IMANASQATAQ WAKINQA ISKAYRAYANKU: Wakinmi piensanku huchallikuq kasqankurayku Diosqa runakunapi mana reparasqanta. Sapa kutilla hukmanyasqa tarikuq Kendra sutiyoq warmim imatapuni ruwananpaq Diospa kamachisqanta mana cumpliyta atispan pesapakurqa, chaymi tanteakurqa Diosta manaña mañakunanpaq.

IMATAM BIBLIAQA YACHACHIN: Ninmi: “Payqa yachanmi imamanta rurasqa kasqanchikta. Payqa yuyanmi allpamanta rurasqa kasqanchikta”, nispa. (Salmo 103:10, 14). Chaywanmi cuentata qokunchik imayna kasqanchikmanta Dios yachasqanta. Huchallikusqanchikmantaqa manam chayllachu castigawanchik, wanakuptinchikqa llakipayawaspanchikmi pampachaykuwanchik.

Ñawpa tiempopi rey Davidpas Diosmantam nirqa: “Sulluchallaraq kachkaptiymi rikuwarqankiña ñoqataqa. [Libroykipim cuerpoypa partechankunaqa qellqasqaña karqa, NM]. Diosnilláy, qawapaykuspayá sonqollayta reqsiykuy”, nispa (Salmo 139:16, 23). Davidqa wakin kutipiqa hatun huchakunamanmi urmarqa, ichaqa manam iskayrayarqachu tukuy sonqonwan wanakusqanmanta Jehova Dios pampachaykusqanmantaqa.

Jehova Dios hinaqa manam pipas entiendewanchikchu. Paymantam Biblia nin: “Runaqa qawan hawallantam, ñoqam ichaqa qawani sonqonta”, nispa (1 Samuel 16:7). Diosqa yachanmi nacesqanchikmantapacha herenciata hina tayta-mamanchikmanta ima mana allintapas chaskisqanchikman hina sasachakusqanchikta, imayna uywasqa hinaspa pikunawan wiñasqanchikman hina imayna runa kasqanchiktapas. Ichaqa reparantaqmi pantaq kaspapas allin runa kanapaq kallpanchakusqanchikpi.

Chaynata reqsiwaspanchikqa, ¿imaynatam Diosqa qamtapas consuelasunkiman?