¿Imaynam tarikunki 21 diciembre 2012 punchawpi piensaspayki? Achka runakunam ninku maya nisqa almanaqueta qawaspanku chay punchawpi imapas pasakunanmanta. Chaykuna cumplikunanta yachaspankum wakinkuqa hawkalla tarikunku, llakisqa otaq mana kaqpaqpas hapinkuchu. ¿Yanqa willakuychu kaypas karqa puchukay punchaw chayamunanmanta?

Ichaqa, ¿imatam piensanki ‘kay pacha puchukananmanta’ Bibliapa nisqanta yachaspa? (Mateo 24:3.) Wakinkuqa manchakunkum kay Pacha kañasqa kananmanta, wakinñataq kay pacha imayna puchukananmanta qawayta munanku. Hukkunañataqmi uyariytapas mana munankuchu kay pacha puchukachisqa kananmanta. Runakunaqa chaynam kanku imatapas qawasqankurayku otaq uyarisqankurayku, ichaqa manam Bibliamanta yachasqankuraykuchu.

Yaqapaschá Bibliapa nisqanta yachasqaykiwan admirasqa tarikunki. Bibliaqa niwanchikmi puchukay punchawta imanasqa kusikuywan suyanapaq, chaymantapas ninmi manaña chayamusqanrayku hukmanyarunamantapas. Chaymi kallpanchaykiku runakunapa tawa tapukuyninkuta Bibliapa imayna kutichisqanta qawanaykipaq.

BIBLIAM NIN: “Kay pachatam maypim tiyananpaq unancharqanki. Mana haykapipas suchurinanpaqmi chaynata takyachirqanki”, nispa (SALMO 104:5).

Kay Pachaqa manam ninawan nitaq imawanpas chinkachisqachu kanqa, Bibliaqa yachachinmi runakuna wiñaypaq kay Pachapi yachanankumanta. Salmo 37:29 nin: “Allin ruraq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku”, nispa (Salmo 115:16; Isaias 45:18).

Kay Pachata Dios unanchaspanqa nirqam tukuy imapas “sumaqllaña kasqanta”, kunanpas chaynatam piensan (Genesis 1:31). Payqa manam chinkachiytaqa piensanchu, aswanmi nin: “Kay pacha chinkachiqkunatam chinkachi[saq]”, nispa. Manam saqenqachu kay Pachata purmachinankutaqa (Apocalipsis 11:18).

Chaynaqa yaqapaschá piensachkanki 2 Pedro 3:7 nisqanpi, chaypim nin: “Cielokunatawan kay pachataqa Diospa rimarisqanmi waqaychachkan ninapaq”, nispa. ¿Manachu kayqa qawachin kay Pacha ninawan kañasqa kananmanta? Bibliaqa wakinpim riman hanaq pachamanta, kay pachamanta hinaspa ninamanta imawanpas tupachinanpaq. Genesis 11:1, NM nisqanmi willakun “enteron pacham huk rimayniyoqlla karqa” nispan. Kay textopi ‘pachamanta’ rimaspanqa nichkanmi runakunamanta.

2 Pedro 3:7 textopi hanaq pacha, kay pacha hinaspa nina nisqanqa tupanachisqataqmi kachkan. 5 hinaspa 6 versiculokunam riman Noeypa tiemponpi sinchi para hanaq pachatawan kay pachata chinkarachisqanmanta, kay Allpa pacham ichaqa mana chinkarqachu. Chinkaq ‘pachaqa’ mana allin runakunam karqa, ‘hanaq pachañataqmi’ gobiernaq runakuna (Genesis 6:11). 7 versiculopi nisqanñataqmi riman huchasapa runakuna hinaspa gobiernokuna puchukachisqa kanankumanta, chayqa ninawanmi tupachisqa kachkan.

BIBLIAM NIN: “Kay pachapi mana allin ruraykunawan mana allin munaykunaqa tukuruqllam, Diospa munasqanman hina ruraqmi ichaqa wiñaypaq takyanqa”, nispa (1 JUAN 2:17).

“Kay pachapi” kaqkuna tukurunanmanta rimaspanqa manam kay Allpa pachamantachu rimachkan, aswanqa Diospa  munayninta mana ruwaqkunamantam. Imaynam huk doctor onqoq runapa tumorninta horqorunman wañuymanta salvananpaq, chaynam Diospas mana allin runakunata chinkachinqa allin runakuna kay pachapi kawsakunankupaq (Salmo 37:9). Chaynaqa puchukay punchawqa allinninchikpaqmi.

Chaymi wakin Bibliakuna kaynata tikranku: “Tukuy imapa tukupaynin tiempo”, nispa. Kaymi yanapawanchik puchukay punchawta allinta qawanapaq (Mateo 24:3, NM). Sichu puchukay punchaw pasayta runakunawan kay Pacha hinallaraq kaptinqa, ¿yaqachu nichwan mosoqmanta sumaq kawsakuy qallaykunanta? Arí, Bibliaqa achka kutitam riman ‘hamuq tiempomanta’ (Lucas 18:30).

Chay hamuq tiempomantam Jesusqa nirqa: ‘Tukuy imapas mosoqyanan tiempo’, nispan. Paymi allichanqa Diospa munasqanman hina runakuna kawsakunankupaq (Mateo 19:28). Chaynaqa atisunmi qatiqninpi nisqanman hina kawsakuyta.

• Kay Pacha sumaq huertayaptinmi hawkayaypi hinaspa tukuy imayoq kawsakuy kanqa (Isaias 35:1; Miqueas 4:4).

• Kanqam kusikunapaq llamkay (Isaias 65:21-23).

• Manañam onqoykunapas kanqañachu (Isaias 33:24).

• Runakunam mozo-sipasyanqaku (Job 33:25).

• Wañuqkunapas kawsarimunqakum (Juan 5:28, 29).

‘Diospa munayninta ruwaspaqa’ manam puchukay punchawtaqa manchakunanchikchu, aswanmi chayamunanta munanchik.

BIBLIAM NIN: “Chaynam nisqaykuna sucedekuptinqa yachankichik Diospa munaychakunanqa hichpamusqantaña”, nispa (LUCAS 21:31).

The Last Days Are Here Again (Tukupay tiempokunaqa kutiramunmi) nisqa libropim Richard Kyle profesor qellqarqa: “Qonqaymanta imapas pasakusqanmi hinaspa chaqwa ruwasqankum runakunata yanapan puchukay punchawmanta astawan yachayta munanankupaq”, nispa. Astawanraqmi imanasqa chaykuna pasakusqanmanta mana yachaspankuqa.

Bibliapi puchukay punchawmanta willakuqkunaqa manam admirakunapaq kaqkunamanta willanankupaqchu qellqarqaku. Diospa yanapakuyninwanmi qellqarqaku puchukay punchaw imayna kananmanta. Qaway Bibliapa wakin willakuyninkuna imayna cumplikusqanta.

•   Guerrakuna, muchuykuna, terremotokuna hinaspa onqoykuna (Mateo 24:7; Lucas 21:11).

• Mana allin ruwaqkunapa mirarusqan (Mateo 24:12).

• Runakunam kay Pachata purmachinan karqa (Apocalipsis 11:18).

• Runakunam kanku kikillanpaq munaqkuna, qollqella kuyaqkuna hinaspa huchallapi puriqkuna, Diostam ichaqa mana kuyankuchu (2 Timoteo 3:2, 4).

• Familiapi sasachakuykuna (2 Timoteo 3:2, 3).

• Puchukay punchaw chayamunanmanta mana imapas qokuq runakuna (Mateo 24:37-39).

• Diospa munaychakusqanmanta allin noticia enterollan kay pachapi willakusqa kasqanta (Mateo 24:14).

Jesuspa ‘llapa nisqankuna sucedekusqanmi’ qawachin puchukay punchaw hichpallapiña kasqanta (Mateo 24:33). Jehova Diospa testigonkunaqa manam iskayrayanikuchu chayna kasqanmantaqa, chaymi Diosmanta willakuniku 236 nacionkunapiwan huk llaqtakunapipas.

BIBLIAM NIN: “Runakunam ninqaku: ‘Hawkañam, seguroñam kachkanchik’ nispa, hinachkaptinmi qonqayllamanta puchukarunqaku, dolorwan hapichikuq warmi hinam kanqaku, manapunimá lluptinqakuchu”, nispa (1 TESALONICENSES 5:3).

Puchukay punchawtam Bibliaqa tupachin wachakuq warmiwan, dolorninqa qonqayllatam hamun, manam harkaytaqa atichwanchu. Puchukay punchaw imayna chayamunantaqa rikchanachichwanmi wiksayoq warmiwan, payqa musyanmi wawachan nacenanpaqña kasqanta. Haykapi nacenanpaq doctorpa nisqanman hina mana kaptinpas, payqa yachanpunim wawan nacenanmantaqa. Chaynallataqmi puchukay punchaw haykapi kasqanpas, yanqa nisqankuqa mana cambianmanchu ‘tukupay tiempokunapi’ kawsasqanchiktaqa (2 Timoteo 3:1).

Yaqapaschá kaynata tapukurqanki: “Puchukay punchawpa hichpaykamusqan sutilla kaptinqa, ¿imanasqataq runakunaqa mana kasukunkuchu?”, nispa. Bibliaqa nirqañam puchukay punchaw hichpallapi kaptinpas mana kaqpaqpas hapinankumanta. Tukupay tiempopi imakunapas pasasqanta mana kaqpaqpas hapispankum kaynata ninku: “Cristom hamunanpaq  prometekurqa ¿maytaq hamunchu? Abuelonchikkunapa wañukusqanmantaraqmi tukuy imapas hina kaqlla kachkan, chaynaqa kachkan kay pachata unanchay qallarisqanmantaraqmi”, nispa (2 Pedro 3:3, 4). Tukupay tiempopi imakunapas pasasqanta sutillata qawaspankupas, achkallaña runakunam mana kaqpaqpas hapinankuchu karqa (Mateo 24:38, 39).

Kay yachachikuyqa Bibliapi puchukay punchawmanta wakillantam qawachin. a ¿Munawaqchu astawan yachayta? Chayna kaptinqa kallpanchaykikum Jehova Diospa testigonkunawan Bibliata mana qollqellapaq estudianaykipaq. Estudiawaqchikmi wasikipi otaq maymi munasqaykipi chaynataq telefonowanpas. Chaypaqqa tiempochakunallaykim, manam imatapas paganaykichu.