Jehova Diosqa manam santokunanchiktaqa munanchu, chaymi Jehova Diospa testigonkunaqa mana santokunikuchu. Bibliapi mana santokunapaq mana kamachiptinpas bibliata leespanchikmi yachanchik santokuyqa Diospaqqa mana allin kasqanta. Chaymanta astawan kaypi yachaykusunchik.

1.   Santokuyqa qallarirqa pantay religionkunapi yachachisqankuwanmi. Huk qillqam nin: “Santokunkuqa mana allin espiritukuna mana imanananpaqmi, chaynapi achka runakunawan kuska kaptin mana allin espiritukuna mana imanananpaq”, nispa (Funk & Wagnalls Standard Dictionary of Folklore, Mythology, and Legend). Huk qillqapim willawanchik, pipas naceptinqa killata lucerokunata qawaspanku imayna suerteyuq kanankumanta yachasqankuta. Hina chay qillqapitaqmi nin: “Santokusqanku punchawpi velata ratachispanku pukusqankuqa imapas munasqanku cumplikunanpaqmi”, nispa (The Lore of Birthdays).

    Diosqa manam munanchu imatapas yachayta munaspa magia ruwaqkunata, adivinaqkuta, brujokunata tapukunanchiktaqa (Deuteronomio 18:14; Galatas 5:19-21). Ñawpaq tiempopi Babilonia llaqtayuqkunatapas suertenkuta yachanankupaq killata, lucerokunata qawaspanku adivinasqankuraykum Jehova Diosqa castigarurqa (Isaias 47:11-15). Jehova Diospa testigonkunaqa manam maymanta ima fiestata rikurimusqanta yachanaykupaqchu afanakuniku, ichaqa munanikum imapiñapas Jehova Diosta kasukuyta.

2.   Apostolkunapa tiemponpi Diosta serviqkunapas manam santokuqkuchu. Huk qillqapa nisqanman hinaqa, apostolkunapa tiemponpi Diosta serviqkunaqa, yacharqakum santokuyqa pantay religionpi yachachisqanman hina kasqanmanta chaynataq Diosta mana serviq runakunapa costumbrenkuman hina kasqanmanta (The World Book Encyclopedia). Bibliapim willawanchik Jesus kay pachapi kachkaspan apostolninkunaman chaynataq qatiqninkunaman imayna kawsakunankupaq yachachisqanta. Chaytam ñuqanchikpas kasukunanchik (2 Tesalonicenses 3:6).

3.   Bibliapiqa kamachiwarqanchik Jesuspa wañukusqallanta yuyarinanchikpaqmi manam nacesqanta yuyarinapaqchu (Lucas 22:17-20). Bibliapiqa ninmi: “Runapa nacesqan punchawmantapas aswan allinqa wañukusqan punchawmi”, nispa (Eclesiastes 7:1). Jesus kay pachapi kaspanqa Jehova Diosta kasukuspanmi allinkunata ruwarqa, chaymi wañukusqan punchaw aswan allin karqa nacesqan punchawmantaqa (Hebreos 1:4).

4.   Bibliapiqa manam ninchu Diosta serviqkuna santokusqankumantaqa. Ichaqa ninmi Diosta mana serviq iskay runakuna santokusqankumanta. Bibliaqa nintaqmi chay santonkupi runata wañuchisqankumanta (Genesis 40:20-22; Marcos 6:21-29).

 Jehova Diospa testigonkunaqa warmachankutam anchata kuyanku, chaymi ima punchawpipas imatapas rantipunku utaq regalanku. Paykunaqa Jehova Diostam qatipakunku. Jehova Diosqa sapa punchawmi imatapas quwanchik (Mateo 7:11). Qatiqninpiyá yachaykusun Jehova Diospa testigonkunapa warmachankuna cumpleaño ruwaymanta utaq santokuymanta ima nisqankuta:

•   12 watanpi kaq Tammy sutiyuq warmacham nin: “Ima punchawpipas tayta-mamay regalota quwasqanwanmi anchata kusikuni”, nispa.

•   11 watanpi kaq Gregory sutiyuq warmacham nin: “Tayta-mamayqa manam nacesqay punchawpichu regalota quwan, paykunaqa ima punchawpipas quykuwanmi chayqa anchatam kusichiwan”, nispa.

•   6 watachanpi Eric sutiyuq warmacham nin: “Huk warmachakunapa santonpiqa tortata mikunallankupaqmi takinku, chayqa manam gustawanchu. Wasiypi imay punchawpipas warmamasiykunawan huñunakuspayku imatapas ruwasqaymi gustawanqa”, nispa.