WARANQANTINMI Diosta serviqkunaqa mana navidadtaqa ruwankuchu. ¿Ñakakunkuchu mana ruwasqankumanta? Churi-wawankupas ¿imanintaq chayta manaña ruwaptinku? Yachaykusunyá enteron allpa pachapi Jehova Diospa testigonkunapa ima nisqankuta.

Jesusta yuyariymanta. Australia nacionmanta Evem nin: “Manaraq Jehova Diospa testigon kachkaspayqa wakichallanpim iglesiamanqa riq kani. Navidadmanpas utaq pascuamanpas wakillanpim riq kan, chaykunaman rispaypas Jesuspiqa manam piensayllapas-piensarqanichu. Kunanmi ichaqa navidadta mana ruwaspaypas iñiqmasiykunawanmi sapa semana iskay kutita huñunakuni, hinaspam runakunamanpas Jesusmanta yachachini”, nispa.

Regalokuna quymanta. Irlanda del norte nacionmanta Reubenmi nin: “Imatapas qunqayllamanta regalaykuwaptinkuqa ancha kusisqam tarikuni. ¡Sumaqmi chayqa! Tarjetachakunatawan dibujochakunata ruwaruspa hukkunaman quyqa anchatam gustawan. Chaykunawanmi hukkunapas kusisqa tarikunku hinaspa ñuqapas”, nispa.

Hukkunata yanapaymanta. Australia nacionmanta Emilim nin: “Unquqkunapaq mikuykunata yanuspaykum kusisqa tarikuniku. Wakinpiqa ima miskichatapas ruwaruspam apaniku, apanikutaqmi waytakunatawan huk regalokunatapas chaynapi sunqunku tiyaykunanpaq. Chaytaqa imay killapas utaq imay punchawpas apanikum”, nispa.

Aylluwan huñunakuymanta. Islas Caiman nacionmanta Wendim nin: “Imay punchawpas aylluykuwan huñunakuptiykum warmakunaqa tionkuta, abuelonkuta hinaspa primonkuta sumaqta riqsinku. Familiaykuqa yachanmi fiestakunaraykulla mana watukusqaykuta. Yachankum kuyasqaykurayku watukusqaykuta”, nispa.

Hukkunawan allinlla kaymanta. España nacionmanta Sandram nin: “Navidadpiqa tukuy ima ruwayniyuq kasqayraykum tiempoypas mana karqachu nitaq piensayllapas-piensarqanichu hukkunawan allinlla kaypiqa. Bibliata estudispaymi ichaqa yacharuni runakunapaq Dios imata munasqanta, chay yachasqaykunawanmi hawka tarikuni. Yachanitaqmi wawaykunapas hamuq tiempopi hawka kawsakunanta”, nispa.