Arí. Jehova Diospa testigonkunaqa hatun ñakariykuna kasqan lawkunaman rispaykum, iñiqmasiykuta hinaspa huk runakunatapas yanapaniku. Galatas 6:10 nisqanman hinam ruwaniku ninmi: “Atispaqa lliwtayá yanapasun, aswan llapanmanta llalliriqtaqa iñiqmasinchikkunata”, nispa. Chaymantapas, sasachakuypi tarikuspanku llakisqa hinaspa manaña llumpay hukmanyasqa kanankupaqmi runakunata yanapaniku (2 Corintios 1:3, 4).

 Hatun ñakariy pasaruptinñam chay llaqtamanta kaq ancianokuna llapa iñiqmasinkunata qayanankupaq kallpanchakunku, imayna tarikusqankuta hinaspa ima munasqankuta yachanankupaqmi chaytaqa ruwanku. Chaymantañam betel wasimanqa willanku imayna tarikusqankumanta hinaspa imayna yanapakusqankumantapas.

 Sichu huk llaqtakunamanta Jehova Diospa testigonkuna sasachakuypi tarikuq iñiqmasinkunata manaña yanapayta atiptinkuqa, Jehova Diospa testigonkunapa enteron pachapi Diospa llaqtanpi punta apaqkunam tanteananku imayna yanapanankupaq. Chaymi betel wasimanta cuentallikuqkuna chay sasachakuykunata qawanankupaq akllanku encargakuqkunata, hinaspapas huk llaqtakunamanta testigokunam tiempochakunku yanapakunankupaq (Proverbios 17:17).Punta pachak watakunapipas, hina chaynallatam ruwakurqa yarqaypi tarikuq Jesuspi iñiqkunata yanapanankupaq (1 Corintios 16:1-4).

 Runakunapa tukuy sunqunkuwan qullqi qusqankutam Jehova Diospa testigonkunaqa, betel wasiman apachinku wakintam hatun ñakariy kaptin chaypi yanapanankupaq servichikunku (Hechos 11:27-30; 2 Corintios 8:13-15). Chay sasachakuykunapi yanapaqkuna qullqita mana chaskisqankuraykum, chay qullqitaqa servichikunku sasachakuypi tarikuqkunata astawan yanapanapaq, chaymantapas allin tanteowanmi servichikunku (2 Corintios 8:20).