Yaqa lliw idiomakunapi wara-waranqantinta ruwasqankuraykum Bibliamanqa manam ima librokunapas igualanchu. Bibliaqa Diospa Palabran kasqanraykum Allpantinpi runakunapa vidanta cambiachkan. (Leey 1 Tesalonicenses 2:13; 2 Timoteo 3:16.)

Bibliaqa Diospa palabran kasqanraykum hamuq tiempomanta allintapuni willawanchik, runakunaqa manam yachankuchu hamuq tiempopi ima pasananmantaqa. Kachi qochapa hichpan machaypim tarirurqaku Isaiaspa qellqasqan libropa copianta, chay copiataqa ruwarqaku Jesucristo kay pachaman manaraq hamuchkaptinmi 100 wata ñawpaqtaraq. Chay qellqapim nirqa Babilonia llaqta qalaypaq purmachisqa kananmanta. Chay nisqanmi cumplikurqa Jesucristopa wañusqanmanta unay watakuna pasaytaña. (Leey Isaias 13:19, 20; 2 Pedro 1:20, 21.)

Yaqa 1600 watapim Bibliata qellqarqaku yaqa 40 runakuna, ichaqa llapankupa qellqasqankum allintapuni tupan imamanta yachachisqanwan. ¿Imaynatam chayna qellqayta atirqaku? Kikin Diospuni guiasqanraykum. (Leey 2 Samuel 23:2.)

Wakin kutipiqa Biblia qellqaqkunatam Diosqa guiarqa angelnintakama rimaspan, visionpi qawachispan otaq mosqochispan ichaqa yaqa sapa kutim tanteasqanta umankuman churarqa imayna rimasqanku palabrakunawan qellqanankupaq. (Leey Apocalipsis 1:1; 21:3-5.)