Éxodo 26:1-37
26 ”Ñañuy-ñañu k’antisqa lino q’aytumanta, azul q’aytumanta, azulniraq puka q’aytumanta, k’anchaq puka q’aytumantawanmi chunka telakunata awanki, chaypin bordanki querubinkunata.+ Chaywanmi yupaychana karpata+ ruwanki.
2 Sapanka telaq largonmi kanqa iskay chunka pusaqniyoq codo,* anchontaq kanqa tawa codo. Llapa telakunan chay sayaykama kanqa.+
3 Pisqa telakunatan jujllaman siranki, wakin pisqa telakunatapas jujllamanmi sirallankitaq.
4 Chay sirasqayki pisqa telakunaq jujnin cantonmanmi azul q’aytumanta ninrichasqakunata churanki, kaqtan ruwallankitaq juj kaq sirasqayki pisqa telakunaq jujnin cantonpipas. Chhaynapin iskaynin t’aqa telakunata jujllaman tukuchinki.
5 Pisqa chunka ninrichasqakunatan ñaupaq kaq t’aqa telakunaq cantonpi churanki, pisqa chunka ninrichasqakunatan juj kaq t’aqa telakunaq cantonpipas churallankitaq. Chhaynapin iskaynin t’aqa telakunapi ninrichasqakunata chimpa-chimpapurata tupachinki.
6 Ruwallankitaqmi pisqa chunka qori ganchokunatapas, chaywanmi iskaynin t’aqa telakunata jujllaman tukuchinki. Chhaynapin karpaqa ch’ulla telallayoq kanqa.+
7 ”Awallankitaqmi cabra pelomanta telakunatapas+ chaywan chay karpata qatanapaq. Chunka jujniyoq telakunatan awanki.+
8 Sapanka telaq largonmi kanqa kinsa chunka codo, anchontaq kanqa tawa codo. Llapan chay chunka jujniyoq telakunan chay sayaykama kanqa.
9 Pisqa telakunatan jujllaman siranki, wakin soqta telakunatapas jujllamanmi siranki. Soqta kaq telatan karpaq ñaupan ladopi q’enpinki.
10 Chay sirasqa telakunaq jujnin cantonpin pisqa chunka ninrichasqakunata churanki. Juj kaq t’aqa telakunaq jujnin cantonpipas pisqa chunka ninrichasqakunatan churallankitaq, chhaynapin iskaynin t’aqa telakunata jujllaman tukuchinki.
11 Ruwallankitaqmi pisqa chunka cobre ganchokunatapas. Chaykunawanmi telakunapi ninrichasqakunata jap’ichinki, chhaynapin chay telakunaqa jujlla kapunqa.
12 Puchuq telaqa uraykaman warkukunqa. Karpaq qhepan ladopi iskay codo* puchuq telapas jinallan warkukunqa.
13 Karpaq sapanka ladonpi puchuq telaqa juj codon kanqa, chayqa jinallan warkukunqa chhaynapi llapa karpata tapananpaq.
14 ”Chay karpapaqmi ruwallankitaq puka teñisqa oveja qarakunamanta juj qatanata, chay patamanmi churallankitaq foca qarakunamanta ruwasqa qatanata.+
15 ”Karpapaqqa ruwallankitaqmi acacia sach’a tablamanta marcokunata,+ chaykunatan sayachinki.+
16 Sapanka marcoq sayayninmi kanqa chunka codo, anchontaq kanqa juj codo kuskan.
17 Chaymantapas sapanka marcon kanqa iskay juch’uy chakikunayoq, iskaynin chimpa-chimpapura. Llapan marcokunan chhaynakama kanqa.
18 Iskay chunka marcokunatan yupaychana karpaq lloq’e ladonpaq* ruwanki.
19 ”Chay iskay chunka marcokunapaqmi tawa chunka sayanakunata ruwanki, chaykunaqa qolqemanta+ ruwasqan kanqa. Sapanka marcopaqmi iskay sayanakunata ruwanki t’oqoyoqtakama chayman marcokunaq chakinta kabichinapaq.+
20 Chay karpaq paña ladonpaqmi* ruwallankitaq iskay chunka marcokunata.
21 Ruwallankitaqmi qolqemanta tawa chunka sayanatapas, sapanka marcopaqmi iskay sayanakuna kanqa.
22 Chaymantapas chay karpaq qhepanpaqmi inti jaykuy ladopaq soqta marcokunata ruwanki.+
23 Ruwallankitaqmi karpaq qhepa esquinankunapaq iskay marcokunatapas.
24 Chay marcokunaq uranmi anchorisqa kanqa, jawantaq ñaupaq ninriq kasqanpi jujllaman juñusqa kanqa. Chhaynan iskaynin marcokuna kanqa, chaykunan karpaq qhepa esquinankuna kanqa.
25 Llapanpiqa pusaq marcokunatan ruwanki, ruwallankitaqmi qolqemanta chunka soqtayoq sayanakunatapas, sapanka marcopaqmi iskay kanqa.
26 ”Ruwallankitaqmi acacia sach’amanta k’aspikunatapas. Pisqan kanqa karpaq jujnin ladonpi marcokunapaq.+
27 Pisqataq kanqa karpaq juj kaq ladonpi marcokunapaq. Karpaq qhepanpi inti jaykuy ladopi marcokunapaqpas pisqan kallanqataq.
28 Marcokunaq kuska qhatantan rinqa juj k’aspi, chay k’aspiqa juj cantomanta jujnin cantonkaman pasanqa.
29 ”Ruwallankitaqmi qori ninrikunatapas, chaynintan pasachinki ruwasqayki k’aspikunata. Chaymantapas llapa marcokunatan qoriwan forranki,+ k’aspikunatapas qoriwanmi forranki.
30 Chay karpataqa imaynatachus kay orqopi rikuchirqayki chay kikillantan ruwanki.+
31 ”Azul q’aytumanta, azulniraq puka q’aytumanta, k’anchaq puka q’aytumanta, ñañuy-ñañu k’antisqa lino q’aytumantawanmi juj cortinata+ awallankitaq. Chaypitaq bordakunqa querubín angelkunata.
32 Chaytan warkunki acacia sach’amanta ruwasqa tawantin columnakunaman, qorimanta ruwasqa ganchokunawantaqmi jap’ichinki. Chay columnakunaqa qoriwan forrasqan kanqa, qolqemanta ruwasqa sayanakunapitaqmi sayanqapas.
33 Chay cortinataqa ganchokunapin warkunki, chay cortinaq qhepan ukhumanmi churanki rimanakuyniy arcata.+ Chay cortinan t’aqanqa ch’uya cuartomanta+ ch’uyay-ch’uya cuartota.+
34 Chay ch’uyay-ch’uya cuartopi rimanakuyniy arcatan tapanwan tapanki.
35 ”Cortinaq ñaupanpi kaq ch’uya cuartopin churanki mesata, mesaq ñaupanpitaq churanki candelerota.+ Mesaqa paña ladopin kashanqa candelerotaq lloq’e ladopi.
36 Karpa jaykunapaqmi ruwallankitaq juj cortinata, chay cortinataqa azul q’aytumanta, azulniraq puka q’aytumanta, k’anchaq puka q’aytumanta, ñañuy-ñañu k’antisqa lino q’aytumantawanmi awanki.+
37 Chay cortinata warkunaykipaqmi acacia sach’amanta pisqa columnakunata ruwanki. Ruwallankitaqmi qori ganchokunatapas. Chay columnakunaqa qoriwan forrasqan kanqa, sayanankunatapas unuyachisqa cobremantan pisqata ruwanki.
Uraypi willakuykuna
^ Juj codoqa yaqa kuskan metro jinan karqan (44,5 cm). Qhaway “Astawan yachanapaq B14” nisqata.
^ Chaypiqa “kuskan” nillanmantaqmi.
^ Hebreo rimaypiqa “uray ladonpaq” ninmi.
^ Hebreo rimaypiqa “wichay ladonpaqmi” ninmi.
