Jehova Diospa testigonkunaqa anchatam kallpanchakuniku wasiykupi kaqkunawan hawkalla kawsakunaykupaq, chaynata kawsakunankupaqmi runamasiykumanpas yachachiniku. Chaynata kawsakunaykupaqmi kallpanchakuniku Jehova Diosta kasukusqaykurayku (Genesis 2:21-24; Efesios 3:14, 15). Bibliapi yachachikuykunaqa may law nacionpi tarikuptinkupas yanapanmi casado vidankupi kusisqa kawsakunankupaq.

 Kallpanchakunikum bibliapi yachachikuykunata kasukunaykupaq, chayqa yanapawankum allin tayta-mama kanaykupaq hinaspa warmi-qaripas kusisqa kawsakunaykupaq (Proverbios 31:10-31; Efesios 5:22–6:4; 1 Timoteo 5:8). Bibliapi yachachikuykunaqa yanapawankutaqmi qusayku utaq warmiyku Jehova Diosta mana yupaychaptinpas hawkalla kawsakunankupaq (1 Pedro 3:1, 2). Qatiqninpiyá qawasun warmin utaq qusan testigoña karuspanku ima nisqankumanta:

•   Huk runam nirqa: “Casarakusqaykumantapacham suqta wataña casado vidakuypi mana allinta kawsarqaniku, chaywanmi hukmanyasqa tarikurqaniku. Ichaqa warmiy Ivete Jehova Diospa testigon karuspanmi llampu sunquyarurqa. Chayna kasqanwanmi kunanqa kusisqaña kawsakuniku”, nispa (Clauir, Brasil).

•   Huk warmipas nirqam: “Jehova Diospa testigonkunawan biblia estudiayta qusay qallaykuptinmi harkakurqani, piensarqanim testigokunaqa ayllukunata rakinachisqanta. Ichaqa tiempo risqanman hinam musyakururqani bibliapi yachachikuykunaqa casado vidaykupi yanapawasqankumanta”, nispa (Agness, Zambia).

 Diosmanta willakuspaykuqa yachachinikutaqmi ayllunku ukupi bibliapa yachachisqanman hina kawsakunankupaq. Qatiqninpiyá qawasun imakunapi yanapawasqanchikmanta:

•   Allin qarita utaq warmita maskanamanta

•   Chayllaraq casarasqa kaqkunapa sasachakuyninkumanta

•   Suegrowan utaq suegranwan allinlla kawsakuymanta

•   Qullqita mana usuchiymanta

•   Mana atipanakuymanta

•   Pampachanakuymanta

•   Wawa-churita allinta uywanamanta

 Wakinpiqa sasachakuypim tarikunku. 1998 watapim, huk willakuy qawachirqa 20 casarasqa warmi-qarikunamanta hukllan testigo kasqanrayku sasachakuypi tarikusqanmanta (empresa de investigación Sofres).

 Jesusmi nirqaña wakinpiqa ayllullanchikwan sasachakuypi tarikunanchikmanta (Mateo 10:32-36). Ñawpa tiempopi Roma nacion imayna kasqanmanta yachaq runapas nirqam: “Jesucristopi iñiqkunatam tumparqaku casado vidata yanqachaq kasqankumanta” a, nispa (Will Durant). Kunan tiempopipas testigokunatam wakin kutipiqa tumpawanku ayllukunata chiqninachisqaykumanta. Ichaqa, ¿chaynachu kanman?

 Testigokunamanta chayna rimasqanku yanqa kasqanmantam ancha riqsisqa juezkuna nirqaku: ‘Yaqa llapanpim testigo kaqta ñakarichinku imapi iñisqanta mana respetaspanku mana testigo kaq ayllukuna’, nispa. Chaymantapas chay juezkunaqa nirqakum: ‘Ayllukunaqa may law nacionpi kaspankupas hukkaqninku huk religionpi kaptinqa sasachakunkum, manam testigokunallachu sasachakunkuqa’ b, nispa (Tribunal Europeo de Derechos Humanos). Ichaqa sasachakuypi tarikuspaykupas testigokunaqa kallpanchakunikum bibliapa kayna nisqanta kasukunaykupaq, ninmi: ‘Runakuna mana allinta ruwasuptikichikqa amayá chaynatachu kutichiychik. [...] Atisqaykichikman hinayá imatapas ruwaychik llapallanwan hawkalla kawsanaykichikpaq’, nispa (Romanos 12:17, 18).

 Testigokunaqa Diospa kamachisqantam kasukuniku, bibliapim nin ‘señorpi iñiqllawan’ utaq testigomasillaykuwan casarakunaykupaq (1 Corintios 7:39). Chay kamachikuyta kasukuyniykuqa allinniykupaqmi. 2010 watapim huk qillqa nirqa: ‘Warmi-qari huk religionllapi kaspankuqa hawkallam kawsakunqaku’ c, nispa (Journal of Marriage and Family).

 Pipas casarakusqan qipataña testigo kaptinqa, manam kallpanchanikuchu mana testigo kaq qusanmanta utaq warminmanta rakikunanpaqqa. Bibliam nin: ‘Huk kaq wawqipa warmin kanqa Diospi mana iñiq ichaqa hawka yachakunqa paywan hinaptinqa amayá rakikuchunchu. Chaynataq huk kaq warmipa qusan kanqa Diospi mana iñiq, ichaqa hawka yachakunqa paywan hinaptinqa amayá rakikuchunchu’, nispa (1 Corintios 7:12, 13). Ñuqaykupas chay kamachikuytam kasukuniku.