Leipzig llaqtapim nacerqani, chayqa karqa República Democrática Alemania nisqankupim, Polonia hinaspa República Checa nacionpa hichpanpi. 6 watachaypi kachkaptiymi taytaypa llamkayninrayku Brasilman rirqaniku chaymantañataq Ecuadorman.

14 wataypi kachkaptiymi tayta-mamayqa Alemaniaman estudianaypaq kutichiwarqa. Chaymi paykunamanta karupi kasqayrayku, sapallay vida pasayta yacharqani. Chaywanmi munaysapa rikurirurqani, ruwasqaywan hukkuna imayna sientekusqankutaqa manam kaqpaqpas hapirqanichu.

17 wataypiña kachkaptiymi tayta-mamayqa Alemaniaman kutimurqaku. Qallariypiqa paykunawanmi yacharqani, ichaqa munasqayman hina kawsaq kaspaymi controlawasqankuta mana aguantaspay 18 wataypi wasiymanta pasakurqani.

Manam imapas gustoypaqchu karqa, chaymi imapaq kawsakusqaymanta yachayta munarqani. Huk niraq piensaq runakunamantam astawan yacharqani, chaymantam tantearurqani kay sumaq Pachata runakuna manaraq yanqachachkaptinku reqsinaypaq.

Motota rantiruspaymi Alemaniamanta África lawman pasakurqani. Ichaqa pisi tiempollamantam motoy malograkuruptin Europa lawman kutimurqani. Allicharuspaymi Portugal nacionpi lamar qochapa patanman pasakurqani. Chaypim tantearurqani motopi rinaymantaqa barcopiña tukuy hinastinman viajanaypaq.

Chaypaqmi, Atlántico sutiyoq lamar qochanta pasanankupaq alistakuq mozo-sipaskunaman hukllawakurqani. Chaypim reqsirurqani Laurie sutiyoq sipasta, tiempo pasasqanman hinam paywan casarakururqani. Hinaspam islas del Caribe nisqankuman barcopi rirqaniku. Chaymantam Puerto Rico nacionpi samaykuspa Europa lawman kutirqaniku. Lauriewanmi taksa barcota rantiruspa chaypi wasichakuyta munarqaniku. Chayta kimsa killaña maskachkaptiykum Alemaniapi soldado kanaypaq hapiruwarqaku.

Wata kimsa killanmi soldado karqani, chay tiempopitaqmi Lauriewan casarakurqaniku. Hinallam tukuy lawman  viajayta munarqaniku. Chaypaqmi manaraq soldado kachkaspay huk boteta rantirurqaniku, chaytam soldado kasqay tiempopi karuta rinapaq hina pisi-pisimanta allicharqaniku. Chaypi yachastin tukuy hinastinpi puriytam munarqaniku. Soldado kasqaymanta lloqsiramuspay botepa hawanpi wasichakuyta manaraq tukuchkaptiykum Jehova Diospa testigonkuna rimapayaykuwarqaku, chaypim Biblia estudiayta qallaykurqaniku.

Qallariypiqa, viday mana llumpay cambianantam piensarqani, puñuqmasiy warmiwanqa casarasqañam karqaniku, cigarro pitaytapas saqerurqaniñam (Efesios 5:5). Diospa tukuy ima unanchasqanta reqsinaypaq tiempochakusqayqa vidaypi ancha allin kasqantam piensarqani.

Ichaqa cambianayraqmi karqa, hinallamá hatun tukuq, munasqayman hina imapas ruwaq, imapas ruway yachasqaymanta alabakuq hinaspa kikillayta kuyakuq karqani.

Huk kutipim Jesuspa Ancha Reqsisqa Yachachikuyninta Bibliapi leerqani Mateo 5-7 capitulonkunapi. Chaypim Jesuspa nisqanwan admirakurqani, nirqam yarqachikuqkunawan yakunayachikuqkuna kusisqa kasqankumanta (Mateo 5:6). Chaymi piensarqani, ¿imaynamá yarqaymantawan yakumanta kaqkunaqa kusisqa kanmanku?, nispay. Ichaqa Bibliamanta yachasqayman hinam cuentata qokururqani Diosta necesitasqanchikmanta. Jesusmi nirqa: “Mayna kusisqam ‘Diostam necesitani’ niqkunaqa”, nispa (Mateo 5:3).

Señoraywanmi Biblia estudiayta qallaykurqaniku Alemaniapi, chaymantam Franciaman hinaspa Italiaman rirqaniku. Chay nacionkunapipas karqam Jehova Diospa testigonkunaqa. Kuyanakuyninku hinaspa huk sonqolla kayninkum admirachiwarqa. Maylaw nacionmanta kaspankupas wawqe-panintin hina kasqankutam qawarqani (Juan 13:34, 35). Tiempopa risqanman hinam bautizakurqaniku.

Testigoña kaspaypas hinallam imayna kayniyta cambianay karqa. Señoraywanmi Africa lawninta Estados Unidosman lamar qochanta rinaykupaq tantearurqaniku. Chaypim lamar qochapa chawpinpi sapallayku tarikuspayku, cuentata qokurqani Tukuy Atiyniyoq Diospa qayllanpiqa uchuychalla kasqanchikmanta. Chaypiqa manam anchachu kaq ima ruwanapaqpas chaymi Bibliata leenaypaq tiempoyta servichikurqani. Jesuspa vidanmanta leesqaymi astawan yuyaymanarichiwarqa. Payqa mana pantaq chaynataq atiyniyoq kaspanpas mana hatunchakuqmi karqa, kikillanpi piensananmantaqa Taytanpim astawan piensarqa.

Diostaqa manamá puchuwasqanchik tiempollawanchu servinanchik manachayqa tukuy tiemponchikwanmi, Jesuspa ruwasqankunapi yuyaymanaspaymi chaymantaqa cuentata qokururqani (Mateo 6:33). Chaymi Estados Unidosman chayaruspayku botechaykuta saqeruspa Jehova Diosta astawan servinaykupaq tantearurqaniku.

Kikillayta kuyakuq kaptiyqa iskayrayaqmi kani imapas tanteasqaymantaqa. Kunanqa Diospa yachachisqanman hinam allinta tanteakuni (Isaias 48:17, 18). Diosta yupaychasqaywan, hukkunaman paymanta yachachisqaymi anchata kusichiwan.

Bibliapi yachachikuykunata kasukusqaykuwanmi casado vidaykupipas kusisqa kawsakuniku. Jehova Diosqa qoykuwankutaqmi kuyayllapaq warmi churiykutapas, paypas tukuy sonqonwanmi Jehova Diosta servichkan.

Wakinpiqa sasachakuypim karqaniku. Ichaqa Jehova Diosqa manam saqewarqakuchu. Chaymi tanteakuruniku tukuy sonqoykuwan payllapi hapipakunaykupaq (Proverbios 3:5, 6).