Mana hatunchakuymi. Humillakuqqa kikinmantapas astawan allinpaqraqmi hukkunata qawan. Reqsikuntaqmi ima ruway atisqanta otaq mana atisqantapas.

Kamachiq kaspanpas Moisesqa manam hatunchakurqachu. Kamachiq kananpaq pitapas churaruptinkuqa chayllam qawachin humillakuq kasqanta otaq mana chayna kasqantapas. Reqsisqa huk runam nin: “Imayna runa kasqanta yachayta munaspaqa kamachinanpaq churay”, nispa. (Robert G. Ingersoll, orador del siglo XIX.) Moisesmi ichaqa mana hatunchakuq karqa, chayna kasqanqa qatipakunapaqmi.

Jehova Diosmi Moisesman atiyta qorqa israelitakunata pusananpaq. Chaywanqa manam payqa hatunchakurqachu. Huk kutipim herenciamanta sasa allichana asuntota allicharqa mana hatunchakuspan (Numeros 27:1-11). Chaypi tanteasqanqa qepa wiñaykunatapas yanaparqam.

¿Imatam Moisesqa ruwarqa? Israelitakunata pusananpaq nombrasqa kaspanpas manam kikillanchu tantearqa. Manataqmi hapipakurqachu yachayniyoq hinaspa yuyayniyoq kasqanpiqa, nitaq Jehova Dios imayna kasqanta allinta yachasqanpipas.

Hatunchakuq runaqa munasqanman hinachá tanteanman karqa, Moisesmi ichaqa mana chaynatachu ruwarqa. Bibliam nin: ‘Moisesqa chay warmikunapa asuntontam Tayta Diosman willarqa’, nispa (Numeros 27:5). Tawa chunka wataña israelitakunata pusaspanpas Jehova Diospim confiakurqa, manam kikinpa piensayninpichu. ¡Mayna allinmi karqa chayna kayninqa!

Moisesqa manam piensarqachu paylla kamachiq kaytaqa. Jehova Dios paymanta willakunankupaq wakin israelitakunata nombraruptinpas manam hukmanyarqachu aswanqa kusikurqam (Numeros 11:24-29). Ruwayninkunapi hukkuna yanapananpaq suegronpa consejasqantapas uyarikurqam (Exodo 18:13-24). Wañukuynin hichpamuptinpas rantinpi hukta churananpaqmi Jehova Diosta mañakurqa. Chaypaqmi Josuey akllasqa karqa, hinaptinmi Moisesqa tukuy sonqonwan yanaparqa. Chaymantapas llaqtamasinkunatam kallpancharqa Diospa Prometesqan Allpaman Josuey pusaptin payta kasukunankupaq (Numeros 27:15-18; Deuteronomio 31:3-6; 34:7). Moisesqa kusikurqachá israelitakunata Dios yupaychaypi yanapananpaq akllasqa kasqanwanqa. Ichaqa manam kikillanpichu piensarqa aswanqa llaqtamasinkunapa allin kayninkupim.

Kamachiq kaspapas otaq ima ruwayta atispapas manam hatunchakunanchikchu. Jehova Diosqa reparan manam ima ruway atisqanchikpichu aswanqa humillakuq kayninchikpim (1 Samuel 15:17). Mana hatunchakuq kaspaqa Bibliapa kayna nisqantachá kasukusun: “Tayta Diosllapiyá confiakuy tukuy sonqoykiwanqa. Amayá confiakuychu kikikipa entiendesqallaykipiqa”, nisqanta (Proverbios 3:5, 6).

Moisespa ejemplonqa yachachiwanchiktaqmi kamachiq kaspapas mana hatunchakuq kanapaq.

¿Allinpaqchu kanman Moisespa mana hatunchakuq kayninta qatipakuyqa? Awriki. Mana hatunchakuq kaspaqa hukkunatam mana sasachasunchu nitaqmi cheqnichikusunchu. Astawanqa Jehova Diospa agradonpaqmi kasun, payqa mana hatunchakuq Diosmi (Salmo 18:35). Bibliam nin: “Diosqa hatun tukuqkunapa contranpim kachkan ichaqa favorecenmi humildekunataqa”, nispa (1 Pedro 5:5). Bibliapa chayna nisqanmi kallpanchawananchik Moisesta qatipakunapaq.