Hungría nacionpi Székesfehérvár kaq llaqtachanpim nacerqani chay nacionqa waranqa watayuqñam chaypim pasarqa mana qunqanapaq allin kaqkuna hinaspa mana allin kaqkuna. Umaypiraqmi kachkan enteron pachapi iskay kaq hatun guerrapi tukuy ima qawasqay.

Abueloykunawanmi wiñarqani. Kuyakuywanmi paykunata yuyarini astawanraqmi Elisabeth abuelaytaqa, paymi Diospi iñinaypaq yanapawarqa. Kimsa watachaymantam padre nuestro oracionta sapa tuta mañakunaypaq yachachiwarqa. Chay mañakuypi ima ninantaqa yaqa 30 wataypiñam yacharurqani.

Abueloykunam uywawarqa tayta-mamay tuta-punchaw huk wasita rantinankupaq llamkasqankurayku. Ichaqa, killapi iskay sabado punchawninkunapim huñunakuq kaniku chaypim kuska mikurqaniku chayqa mana qunqanapaqmi karqa.

1958 watapim tayta-mamayqa wasita rantirurqaku. Paykunawan kuska yachanaymantam kusisqa tarikurqani​, ichaqa manam unaypaqchu kusikusqayqa karqa, suqta killa pasayllatam cancer unquywan taytay wañukurqa.

Llumpay llakisqa kaspaymi Diosta niq kani: “Taytay mana wañunanpaqtaq mañakurqayki ¿imanasqataq manaqa uyariwarqankichu? ¡Paywanmi kayta munani!”, nispa. Taytay maypi kasqantam yachayta munarqani. Chaymi tapukurqani: “¿Hanaq pachamanchu ripukun icha wiñaypaqchu wañukun?”, nispa. Warmakuna taytanwan kasqankuta rikuspaymi llakikuq kani.

Achka watam sapa punchaw panteonman riq kani. Taytaypa pampakusqan ñawpaqninpi qunqurakuspaymi Diosta mañakuq kani: “Dios taytalláy, taytay maypi kasqantam yachayta munani”, nispa. Mañakurqanitaqmi imapaq unanchasqa kasqanchikmanta entiendeykachiwananpaqpas.

13 wataypim alemán rimayta yachanaypaq tantearurqani, chaynapi libronkunata leespa tapukuyniymanta yachanaypaq. Chaymi 1967 watapi Jena llaqtaman rirqani, chayqa  karqa ñawpaq Alemania oriental nisqapim kunanqa Alemania sutillawanñam sutichakun. Llapa qillqakunatam chaylla leerurqani astawanraqmi imanasqa kawsasqanchikmanta rimaq qillqakunataqa. Mana yachasqaykunamanta leeruspaypas manam tarirqanichu yachay munasqaymantaqa, chaymi Diosta hinalla mañakurqani.

Hungría nacionmanmi 1970 watapi kutikurqani chaypim Rose sutiyuq sipaswan riqsinakuspayku casarakurqaniku. Chay watakunapim Hungría nacionqa comunista gobiernopa makinpi kachkarqa chaymi casarakusqayku qipallaman tantearurqaniku Austria nacionman lluptispayku Australia nacionpa Sydney llaqtanman chayanaykupaq, chaypim tioy yacharqa.

Austria nacionman chayaruspaymi pisi tiempollapi llamkayta tarirurqani. Huk punchawmi llamkaqmasiy niwarqa lliw tapukuyniyta bibliapi tarinaymanta chaymi bibliamanta yachachiq iskay qillqakunata quykuwarqa. Chaylla leeruspaymi hinalla astawan yachayta munarqani chaymi chay qillqakuna ruwaq Jehova Diospa testigonkunaman cartata apachirqani qillqakunata apachimuwanankupaq.

Casarakusqaykumanta wata pasaruptinmi, Jehova Diospa testigon huk mozo mañakusqay qillqakunata aparamuwarqa hinaspapas bibliamanta yachachiwananpaqmi niwarqa. Chayllam arí nirqani, chaymi semanapi iskay kutita estudiarqaniku ¡sapa estudiasqaykum tawa horapuni karqa!

Jehova Diospa testigonkuna bibliamanta yachachiwasqankum llumpayta kusichiwarqa. Húngaro bibliaypi Diospa sutinta qawaykachiwaptinkum anchata admirakurqani. 27 watam iglesiaman rirqani ichaqa manam haykallapipas Diospa sutin Jehova kasqantaqa uyarirqanichu. Bibliapi sapa tapukuyniyta yachasqaywanmi ancha kusisqa tarikurqani. Huknin yachasqaymi karqa wañuqkuna mana imatapas ruwasqankumanta hinaspa puñusqa hinalla kasqankumanta (Eclesiastes 9:5, 10; Juan 11:11-15). Yacharqanitaqmi kay allpa pacha sumaq huerta kananmanta chaypiqa ‘manañam wañuypas kanqachu’ (Apocalipsis 21:3, 4). Kunanqa manañam iskayrayanichu wañuqkunata ‘hamuq punchawpi Dios kawsarichinanmantaqa’, chaypiqa kaqmantachá taytaywanqa tupaykusaq (Hechos 24:15).

Warmiymi tukuy sunqunwan yanapawarqa. Iskay killallapim Jehova Diospa testigonkunawan estudiayta tukururqaniku. Huñunakuyninkunamanpas mana faltakuspaykum rirqaniku, paykuna kuyakuqllaña, allin chaskikuq hinaspa huk sunqulla kawsakusqankum admirachiwarqaku (Juan 13:34, 35).

1976 watapim Australia nacionman astakunaykupaq papelta hurqururqaniku. Chayaruspallaykum maskarqaniku Jehova Diospa testigonkunata, paykunañataqmi kuyakuywan chaskiwaspanku wasiykupi hina sientechiwarqaku. 1978 watapim bautizakurqaniku Jehova Diospa testigon kanaykupaq.

Unay wata tapukusqaykunapa kutichiynintam yacharurqani. Tarirurqanitaqmi pi taytamantapas aswan allin taytata, payqa Jehova Diosmi (Santiago 4:8). Suyachkanitaqmi Diospa prometesqan musuq pachapi taytay kawsarimuptin paywan tupaykuytapas (Juan 5:28, 29).

1989 watapim Hungría nacionniykuman kutirqaniku aylluykuman, amistadniykuman hinaspa huk runakunamanpas Diosmanta willanaykupaq. Pachaknintin runakunamanmi yachachirqaniku, paykunamantam Jehova Diospa testigonkuna kanankupaq qanchis chunka bautizakurqaku, hukninmi karqa kuyasqay mamay.

Tapukuyniykunamanta yachanaypaqmi 17 wata Diosta mañakurqani. Mañakusqay uyariwasqanmantaqa 39 watañam pasarun, chayna kaptinpas Diostaqa hinallam mañakuchkani ichaqa kunanqa kaynatañam nini: “Gracias kuyasqay taytalláy, mozo kasqaymanta mañakusqayta uyariwasqaykimanta”, nispa.