Lliw yachachikuyniykum bibliapa nisqanman hina. Chaymi bibliata suma-sumaqta leeruspayku aswan allinta entienderuspaykuqa mayqin yachachisqaykutapas cambianiku. a

 Proverbios 4:18 nisqanpim nin: “Allin ruwaqkunapa imapas ruwasqanmi ichaqa achikyaqta kanchariq achki hina, inti qispiramuspan punchawyanankama aswan-aswan kanchariq hinam”, nispa. Imaynam achikyamuptin inti qispimusqanman hina imapas allintaña qawakun, chaynam yachachikuyninkunatapas pisi-pisimanta serviqninkunaman Jehova Dios tiempollanpi yachachiwanchik (1 Pedro 1:10-12). Bibliapiqa nirqataqmi “tukupay punchawkunapiqa” Diospa sumaq yachachikuyninkunata aswan allintaraq yachanamanta (Daniel 12:4).

 Yachachikuykuna cambiasqanwanqa manam hukmanyananchikchu nitaq preocupakunanchikchu. Ñawpaqpi Diosta serviqkunapas Diosmanta yachachikuykunataqa manam imam kaqtachu entienderqaku, chaymantam ichaqa aswan allintaña entienderurqaku hinaspam imam piensasqankuta cambiarqaku.

•   Israel runakunatam Moises salvayta piensarqa manaraqpas tiemponpi, 40 wata pasaytañam Jehova Diosqa chayta ruwananpaqqa kamachirqa (Hechos 7:23-25, 30, 35).

•   Bibliapiqa nirqañam Cristo wañunanmanta hinaspa kimsa punchawmanta kawsarimunanmanta, apostolninkunam ichaqa mana sumaqtachu entienderqakuchu (Isaias 53:8-12; Mateo 16:21-23).

•   Apostolkunapa tiemponpi Diosta serviqkunamanta wakinmi nirqaku: “Jehova Diospa punchawninqa kaypiñam”, nispanku. Chay nisqankuwanqa pantaypim kachkarqaku (2 Tesalonicenses 2:1, 2).

 Chay tiempopiqa serviqninkunatam Diosqa pisi-pisimanta entiendechirqa. Kunan tiempopipas yachachikuyninkunata entiendechiwananchikpaqmi Diosta mañakunchik (Santiago 1:5).