Éxodo 28:1-43
28 ”Llapa Israel runakuna ukhumantan wayqeyki Aaronta wawankunatawan ajllanki sacerdoteykuna+ kanankupaq. Aaronta,+ wawankuna Nadabta, Abiuta,+ Eleazarta, Itamartawanmi+ ajllanki.
2 Wayqeyki Aaronpaqmi ruwapunki sacerdote munay p’achata,* chhaynapi allin qhawasqa kananpaq.+
3 Yachayta qosqay allin yachaq* runakunawanmi rimanki+ Aaronpaq p’achata ruwapunankupaq. Chay p’achawan churakuspan Aaronqa rikuchinqa noqapaq t’aqasqa* kasqanta, sacerdotey kasqantawan.
4 ”Kay p’achakunatan paykunaqa ruwanqaku: qhasqo* ch’uspata,+ jatun unkuta,*+ mana makiyoq jatun p’achata,+ cuadro-cuadro pallayniyoq jatun p’achata, juj munay uma k’uyunata,+ chumpita+ ima. Chay sacerdote p’achatan ruwapunqaku Aaronpaq wawankunapaqwan, chhaynapi sacerdoteykuna kanankupaq.
5 Chay allin yachaq runakunaqa qori q’aytumanta, azul q’aytumanta, azulniraq puka q’aytumanta, k’anchaq puka q’aytumanta, sumaq lino q’aytumanta iman chaykunata ruwanqaku.
6 ”Jatun unkutan ruwanqaku qori q’aytumanta, azul q’aytumanta, azulniraq puka q’aytumanta, k’anchaq puka q’aytumanta, ñañuy-ñañu k’antisqa lino q’aytumantawan. Bordasqan kanqa chay unkuqa.+
7 Chaymantapas chay unkuq ñaupaq ladonmi wasa ladonpiwan rijranpi jap’inachisqa kanqa.
8 Kallanqataqmi unkuta jap’iq awasqa chumpipas,+ chayqa unkumanmi sirasqa kanqa. Chay chumpipas qori q’aytumanta, azul q’aytumanta, azulniraq puka q’aytumanta, k’anchaq puka q’aytumanta, ñañuy-ñañu k’antisqa lino q’aytumanta iman awasqa kanqa.
9 ”Iskay ónice rumikunapin+ Israelpa churinkunaq sutinta k’iñachinki.*+
10 Jujnin rumipin soqta sutita churachinki, juj kaq rumipipas soqta sutitan churachillankitaq, chay sutikunataqa kuraqmanta sullk’amanmi churachinki.
11 Chay sutikunataqa rumi k’iñaq runan iskaynin rumipi k’iñanqa sellotapas churashanman jinata.+ Chaymantataq chay rumikunata qori jap’inakunaman ch’olqochinki.*
12 Chay rumikunatan unkuq iskaynin rijrankunaman churanki Israel runakunata yuyarichiq rumi kananpaq.+ Aaronmi rijrankunapi paykunaq sutinkuta apanqa noqa Jehová Diospa ñaupaypi, chhaynapi Israel runakuna yuyarisqa kananpaq.
13 Chay rumikunaq jap’inankunataqa qorimantan ruwanki.
14 Ruwallankitaqmi iskay qori watukunatapas, chaykunataqa qori q’aytukunata simp’aspan ruwanki.+ Chay watukunatan qori jap’inakunaman watanki.+
15 ”Bordayta yachaq runawanmi Dios tapuna ch’uspata+ ruwachinki. Chay ch’uspaqa unku jinan qori q’aytumanta, azul q’aytumanta, azulniraq puka q’aytumanta, k’anchaq puka q’aytumanta, ñañuy-ñañu k’antisqa linomanta+ ima awasqa kanqa.
16 Chay ch’uspaqa cuadradon kanqa, anchonpas largonpas juj cuartan* kanqa.
17 Chay ch’uspamanmi churanki tawa fila rumikunata, qori jap’inayoqtakama. Ñaupaq filapin kanqa rubí rumi, topacio rumi, esmeralda rumipiwan.
18 Iskay kaq filapin kanqa turquesa rumi, zafiro rumi, jaspe rumipiwan.
19 Kinsa kaq filapitaq kanqa lésen rumi,* ágata rumi, amatista rumipiwan.
20 Tawa kaq filapitaqmi kanqa crisólito rumi, ónice rumi, jade rumipiwan. Sapanka rumin qori jap’ichinaman ch’olqochisqa kanqa.
21 Chaymantapas chay rumikunan apanqa Israelpa chunka iskaynintin churinkunaq sutinta. Sapanka rumitaq juj aylluwan tupanqa. Sapanka rumipin jujnin aylluq sutin sello jina k’iñasqa kanqa.
22 ”Ruwallankitaqmi qhasqo ch’uspapaq qori watukunatapas. Chaykunatan qori q’aytukunata simp’aspa ruwanki.+
23 Ruwankin iskay juch’uy qori argollakunatapas, chaykunatan qhasqo ch’uspaq iskaynin wichay lado esquinanman churanki.
24 Chaynintan ruwasqayki iskaynin qori watukunata pasachinki.
25 Chaymantataq chay watukunaq iskaynin puntanta qori jap’inanta pasachinki, jinaspa chay jap’inakunata unkuq rijranman jap’ichinki. Unkuq qhasqonpin ch’uspaqa warkurayanqa.
26 Ruwallankitaqmi iskay juch’uy qori argollakunata, chaytan churanki qhasqo ch’uspaq uray ladonpi iskaynin qhepa esquinaman.+
27 Chaymantapas ruwallankitaqmi waj iskay qori argollakunatapas, chaykunatan churanki unkuq ñaupaq ladonpi iskaynin rijranpa uranpi, unkupi sirasqa chumpiq jawanpi.+
28 Chay argollakunamanmi azul watuta churanki, chaytataq qhasqo ch’uspaq qhepanpi churasqayki argollakunaman jap’ichinki. Chhaynapin chay qhasqo ch’uspaqa chumpiq jawallanpi mana kuyuspa k’askarayanqa.
29 ”Karpapi ch’uya cuartoman Aarón jaykunqa chayqa, Diosta tapuna ch’uspatan qhasqonpi apanqa, chay ch’uspapin apanqa Israelpa wawankunaq sutinta noqa Jehová Dios paykunata yuyashanallaypaq.
30 Chay ch’uspa ukhumanmi churanki Urimta Tumimtawan.*+ Chaytan Aaronqa qhasqonpi apanqa noqa Jehová Diospa ñaupayman jaykunanpaq. Arí, noqa Jehová Diospa ñaupaypi kaspaqa qhasqollanpipunin apanqa Israel runakunata juzgananpaq kaqkunataqa.
31 ”Azul q’aytumantan+ mana makiyoq jatun p’achata ruwallankitaq, chay patamanmi unku rinqa.
32 Chay p’achaqa umapaq t’oqoyoqmi kanqa, chay t’oqoq llapa muyuriqnintataq awaq runa allin-allinta bordanqa. Maqanakuna chalecoq* t’oqon jinan ruwasqa kanqa, chhaynapi ama llik’ikunanpaq.
33 Chay p’achaq ura canton muyuriqmanmi azul q’aytumanta, azulniraq puka q’aytumanta, k’anchaq puka q’aytumantawan awasqa granadakunata qori campanillakunawan chaupinasqata churanki.
34 Granadaq qhepanmanmi rinqa qori campanilla, chaymantaq granada, chaymantaq qori campanilla. Chhaynan chay p’achaq llapa muyuriq canton kanqa.
35 Chay p’achawanmi Aaronqa churakunqa serviwananpaq. Noqa Jehová Diospa ñaupaypi ch’uya cuartoman jaykuqtin lloqsiqtin iman chay p’achaq campanillankuna suenanqa, chhaynapin payqa mana wañunqachu.+
36 ”Ruwallankitaqmi k’anchashaq llaflla* qori tablillatapas. Chaypin sellotapas churashawaq jina k’iñanki: Ch’uya kayqa Jehová Diospan,+ nispa.
37 Chaytan azul watuwan uma k’uyunapi+ watanki, uma k’uyunaq mat’inpin chayqa kanqa.
38 Aaronpa mat’inpin chay llaflla tablillaqa kanqa. Mayqen runapas Israel runakunaq t’aqasqan ofrenda+ jaywaypi juchallikunqa chayqa, Aaronmi chay runaq juchanta apanqa. Manapunin chay tablillaqa Aaronpa mat’inmantaqa lloqsinqachu, chhaynapin noqa Jehová Diosqa Israel runakunata sumaqta chaskisaq.
39 ”Ruwallankitaqmi linomanta jatun p’achatapas, chayqa cuadro-cuadro pallayniyoq awasqan kanqa. Kallanqataqmi linomanta awasqa uma k’uyunapas, jinallataq linomanta awasqa chumpipas.+
40 ”Aaronpa churinkunapaqpas awallankitaqmi jatun p’achakunata, chumpikunata, uma k’uyunakunata ima,+ chhaynapi allin p’achasqa sumaq qhawasqa kanankupaq.+
41 Wayqeyki Aaronta churinkunatawanmi chay p’achakunawan p’achachinki, jinaspa umankuman aceiteta jich’aykuspa+ sacerdotekuna kanankupaq t’aqanki,+ ch’uyanchanki ima. Paykunan noqaq sacerdoteykuna kanqaku.
42 Ruwapullankitaqmi linomanta trusakunatapas*+ ama aychanku rikukunanpaq. Chay trusakunaqa cinturanmanta moqoneqkaman kanqa.
43 Ch’uya pampapi Dioswan tupana karpaman jaykuspapas altarman asuykuspapas chaywanmi Aaronpas churinkunapas churakunqaku. Manachus churakunqaku chayqa wañunqakun. Chay kamachikuyqa wiñaypaqmi kanqa Aaronpaqpas mirayninkunapaqpas.
Uraypi willakuykuna
^ Hebreo rimaypiqa “munay ch’uya p’achata” ninmi.
^ Hebreo rimaypiqa “yachay sonqoyoq” ninmi.
^ Chaypiqa “ch’uyanchasqa” nillanmantaqmi.
^ Unkuqa jatun suéter otaq chaleco jinan karqan. Qhaway “Astawan yachanapaq B5” nisqata.
^ Qhasqotaqa “pecho” nillankutaqmi.
^ K’iñaytaqa “grabay” nillankutaqmi.
^ Ch’olqochiytaqa “kabichiy” nillankutaqmi.
^ Juj cuartaqa karqan 22 centímetro jinan. Qhaway “Astawan yachanapaq B14” nisqata.
^ Manan yachakunchu imayna clase rumichus chay karqan chayta. Yaqapaschá ámbar rumi, jacinto rumi, ópalo rumi otaq turmalina rumi karqan.
^ Qhaway Explicasqa simikuna nisqapi “Urim, Tumim” nisqata.
^ Maqanakuna chalecoqa soldadoq qhasqonta pakananpaqmi karqan.
^ Llafllataqa “llafsa, ch’illpa” nillankutaqmi.
^ Trusataqa “calzoncillo” nillankutaqmi.
