Éxodo 34:1-35
34 Jehová Diosmi Moisesta nirqan: “Iskay p’alta rumikunata ruwakuy ñaupaq p’alta rumikunata jina,+ chaypin qelqasaq p’akisqayki rumikunapi kasharqan chay simikunata.+
2 Alistakuy paqarin p’unchaypaq. Paqarin tutamantanmi Sinaí orqoman wichamunki, orqo pataman chayamuspataq qayllaykamuwanki.+
3 Aman pipas qanwan kuskaqa wichamunqachu, amapunin pipas chay orqopiqa kanqachu. Aman ovejakunapas wakakunapas orqoq qayllanpiqa mijunqachu”,+ nispa.
4 Chaymi Moisesqa iskay p’alta rumikunata ruwarqan, ñaupaq p’alta rumikunata jina. Jinaspan Jehová Diospa nisqanman jina tutallamanta jatarispa Sinaí orqota wicharqan, iskaynin p’alta rumikuna apaykusqa.
5 Jinan Jehová Diosqa phuyupi uraykamurqan+ Moisespa kasqanman, jinaspan Jehová Diosqa sutinmanta willarqan.+
6 Jehová Diosmi Moisespa ñaupanta pasaspa nirqan: “Jehová Diosmi kani, Jehová Diosmi kani. Noqaqa khuyapayakuq,+ sumaq sonqo Diosmi kani,+ pacienciakuq,*+ mana tukukuq may jatun munakuyniyoq+ Diosmi kani, llapa rimasqayta junt’aq+ Diosmi kani.*
7 Noqaqa waranqa-waranqa miraykaman mana tukukuq munakuyta*+ rikuchishallani; perdonanin mana kasukuqtapas, mana allin ruwaqtapas, juchallikuqtapas,+ ichaqa manapunin jinallataqa qhawasaqchu castiganapaq jina kaqtaqa.+ Taytakunataqa castigasaqmi juchankumanta, chay castigoqa chayanqan wawankunaman, nietonkunaman, nietonkunaq wawankunamanpas”,+ nispa.
8 Jinan Moisesqa kaq ratu pampakama k’umuykuspa Diosta adorarqan.
9 Jinaspan nirqan: “Jehová Diosníy, allinpaq qhawariwanki chayqa, noqaykuwan kuskayá riy.+ Jehová Diosníy, valekuykin, kay mana kasukuq k’ullu runakunata+ riysiwayku. Mana kasukusqaykuta juchaykutawan perdonaykuwayku,+ jinaspa llaqtayki kanaykupaq chaskikapuwayku”, nispa.
10 Diostaq nirqan: “Qankunawanmi rimanakushani imaymana milagrokunata ñaupaykichispi ruwanaypaq. Chhayna milagrokunaqa manan jayk’aqpas mayqen nacionpipas ni kay pachantinpipas ruwakurqanchu. Muyuriqniykichispi tiyaq llapa llaqtakunan+ rikunqaku noqa Jehová Diospa imachus ruwasqayta, imatachus qankunapaq ruwasaq chayqa ancha admirakunapaqmi kanqa.+
11 ”Allintan uyarinki imakunatachus kamachisayki chayta.+ Noqan ñaupaykichismanta qarqosaq amorreo runakunata, Canaán runakunata, Het runakunata, perizita runakunata, heveo runakunata, Jebús runakunatawan.+
12 Amapunin maymanchus rishankichis chay jallp’api runakunawanqa ima acuerdotapas ruwankichischu,+ mana chayqa juj trampan qankunapaq kanman.+
13 Chay runakunaq altarninkunatan thuninkichis, yupaychana sayashaq ruminkunatan ñut’unkichis, yupaychana sayashaq k’ullunkunatapas* wit’unkichismi.+
14 Aman waj diosmanqa k’umuykunkichischu,+ noqa Jehová Diosniykichisqa noqallata adorawanankutan munani,+ arí, noqallatan adorawankichis.
15 Amapunin chay jallp’api runakunawanqa ima acuerdotapas ruwankichischu. Chay runakunaqa diosninkuta adoraspa, sacrificiokunata jaywaspa iman chay idolokunawan qhelli juchata ruwanku.+ Paykunawan rimanakunki chayqa paqtapas qankunata wajaspa diosninkuman jaywasqanku sacrificiokunata mijuchisunkichisman.+
16 Paqtapas churiykichista ususinkuwan casarachiwaqchis,+ chay ususinkutaq diosninta adoraspa qhelli jucha ruwasqankuman churiykichiskunata aysankuman.+
17 ”Aman unuyachispa jich’asqa dioskunataqa ruwakunkichischu.+
18 ”Mana Levadurayoq T’anta Fiestatan ruwankichis.+ Chaypin kamachisqayman jina mana levadurayoq t’antata mijunkichis. Qanchis p’unchaymi abib killapi*+ chayta mijunkichis jayk’aqchus ruwakunanman jina. Chay killapin qankunaqa Egiptomanta lloqsimurqankichis.
19 ”Noqaqmi llapa phiwi* churiykichiskunaqa+ jinallataq llapa ñaupaq wachay orqo ovejaykichispas toroykichispas.+
20 Ñaupaq wachay asnokunataqa ovejawanmi cambiankichis, chaymi libranapaq pago kanqa. Manachus chay pagota qonkichis chayqa, kunkanta p’akispan wañuchinkichis. Phiwi wawaykichiskunata libranaykichispaqpas pagankichismi.+ Aman mayqenniykichispas ch’usaq makintinqa jamuwankichischu.
21 ”Soqta p’unchayllan llank’anki, qanchis kaq p’unchaypiqa samankin,+ cosecha tiempoña kaqtinpas, yapuna* tiempoña kaqtinpas.
22 ”Semanakuna Fiestatan ruwanki, chaypin ñaupaq oqarisqayki trigota jaywanki; wata tukuytataq Cosecha Tukuy Fiestata* ruwanki.+
23 ”Llapa qharikunan watapi kinsa kutita noqa Israelpa Diosnin Señor Jehová Diospa ñaupayman jamunqaku.+
24 Noqan ñaupaykichismanta nacionkunata qarqosaq,+ jallp’aykichistapas jatunyachisaqmi. Watapi kinsa kutita noqa Jehová Diosniykichisman jamuwasqaykichis p’unchaykunapas manan pipas jallp’aykichistaqa munapayanqachu.
25 ”Ima sacrificiotapas noqaman jaywamuwaspaqa aman yawartawan levadurayoq t’antatawan kuskataqa jaywamuwankichischu.+ Pascua Fiestapaq sacrificiotaqa aman qhepantin p’unchaykamaqa waqaychankichischu.+
26 ”Chajraykimanta ñaupaqta oqarisqayki allin kaq rurutan noqa Jehová Diosniykiq wasiyman apamunki.+
”Aman uña cabrataqa mamanpa lechenpi t’impuchinkichu”,+ nispa.
27 Jehová Diosmi Moisesta nillarqantaq: “Llapa kaykunata qelqay,+ chay simikunaman jinan noqaqa qanwanpas Israel runakunawanpas rimanakushani”,+ nispa.
28 Moisesqa tawa chunka p’unchayta tawa chunka tutatan Jehová Dioswan chay orqopi qhepakurqan. Manan imatapas mijurqanchu ni unutapas tomarqanchu.+ Diostaq Moisespa p’alta rumikuna apasqanpi rimanakuy simikunata qelqarqan; chunka kamachikuy simikunatan qelqarqan.+
29 Chaymantan Moisesqa kamachikuy simiyoq iskaynin p’alta rumikunantin Sinaí orqomanta uraykamurqan.+ Dioswan rimasqanraykun Moisespa uyanqa k’anchasharqan; Moisesqa manan reparakurqanchu uyan k’anchashasqanta.
30 Aaronwan llapa Israel runakunapiwan Moisesta rikuspankun repararqanku uyan k’anchashasqanta, jinan paykunaqa manchakuymanta mana asuykurqankuchu.+
31 Moisesmi ichaqa paykunata wajarqan, jinan Aaronpas Israelpi llapa umallikunapas asuykurqanku. Paykunawanmi Moisesqa rimarqan.
32 Chaymantataq llapa Israel runakuna jamurqanku, jinan Moisesqa Sinaí orqopi Jehová Diospa llapa kamachisqanta paykunaman willarqan.+
33 Paykunawan rimayta tukuspaqa uma qatananwanmi Moisesqa uyanta tapakuq.+
34 Jehová Dioswan rimaq jaykuspataq chay uma qatananta orqokuq.+ Chaymanta lloqsimuspataq Moisesqa Israel runakunaman willaq Diosmanta chaskisqan kamachikuykunata.+
35 Israel runakunaqa Moisespa uyanta qhawarispan rikuqku uyanpa k’anchashasqanta, chaymi Moisesqa uma qatananwan uyanta tapakuq. Chhayna tapasqallan kaq Dioswan rimaq jaykunankama.+
Uraypi willakuykuna
^ Chaypiqa “mana usqhaylla phiñakuq” nillanmantaqmi.
^ Chaypiqa “llapa rimasqayqa cheqaqpunin, confianapaq jinan” nillanmantaqmi.
^ Qhaway Explicasqa simikuna nisqapi “Mana tukukuq munakuy” nisqata.
^ Qhaway Explicasqa simikuna nisqapi “Sayashaq k’ullu” nisqata.
^ Qhaway “Astawan yachanapaq B15” nisqata.
^ Yapuytaqa “chajmay, aray” nillankutaqmi.
^ Chay fiestatan nikullantaq “Ch’ujlla Ruway Fiesta” nispa.
