Éxodo 27:1-21
27 ”Ruwallankitaqmi juj altartapas, chaytaqa acacia sach’a tablakunamantan ruwanki.+ Chayqa cuadradon kanqa, largonmi pisqa codo* kanqa, anchonpas pisqa codon
kallanqataq, altontaq kinsa codo kanqa.+
2 Tawantin esquinanpin juj waqrata ruwanki.+ Chay waqrakunaqa jujllan kanqa altarwanqa. Chaymantapas cobrewanmi forranki chay altartaqa.+
3 Ruwallankitaqmi uspha mankakunata, palakunata, jatun p’ukukunata, trinchekunata, sansa apana p’ukukunatapas. Llapa chaykunaqa cobremantakaman kanqa.+
4 Chay altarpaqmi ruwallankitaq malla jina cobre rejillata. Sapanka esquinanpitaq churanki juj cobre ninrita, tawantin esquinanmanmi chayta churanki.
5 Chay rejillatan altar ukhuman churanki, chaypin altarpa kuskan qhatanpi jina kanqa.
6 Ruwallankitaqmi acacia sach’amanta k’aspikunatapas, chaykunatan cobrewan forranki.
7 Chay k’aspikunatan altarpi kaq iskaynin lado ninrikunaman suskhuchinki chaywan wantunapaq.+
8 Chay altartaqa tablakunawanmi cajata jina ruwanki, ichaqa t’oqollan uranqa kanqa. Kay orqopi rikuchisqay kikillantan ruwanki.+
9 ”Ruwasqayki yupaychana karpapaqmi patiota ruwanki.+ Uray ladota cercanapaqmi ñañuy-ñañu k’antisqa lino q’aytumanta cortinata awanki. Chay cortinaqa pachaj codo wask’ayoqmi* kanqa.+
10 Chay cortinapaqmi ruwanki iskay chunka postekunata iskay chunka cobre sayanantintakama. Chay postekunapi ganchokunapas jap’inakunapas qolqemanta ruwasqan kanqa.
11 Wichay ladoman cortinaq wask’anpas pachaj codon kanqa. Chaypipas iskay chunka cobre postekunan kallanqataq cobre sayanakunantinkama. Kallanqataqmi qolqemanta ganchokunapas jap’inakunapas.
12 Inti jaykuy ladopaqqa pisqa chunka codo cortinan kanqa, chaymi kanqa karpa patioq anchon. Cortinapaq postekunataq chunka kanqa sayanantinkama.
13 Inti lloqsimuy ladomanpas pisqa chunka codon karpa patioq anchonqa kallanqataq.
14 Punku jaykunaq jujnin ladonman cortinan kanqa chunka pisqayoq codo. Postekunataq kinsa kanqa sayanantinkama.+
15 Punku jaykunaq juj kaq ladonman cortinapas chunka pisqayoq codon kallanqataq. Postekunapas kinsan kallanqataq sayanantinkama.
16 ”Karpa patioman jaykuna punkupin kanqa iskay chunka codo largoyoq cortina. Chay cortinaqa azul q’aytumanta, azulniraq puka q’aytumanta, k’anchaq puka q’aytumanta, ñañuy-ñañu k’antisqa lino q’aytumantawan awasqan kanqa.+ Kallanqataqmi tawa postekunapas sayanakunantinkama.+
17 Karpa patioq muyuriqninpi postekunaqa qolqemanta ruwasqa ganchokunantin jap’inakunantin iman kanqa. Chay postekunaq sayanankunataq cobremanta ruwasqa kanqa.+
18 Karpa patioq largonmi pachaj codo kanqa,+ anchontaq kanqa pisqa chunka codo, altontaq pisqa codo. Llapa muyuriqmi kanqa ñañuy-ñañu k’antisqa lino cortinawan cercasqa, postekunaq sayanantaq kanqa cobremanta ruwasqa.
19 Chay karpapi llank’anapaq tukuy ima serviciokunapas, juj cosaskunapas, karpapaq estacakunapas, karpa muyuriq cortinapaq estacakunapas cobremanta+ ruwasqan kanqa.
20 ”Israel runakunatan kamachinki aceituna aceiteta* apamunankupaq, chay aceiteqa purullan kanqa. Chay aceitewanmi candeleropi mecherokunata* k’anchachinkichis, chay mecherokunaqa mana wañuspan k’anchashallanqa.+
21 Arí, tupana karpapi, rimanakuyniy arcaq+ ladonpi cortinaq ñaupanpi candeleroqa mana wañuspan k’anchanqa. Aaronmi wawankunapiwan chaymanta encargakunqa. Paymi inti jaykuyta jina jap’ichinqa p’unchayamunankama noqa Jehová Diospa ñaupaypi k’anchananpaq.+ Chay kamachikuyqa wiñaypaqmi kanqa, chaytan kasukunqaku Israel runakunapas llapa mirayninkunapas.+
Uraypi willakuykuna
^ Juj codoqa yaqa kuskan metro jinan karqan (44,5 cm). Qhaway “Astawan yachanapaq B14” nisqata.
^ Wask’ataqa “largo” nillankutaqmi.
^ Aceituna aceitetaqa “olivo aceite” nillankutaqmi.
^ Chaypiqa “lamparakunata” nillanmantaqmi.
