmanta, chay cheqapmi libreyachisunkichik’, nispa (Juan 8:32). Chaymi imayna kawsasqayta cambiayta qallaykurqani.

Piensarqanim pakallapi Jehová Diosta yupaychaspay hinalla pastora kayta ichaqa cuentatam qokurqani religionniypa yachachisqanman hina yachachiyqa mana allin kasqanta. Piensarqanim pastora kasqayta saqeruspay imapi llamkanaymanta. Manam munarqanichu Testigo karuptiy Iglesiay penqaypi kanantaqa. Chaymi tantearurqani Iglesiaypi hinalla yachachinaypaq ichaqa manañam yachachirqanichu pantay yachachikuykunamantaqa.

Yapamanta Carmenwan tuparuptiymi Testigokunapa huñunakuyninman rinaypaq kallpanchawarqa. Ñoqaqa Laoag sutiyoq llaqtapi iglesiaymanmi sapa kuti riq kani, chaymi huk kuti risqaypi mana pipapas yachasqallanta Jehová Diospa Testigonkunapa Huñunakunanku Salonta maskarqani. Chaypim reqsirurqani Alma Preciosa Villarin sutiyoq precursorata, iñiqmasinkunam niqku Precious nispa. Testigokunata hinallaraq cheqnispaypas Preciouswanmi Biblia estudiayta qallaykurqani.

 Ñañaymi anchata pacienciakuwarqa. Preciouspas chaynam karqa. Sasa entiendechina kaptiypas paymi yanapawarqa Bibliapa yachachisqanta entiendenaypaq. Yachachiwasqanta atipayta munaspaymi llumpayta piñakuq kani, pantay yachasqaykunatam defiendeq kani. Preciouspa chaynataq iñiqmasinkunapa humildadwan pacienciakuspa kuyapayawasqankum sonqoyta kusichirqa. Chaymi Jehová Dios serviyta munarqani.

1995 watapa julio killanpim tanteakurqani Iglesiaymanta lloqsikunaypaq. ¿Imanasqa? Pantay religionmanta rikchanachispa Bibliapa kayna nisqanpi reparasqaywanmi, chaypim nin: “Runallaykuna, chay llaqtamantayá lloqsiychik. Paykunawan ama huchallikunaykichikpaqyá lloqsiychik. Paykunawan mana castigasqa kanaykichikpaqyá lloqsiychik”, nispa (Apocalipsis 18:4). Ichaqa, ¿imawantaq mantienekuyman pastora kasqayta saqeruspayqa? Diospa kayna nisqanpim confiakurqani: “Manapunim dejasqaykichu nitaqmi saqesqaykichu” (Hebreos 13:5).

Bautizakunaypaq iskay semanallaña kachkaptinmi pastora kaspay servichikusqaykunata kañanaypaq taytaypa wasinman rirqani paywan turiy contraypi kachkaptinpas. Chay rurasqaywanmi sanoyachinaypaq atiy chaskisqayqa chinkarurqa. Kunanqa hawkañam puñuni, ñawpaqtaqa imapas ñitiwaqtam musyaq kani. Manañataqmi rikunichu ventanaypi yana llantutapas. Imaynam Pablo ‘adivinaq espirituyoq sipasta’ demoniokunapa makinmanta librarqa chaynam ñoqapas librakuruni (Hechos 16:16-18).

Anchatam kusikurqani 1996 kaq watapi mamaywan kuska bautizakusqaymanta. Chaymanta qepallatam precursora karqani, chaynatam unay watakuna Diosta servirqani.

Kunanqa Silver sutiyoq qosaypiwanmi kallpanchakuchkaniku warmaykuman Diosmanta yachachiypi. Kimsa ñañaykunapas Testigoñam kanku. Diosta ñawpaqmantaraq mana reqsisqaymantam pesakuni, kunanqa kusisqam kachkani servisqay Diosta reqsisqaywan.

[Willakuykuna]

[12 kaq paginapi foto]

[13 kaq paginapi foto]

Pastora kanaypaq chaskikusqay

[13 kaq paginapi suti rikuylla kaq willakuy]

Atiy chaskisqaywanmi calenturayoq warmachata sanoyachirqani

[14 hinaspa 15 kaq paginakunapi foto]

Preciouswan Bibliata estudiaspay

[14 kaq paginapi suti rikuylla kaq willakuy]

Imayna kawsasqaytam cambiayta qallaykurqani

[15 kaq paginapi foto]

Mamaypiwan bautizakusqay

[15 kaq paginapi foto]

Precursora kasqay

[15 kaq paginapi foto]

Qosaypiwan wawaywan chaynataq Testigo kaq aylluykunawan

[15 kaq paginapi suti rikuylla kaq willakuy]

Sapallan cheqap Diosta reqsisqaywanmi kusikurqani