Canada nacionpi kaq Calgary sutiyuq llaqtapim nacerqani. Warmachallaraq kachkaptiymi tayta-mamay divorciakururqaku, chaymi mamaypiwan yacharqaniku abuelitoykunapa wasinpi. Paykunaqa anchatam kuyawaqku, chaypiqa hawkam hinaspa kusisqam kawsakurqani. Chay watakunataqa manam qunqanichu.

 Qanchis watachayuq kachkaptiymi viday cambiarurqa. Mamaymi papaywan kaqmanta casarakururqa, chaymi Estados Unidos nacionpi kaq San Luis llaqtaman ripukurqaniku. Kamasmi cuentata qukururqani manchakuypaq genioyuq papay kasqanta. Huk kutipim escuelaymanta kutiramuptiy yacharurqa warmamasiykuna maqaramuwaptin mana kutichikusqayta. Chaymi piñakuspan paykuna maqawasqanmantapas astawanraq maqaruwarqa. Chaymantam pipas maqawaptinqa kutichikuqña kani, hinaspapas peleaykunapiñam puriq kani.

 Papaypa imayna kasqanqa manam gustaqchu mamaytaqa, yaqa sapa punchawmi qaqchanakuqku hinaspa maqanakuqku. 11 wataypi kachkaspaymi trago tomayta hinaspa drogakuyta qallaykurqani. Aswan maqakuqllaña rikuriruspaymi peleayllapiña puriq kani. Colegioyta tukuruspayqa aswan mana allin runañam karqani.

 18 wataypi kachkaspaymi Estados Unidos nacionpi infanteria de marina nisqanpi soldado kanaypaq yaykurqani. Ñuqaqa maqakuqllañam karqani, ichaqa chaypiñam yacharurqani runa wañuchiyta. Pichqa watam chaypi karqani, chaymantañataqmi ejercitomanta lluqsikuruspay psicologia nisqanta estudiayta qallaykurqani FBI nisqanpaq llamkayta munaspay. Estados Unidospim estudiayta qallaykurqani hinaspam Canada nacionpiña hinalla estudiarqani.

 Universidadpi estudiaspaymi cuentata qukururqani runaqa kikillanpaq munaq kasqanmanta. Piensarqanim imapas yanqa kasqanta hinaspa kay pachapi ima sasachakuykunapas mana allichay atikunanta. Piensarqanimá imapas allin kananpaq runakuna mana ima ruwaytapas atinankumanta.

 Kawsakuyninchik yanqapaq kasqanta piensaspaymi drogakuypi hinaspa trago tomakuypi karqani, hinaspapas qullqillapi chaynataq warmikunawan kakuyllapim piensarqani. Fiestallapim purikuq kani hinaspapas hukwan-hukwanmi kakuq kani. Soldado kasqayraykum piensaq kani pimantapas aswan allin peleaq kasqayta, chaymi ñuqaqa peleollapi kaq kani. Pipas runamasinta ñakarichisqanta qawaspayqa chayllam chay runapa contranpi hatariq kani. Ñuqaqa mana allinkuna ruwaq hinaspa maqakuqllaña runam rikurirurqani.

 Huk kutipim amigoywan drogakuchkarqaniku wasiy ukupi, marihuana nisqa drogata rantikunaykupaqmi alistachkarqaniku. Chaypim amigoy tapuwarqa Diospi creesqaymanta. Ñuqañataqmi nirqani: “Kay pachapi runakuna Diospa huchanrayku ñakariptinkuqa manam Diosmantaqa imatapas yachaytaqa munanichu”, nispay. Paqarinnintintam huk trabajomanña yaykuruptiy llamkaqmasiy Jehova Diospa testigon kasqa. Paymi tapuwarqa: “¿Dioschu huchayuq kanman runakuna ñakarinanpaq?”, nispa. ¡Chayna tapuwasqanqa admirakuypaqmá karqa! Ñawpaqnin punchawllatamá amigoywan chaymanta rimachkarqaniku. Chaymi yachayta munarqani. Suqta killam yachay munasqaykunamanta rimarqaniku, bibliawanmi lliwta yachachiwarqa.

 Chay tiempopi servinakusqayku warmiqa manam Diosmanta willanayta munaqchu. Domingo punchawmi Diosmanta yachachiwanankupaq testigokuna wasiykuman hamunankupaq nisqaymanta willarqani. Paqarinninta llamkaymanta kutimuptiyqa tukuy imanta apakuykuspanmi payqa pasakusqa. Calleman lluqsiruspaymi waqakurqani. Chaymantapas Jehova Diostam ruegakurqani yanapaykuwananpaq. Chay kutipim chayllaraq “Jehova” nispa mañakurqani (Salmos 83:18).

 Iskay punchawmantam warmi-qari testigokunawan bibliata estudiayta qallaykurqani. Pasakuptinkum hinalla chay yachachiwasqanku librota leerqani, chay libroqa karqa Usted puede vivir para siempre en el paraíso en la Tierra niqmi. a Huk tutallapim leeyta tukururqani. Jehova Diosmanta hinaspa churin Jesusmanta yachasqayqa sunquymanmi chayarurqa. Entienderurqanim Jehova Diosqa llakipayakuq kasqanta hinaspa ñakarisqanchik sunqunta nanachisqanta (Isaias 63:9). Ichaqa astawanmi sunquyman chayarurqa Dios kuyawasqanta yacharusqay hinaspa ñuqarayku churinpas wañusqanta yacharusqay (1 Juan 4:10). Cuentatam qukurqani Jehova Diosqa ñuqawan pacienciakuq kasqanmanta, payqa manamá munanchu mayqinninchikpas chinkarunanchiktaqa, payqa munachkan huchanchikmanta llapallanchik wanakunanchiktam (2 Pedro 3:9). Sienterqanim Jehova Diosqa payman asuykunay munasqanta (Juan 6:44).

 Chay semanallam huñunakuyman riyta qallaykurqani. Chukchaypas mana rutusqam karqa, arituyuqtaqmi karqani. Mancharikuypaqmi mana asuykunapaq hina karqani. Jehova Diospa testigonkunam ichaqa unay mana rikusqay aylluykuna hina ñuqawan karqaku. Kuyakuywanmá chaskiykuwarqaku. Paykunawanqa kusisqam tarikurqani, abueloykunapa wasinpi kusisqa kasqaymantapas aswan allinraqmi karqa.

 Manapas unaypim bibliamanta yachasqayman hinaña kawsakurqani. Chukchaytam ruturachikurqani, manañam huchapakuypi purirqanichu, trago tomayta hinaspa drogakuytapas saqirurqanim (1 Corintios 6:9, 10; 11:14). Munarqanim Jehova Diosqa ñuqawan kusisqa kananta. Chaymi imapas ruwasqay mana allin kasqanta yacharuspayqa chaylla saqiq kani. Ñuqaqa pesapakuspaymi nikuq kani: “Manañam kaytaqa ruwasaqñachu”, nispay. Hinaspam chaylla cambiaq kani. Diospa munasqanman hina kawsakusqayraykum as tiempollamanta allinña, hawkaña kawsakurqani. Chaymi 1989 watapi julio killapa 29 punchawninpi Jehova Diospa testigon kanaypaq bautizakurqani, chayqa karqa biblia estudiayta qallaykusqaymanta 6 killa pasayllatam.

 Bibliaqa yanapawarqam genioyta cambianaypaq. Ñawpaqtaqa pipas imatapas niykuwaptinqa chayllam piñakuspay peleaq kani. Kunanqa kallpanchakunim “llapallan runakunawan hawkalla” kanaypaq (Romanos 12:18). Chaytaqa manam sapallayqa atiymanchu karqa, Jehova Diosmi yanapawarqa. Diosqa palabranwanmi hinaspa chuya espiritunwanmi yanapawanchik vidanchikta cambianapaq (Galatas 5:22, 23; Hebreos 4:12).

 Drogakuypi, maqanakuypi, huchapakuypi purinaymantaqa kallpanchakunim Jehova Diospa munasqanta ruwanaypaq hinaspa tukuy sunquywan payta servinaypaq. Chaytaqa ruwani hukkunaman paymanta yachachispaymi. Bautizakusqaymanta qipan watakunallamanmi huklaw nacionman rirqani aslla testigokunapa kasqanpi yanapakunaypaq. Chaypim achka runakunata Diosmanta yachachirqani, hinaspam qawarqani vidankuta cambiaspanku allinña kawsakusqankuta. Kunanqa mamaypas Jehova Diospa testigonñam, chaywanmi anchata kusikuni. Payqa viday cambiasqayta qawaspanmi admirakuspan Diosmanta yachayta munarqa.

 1999 watapim El Salvador nacionpi huk escuelaman rinaypaq invitawarqaku. Chay escuelatam kunanqa ninku “Diospa munaychakuyninmanta willakuqkunapaq escuela” nispa. Chaypim yachachiwarqaku aswan allinta Diosmanta willakunaypaq, huñunakuypi aswan allinta yachachinaypaq hinaspa iñiqmasiykunata yanapanaypaq. Chay watallapim casarakururqani ancha kuyasqay Eugeniaywan. Kunanqa iskayniykum tukuy tiempoykuwan willakuchkaniku Guatemala nacionpi.

 Manañam ninichu “yanqapaqmi imapas” nispayqa, kunanqa ancha kusisqam Diosta servispay kawsakuni. Diospa munasqanman hina kawsakuymi librawarqa mana allin ruwaykunamanta. Kunanqa manañam maqakuqchu kani nitaq huchapakuypi puriqchu. Chaymantapas Diosta servisqayraykum kunanqa hawka hinaspa kuyasqa kawsakuni.