Éxodo 17:1-16
17 Chaymantataq llapa Israel llaqta runakunaqa Sin ch’inneqmanta puririrqanku.+ Jehová Diospa kamachisqanman jinan paykunaqa asta-astakuspa purirqanku.+ Refidin ladoman chayaspataq chaypi karpakurqanku.+ Ichaqa manan chaypiqa unu karqanchu runakuna ujananpaq.
2 Chaypin Israel runakunaqa Moisesta discutiyta* qallarirqanku.+ Nirqankun: “¡Unuta qowayku tomanaykupaq!”, nispa. Moisesmi ichaqa nirqan: “¿Imaraykun noqata discutiwankichis? ¿Imaraykun Jehová Diostapas pruebaman churankichis?”,+ nispa.
3 Israel runakunaqa sinchi ch’akisqan kasharqanku. Chaymi Moisés contra astawanraq rimarqanku,+ nirqankun: “¿Imapaqmi Egiptomanta pusamuwarqankiku? ¿Wawaykutapas uywaykutapas ch’akiymanta wañuchiwanaykikupaqchu pusamuwarqankiku?”, nispa.
4 Chaymantan Moisesqa Jehová Diospa yanapayninta mañakurqan. Nirqanmi: “¿Imatan ruwasaq kay runakunawan? ¡Rumiwan ch’aqewanallankuñan faltashan!”, nispa.
5 Jinan Jehová Diosqa Moisesta nirqan: “Wakin umalliqkunata* pusarikuspa llaqta runakunamanta ñaupariy. Apankin Nilo mayuta waqtasqayki varatapas,+ chay varantinmi ñaupanki.
6 Noqataq Horeb orqopi qaqa patapi sayaykusaq. Chay qaqatan waqtanki, jinan chay qaqamanta unu lloqsimunqa llaqtantin runakuna tomananpaq”,+ nispa. Chaytan Moisesqa ruwarqan Israel llaqta umalliqkunaq ñaupanpi.
7 Chayneqtan Moisesqa suticharqan Masá,*+ Meribá*+ nispa, chaypi Israel runakuna Moisesta discutisqankurayku, Jehová Diostapas pruebaman churasqankurayku.+ Chaypin paykunaqa nirqanku: “¿Noqanchiswanchu Jehová Dios kashan icha manachu?”, nispa.
8 Amalec runakunan+ Refidinman jamurqanku Israel runakunawan maqanakuq.+
9 Chayraykun Moisesqa Josueta nirqan:+ “Wakin runakunata juñuspa Amalec runakunawan maqanakuq rinki. Noqataq paqarin jaqay moqo patata risaq Diospa varanta aparikuspa”, nispa.
10 Chaymi Josueqa Moisespa nisqanman jina+ Amalec runakunawan maqanakuq rirqan. Moiseswan Aaronwan Hurwan+ imataq moqo patata rirqanku.
11 Moisés makinta wichayman oqariqtinmi Israel runakuna guerrapi atipaqku, makinta uraykachiqtintaq Amalec runakuna atipaqku.
12 Moisespa makinqa ñan sayk’usqaña kasharqan, chaymi juj rumipi payta tiyaykachirqanku. Aaronwan Hurwantaq Moisespa makinta oqariysirqanku, jujninmi paña ladonman churakurqan jujnintaq lloq’e ladonman. Moisespa makinqa intiq chinkaykunankaman wichayllapi kasharqan.
13 Chhaynapin Josueqa Amalec runakunata vencerqan.+
14 Jehová Diosmi Moisesta nirqan: “Amalec runakunatan llapanta kay pachamanta chinkachisaq, manan pipas paykunataqa yuyarinqachu.+ Chaytan juj libropi qelqanki lliu yuyarinanpaq, willankin Josuemanpas”, nispa.
15 Chaymantataq Moisesqa juj altarta perqarqan, jinaspa chayta suticharqan Jehová-Nisí* nispa.
16 Nirqanmi: “Jehová* Diospa tronon contra jatarisqankuraykun+ Jehová Diosqa Amalec runakunawan llapa mirayninkunawan ima guerrapi kanqa”,+ nispa.
Uraypi willakuykuna
^ Discutiytaqa “ch’aqway” nillankutaqmi.
^ Chaypiqa “kuraq runakunata” nillanmantaqmi.
^ Meribá sutiqa “discutiy” otaq “churanakuy” ninantan nin.
^ Masá sutiqa “prueba” ninantan nin.
^ Jehová-Nisí sutiqa “Jehová Diosmi señalpaq sayaq k’ulluyqa” ninantan nin.
^ Hebreo rimaypiqa “Jah” ninmi. Jah nisqaqa pisi letrakunallapin “Jehová” ninanta nishan.
