Acul sutiyuq karu llaqtachapim nacerqani, chayqa kachkan Guatemala nacionpim. Ñuqawan aylluykunaqa ixiles nisqanku castamantam kaniku, maya castakunapa mirayninmanta. Castellanota rimaspaypas llaqtamasiykunapa rimasqanku rimaytapas rimanim. Wañuchinakuy tiempopim ñuqaqa wiñarqani, chayqa 36 watapunim karqa. Chay tiempopim achka llaqtamasiykuna wañururqaku.

Suqta watachaypi kachkaptiymi qanchis watachayuq wawqiy pukllaspan piña nisqanku bombata tuqyarachirqa, hinaptinmi ñawsa qiparurqani mayorniyñataqmi wañururqa. Chaymantam pusawarqaku ñawsakunapaq Guatemalapi escuelaman, chaypim yacharurqani makillaywan leeyta (braille). Chaypiqa profesorkunam warmachakunawan rimanayta mana munarqakuchu, warmachakunapas manataqmi asuykamuwaqkuchu, imanasqa chayna kasqankumantaqa manam yachanichu. Sapallaymi kaq kani, chaymi anchata munaq kani mamaywan iskay killa kanaypaq tiempo chayaramunantaña, payqa anchatam kuyawarqa. Ichaqa mamaymi wañukurqa 10 watallaypiraq kachkaptiy, chaywanmi llumpay llakisqa qiparurqani.

11 wataypi kachkaspaymi llaqtayman kutirqani taytallaymanta kaq wawqiypa wasinpiña tiyapakunaypaq. Imapas pisipuwaqniyta quykuwaptinpas sunquypi llakisqa kayniytaqa manam imawanpas tiyachiyta atirqanichu. Chaymi Diosta niq kani: “¿Imanasqamá mamay wañurunantaqa saqirqanki? ¿Imapaqmá kayna ñawsataqa kawsachiwanki?”, nispay. Runakunam niwaqku: “Kayna sasachakuypiqa kachkanki Dios munasqanraykum”, nispa. Chaymi piensarqani Diosqa mana llakipayakuq kasqanta, atispayqa wañurachikuymanmi karqa.

Ñawsa kasqayraykum llumpay ñakariypi tarikurqani. Warmallaraq kachkaptiymi achka kutipi violawarqaku. Manam pimanpas willakurqanichu mana valeqpaq qawawasqankuta piensaspay. Wakillanpim pipas rimapayawaq. Llumpay hukmanyasqam tarikurqani, mana allinkunata ruwawasqankuraykum piwanpas rimayta manchakuq kani.

13 wataypi kachkaptiymi warmi-qari testigokuna Diosmanta willawarqaku escuelaypa recreonpi. Llakipayawaqniy profesoraysi paykuna hamuspa parlapayawananpaq nimusqa. Paykunam bibliapa nisqanman hina willawarqaku ñawsakuna qawarikunankumanta chaynataq wañusqakuna kawsarimunankumanta (Isaias 35:5; Juan 5:28, 29). Willawasqankuqa gustawaqmi, ichaqa piwanpas mana ancha rimaq kasqayraykum upallalla uyariq kani. Chayna mana ancha rimariq kaptiypas, hinallam pacienciakuykuspanku bibliamanta yachachiwaqniy hamuqku. Karumantaraqmi (10 km.) llaqtayman hamuqku.

Wawqiymi willawarqa paykunaqa wakcha kaspankupas allin pachasqa hamusqankumanta. Musyarqanim kuyawasqankuta imachatapas quykuwasqankuwan. Yanapawanankupaq ancha kallpanchakusqankuta musyasqaywanmi mana iskayrayarqanichu paykunaqa ciertotapuni Dios yupaychaq kasqankumanta.

Bibliatam estudiarqani braillepi kaq qillqakunawan yanapachikuspa. Allintam entienderqani imamanta yachachiwasqankutaqa. Ichaqa sasatam creerqani Dios kuyapayawasqanpiqa. Estudiasqayman hinam entienderurqani imanasqa sasachakuykuna kanapaq saqisqanta, chaywanpas manam kuyakuq taytata hinaraqchu qawarqani. *

Ichaqa Bibliata estudiasqayman hinam yacharurqani Jehova Diosqa ñakarisqanchikta qawamuspan anchata llakikuwasqanchikmanta. Bibliapim willakun yupaychaqninkuna ñakarichisqankuta qawamuspan ima nisqanmanta: ‘Qawachkanim [...] runaykunapa ñakarisqanta. Yachanitaqmi nanaypi kallasqankutapas’, nispa (Exodo 3:7). Jehova Diosqa ancha kuyakuq kasqanmanta yacharuspaymi paypa munayninta ruwanaypaq 1998 watapi bautizakurqani.

Chaymanta yaqa wata pasayllatam Escuintla llaqtaman rirqani ñawsakunapaq yachachikuyta chaskiq. Chay llaqtapim testigokunaman yachachiq iñiqmasiy yacharurqa Acul llaqtapiqa huñunakuyniyman rinaypaq karupiraq kasqanrayku llumpayta sasachakusqaymanta. Chaymi yanapawayta munaspan Escuintla llaqtapi kaq hukkaqnin iñiqmasiykuta nirqa wasinpi samaykachiwaspan chay llaqtapi huñunakuyniykuman pusawananpaq. Chay samaykachiwaqniy iñiqmasiyqa kunankamam churinta hina uywakuwachkan.

Iñiqmasiykunaqa kuyakuywanmi tukuypi yanapaykuwarqaku. Chaywanmi mana iskayrayanichu Jesucristota kasukuspa Jehova Diosta yupaychaq kasqankumanta (Juan 13:34, 35).

Kunanqa manam hukmanyasqañachu tarikuni aswanqa kusisqam kawsakuni. Ñawsa kasqaypi piensanaymantaqa Jehova Diosmanta hukkunaman yachachinaypaqmi astawan kallpanchakuni. Huñunakunayku wasikunapi hinaspa hatun huñunakuyniykupipas Jehova Diosmantam yachachini.

2010 watapim rirqani El Salvador nacionman Solterokunapaq bibliamanta escuelaman, kunanqa chay escuelatam sutichanku Diospa gobiernonmanta willakuqkunapaq escuela nispaña. Chay escuelapi yachamusqaykunam Diosmanta allinta yachachinaypaq yanapawan. Chaypi yachamusqaywantaqmi cuentata qukuni Jehova Dios anchata kuyawasqanmanta, payqa pitapas valekunmanmi munayninta ruwananpaqqa.

Jesucristom nirqa: ‘Imapas chaskiqmantaqa aswan kusisqaqa imapas quqmi’, nispa (Hechos 20:35). Kunanqa ancha kusisqam tarikuni hukkunaman Diosmanta yachachisqaywan.