Jehova Diospa testigonkunaqa manam sectachu kaniku. Jesucristota kasukuspam paypa yachachisqanman hina kawsakunaykupaq kallpanchakuniku.

 Wakin religionkunata imanasqa secta nisqankumantayá qatiqninpi yachasun. Chaywanmi musyakusun testigokunaqa imayna religion kasqankumanta.

•   Wakin religionkunatam secta ninku riqsisqa religionkunamanta rakikusqankurayku. Testigokunaqa manam rakikurqanikuchu mayqin religionmantapas. Ñuqaykuqa apostolkunapa tiempopi iñiqkuna hinam Jehova Diosta yupaychaniku, chay yachachikuykunaqa bibliapim kachkan (2 Timoteo 3:16, 17). Chaymi kallpanchakuniku bibliapi yachachikuykunaman hina Diosta yupaychanaykupaq.

•   Wakin religionkunatam secta ninku yachachiqninku runata qatikusqankurayku chaynataq mana allinkunata ruwasqankurayku. Testigokunaqa manam yachachiqniyku runakunatachu qatikuniku aswanqa Jesucristotam, paymi nirqa: ‘Ñuqa Cristollam maestroykichikqa kani’, nispa (Mateo 23:10).

 Testigokunaqa kallpanchakunikum kikiykupaqpas chaynataq runamasiykupaqpas allin kaqkunata ruwanaykupaq. Diosmanta yachachisqaykuwanmi achka runakunata yanapaniku mana allin kawsakuyninkuta saqinankupaq. Chaymantapas enteron pachapim wara-waranqantin runakunaman leeytawan qillqayta yachachiniku. Yanapanikutaqmi terremotowan utaq imawanpas llumpay sasachakuypi kaqkunata. Jesuspa yachachisqanman hinam anchata kallpanchakuniku runamasiykupaq allin kaqkunata ruwanaykupaq (Mateo 5:13-16).