Éxodo 21:1-36
21 ”Kay kamachikuykunatawanmi paykunaman willanki:+
2 ”Juj hebreo runata kamachiyki kananpaq rantikunki chayqa,+ soqta watan payqa servisunki, qanchis kaq watapitaq mana imata pagaspalla libre kapunqa.+
3 Pay sapallan chayamurqan chayqa, sapallanmi lloqsipunqa. Warminpiwanchus chayamurqan chayqa warminpas paywan kuskan ripunqa.
4 Patronninchus casarachinman karqan chayqa, chay warmipitaqchus qhari wawankunapas warmi wawankunapas kanman karqan chayqa, paykunaqa qhepakullanqakun patronninpa kasqankurayku. Sapallanmi chay kamachiqa lloqsipunqa.+
5 Ichaqa chay kamachichus ninman: Manapunin lloqsipuymanchu, munakunin patronniyta, warmiyta, wawaykunatapas,+ nispa chayqa,
6 patronninmi noqa cheqaq Diospa ñaupayman pusamunqa. Jinaspa punkupi sayaq k’aspiman ninrinta churaykuspa t’oqonawan ninrinta t’oqonqa. Chhaynapin chay runaqa wiñaypaq kamachin kapunqa.
7 ”Pipas ususinta vendenman kamachi kananpaq chayqa, manan payqa qhari kamachi jinachu libre lloqsipunqa.
8 Sichus patronnin mana gustonpaq jinachu qhawarinqa manataq tiyaqmasinmanpas* tukuchinqachu chayqa, atinmanmi jujman vendeyta, ichaqa manan waj llaqtayoq runamanqa vendenqachu, chay warmita traicionasqanrayku.
9 Churinwanchus chay warmita casarachinqa chayqa, ususinta jinan paytaqa qhawarinqa.
10 Paychus juj warmiwan casarakullanqataq chayqa, ñaupaq casarakusqan warmimanqa qoshallanqan mijunatapas p’achatapas; chaymantapas puñushallanqan paywanqa.+
11 Manachus pay chay kinsantin ruwananwan junt’anqa chayqa, mana imata pagaspallan chay warmiqa libre lloqsipunqa.
12 ”Pipas runamasinta maqaspa wañuchinman chayqa, wañuchisqan paypas kanqa.+
13 Pipas mana yuyaypichu runamasinta wañuchinman, manataq noqa cheqaq Diospas jark’aymanchu chay pasananta chayqa, may llaqtatachus noqa ajllasaq chaymanmi chay runaqa ayqekunqa.+
14 Ichaqa pipas runamasin contra sinchita phiñakuspa yuyaypi wañuchinman chayqa,+ wañunqan chay runaqa. Altarniymanña pakakuq jamunqa chaypas apaspan wañuchinkichis.+
15 Pipas tayta-mamanta maqaqqa wañuchisqan kanqa.+
16 ”Pipas juj runata suwakunman+ jinaspa vendenman otaq pakashaqta jap’irunkuman chayqa,+ wañuchisqan kanqa chay runaqa.+
17 ”Pipas taytantapas mamantapas ñakaqqa wañuchisqan kanqa.+
18 ”Yaqapaschá pipas runamasinwan maqanakushaspa rumiwan otaq saqmaspa k’irinqa, ichaqa mana wañuchinqachu aswanpas puñunallapi kanqa, chay pasaqtinqa kaytan ruwankichis:
19 Chay k’irisqa runachus normalta sayarinqa chayqa, taunaq yanapayninwanña puririnqa chaypas, k’iriq runaqa manan castigasqachu kanqa. Aswanmi chay k’irisqa runaq mana llank’asqan p’unchaykunamanta paganqa chay runa qhaliyanankama.
20 ”Pipas qhari kamachinta otaq warmi kamachinta k’aspiwan p’ananman, chay kamachitaq wañunman chayqa, wañuchisqan kanqa chay runaqa.+
21 Ichaqa chay p’anasqa runa kausanqaraq juj otaq iskay p’unchayllatapas chayqa, manan wañuchisqachu kanqa chay p’anaq runaqa, kamachinta qolqenwan rantikusqanrayku.
22 ”Runakunachus maqanakushaspa juj onqoq warmita tanqarparinqaku, chay warmitaq manaraq tiempopi onqokunqa,+ manataq pipas wañunqachu chayqa, chay warmiq qosanpa imachus mañakusqantan juchayoq runaqa paganqa; juezpa nisqanman jinan chay pagoqa kanqa.+
23 Ichaqa chay warmipas otaq wawapas wañunqa chayqa, wañullanqataqmi chay wañuchiq runapas. Kausaymantan kausayninwan paganqa,+
24 ñawimanta ñawiwan, kirumanta kiruwan, makimanta makiwan, chakimanta chakiwan,+
25 ruphasqamanta ruphasqawan, k’irimanta k’iriwan, saqmamanta saqmawan.
26 ”Pipas qhari kamachinpa otaq warmi kamachinpa ñawinpi saqmaspa churchuyachinman chayqa, chay ñawinmantan kacharipunqa chay kamachinta.+
27 Qhari kamachinpa otaq warmi kamachinpa kiruntachus saqmaspa phawachinman chayqa, chay kirunmantan kacharipunqa.
28 ”Torochus juj qharita otaq warmita waqraspa wañuchinman chayqa, rumiwan ch’aqespan chay torotaqa wañuchinkichis,+ amataqmi aychantapas mijunkichischu. Chay toroq dueñonqa manan ima castigotapas chaskinqachu.
29 Ichaqa chay torochus waqrakuqña kanman karqan, dueñonmanpas willankumanchus karqan toron chhayna kasqanta, paytaq chayta yachashaspa mana watanmanchu karqan chayqa, rumiwan ch’aqespan wañuchinkichis chay torotaqa, dueñonpas wañuchisqan kanqa.
30 Ichaqa chay toroq dueñontachus pagachiyta munankuman chhaynapi ama wañunanpaq chayqa, jayk’atachus mañakusqankuman jinan paganqa.
31 Juj qhari wawatachus otaq warmi wawatachus waqranqa chayqa, chay kamachikuyman jinan chay toroq dueñonta ruwakunqa.
32 Juj qhari kamachita otaq warmi kamachita waqranqa chaytaq, toroq dueñonqa kamachiq patronninman qopunqa kinsa chunka* qolqeta, torotataq rumiwan ch’aqespa wañuchikunqa.
33 ”Pipas t’oqota kicharparinman otaq t’oqota ruwanman manataq tapanmanchu jinaspa toropas asnopas chayman urmaykuspa wañunman chayqa,
34 chay t’oqoq dueñonmi uywaq dueñonman pagapunqa+ jayk’atachus chay uywa valen chayta. Chay wañusqa animalqa paypan kapunqa.
35 Torokunachus waqranakunqaku jinaspa jujnin juj kaqta wañuchinqa chayqa, iskaynin dueñokunan kausashaq torota vendenqaku jinaspa vendesqanku qolqeta t’aqanakunqaku. Wañusqa torotapas t’aqanakunqakun.
36 Ichaqa chay torochus waqrakuqña kanman karqan, dueñopas yachashaspachus mana watanman karqan chayqa, chay wañuq toromantan dueñoqa juj torota sayachipunqa, wañuq torotaq paypa kapunqa.
Uraypi willakuykuna
^ Tiyaqmasi warmikunaqa esposakuna jinan karqanku. Qhaway Explicasqa simikuna nisqapi “Tiyaqmasi warmi” nisqata.
^ Hebreo rimaypiqa “kinsa chunka siclo” ninmi. Juj sicloqa 11,4 gramostan pesaq. Qhaway “Astawan yachanapaq B14” nisqata.
