1 Crónicas 11:1-47
11 Tiempowantaq Israel runakunaqa Hebrón+ llaqtapi Davidwan juñukurqanku, jinaspa nirqanku: “¡Kaypin kashayku! Noqaykuqa wayqeykikunan kayku.*+
2 Saúl rey kashaqtinraqmi qanqa ñaupaqmantaña umallirqanki Israel soldadokuna guerraman riqtin.+ Qantan Jehová Diosniykiqa nirqasunki: Qanmi Israel llaqtayta michinki, qanmi Israel llaqtaypa umallinpas kanki,+ nispa”.
3 Llapa Israel umalliqkunan* Hebrón llaqtata jamurqanku Davidwan tupaq. Chaypin Davidqa Jehová Diospa ñaupanpi juj acuerdota paykunawan ruwarqan. Chaymantataq paykunaqa Davidta Israelpi rey kananpaq aceitewan jich’aykurqanku,+ chaytaqa ruwarqanku Jehová Dios Samuelwan willachisqanman jinan.+
4 Chaymantataq Davidqa llapa Israel runakunawan Jerusalén llaqtata rirqanku Jebús runakunaq kasqanman,+ Jerusalén llaqtatan nikullantaq Jebús nispa.+
5 Jebús runakunataq Davidmanta burlakuspa nirqanku: “¡Manan jayk’aqpas kaymanqa jaykumunkichu!”,+ nispa. Davidmi ichaqa Sion orqopi kaq allin perqasqa llaqtata jap’ikapurqan,+ chaytan kunanqa sutichakun Davidpa Llaqtan nispa.+
6 Davidmi nirqan: “Pichus Jebús runakunaman ñaupaqta phawaykunqa chay runatan ejercitoyta umallinanpaq churasaq”, nispa. Jinan Zeruyapa churin Joabqa+ paykunaman ñaupaqta phawaykurqan, chhaynapin payqa Davidpa ejercitonpi umalli kapurqan.
7 Chaymantataq Davidqa chay allin perqasqa llaqtapi tiyapurqan. Chaymi chay llaqtata suticharqanku Davidpa Llaqtan nispa.
8 Chaypin Davidqa wasikunatapas perqakunatapas sayarichiyta qallarirqan Miló* nisqa moqomanta llapa muyuriqta. Wakin perqakunatawan wakin wasikunatawantaq Joab sayarichirqan.
9 Chhaynapin Davidqa pisi-pisimanta aswan atiyniyoqman tukupusharqan.+ Ejercitokunata kamachiq Jehová Diosqa* Davidwanmi kasharqan.
10 Kaykunan Davidpa allin maqanakuq soldadonkunaq umallinkuna. Paykunan llapa Israel runakunapiwan Jehová Diospa nisqanman jina Israelpi rey kananpaq Davidta yanaparqanku.+
11 Davidpa kallpasapa allin maqanakuq runankunan kaykuna karqan: Acmoní runaq churin Jasobean,+ paymi kinsantin allin maqanakuq runakunamanta jujnin karqan, paytaqmi umallinku karqan.+ Juj kutinmi Jasobeanqa kinsa pachaj runakunata lanzanwan wañuchirqan.+
12 Jujnin kaqtaq karqan Dodopa churin Eleazar,+ payqa kinsantin kallpasapa allin maqanakuqkunamanta jujninmi karqan. Dodoqa Aojí runan karqan.+
13 Eleazarmi Pas-Daminpi+ kaq cebada chajrapi Davidwan kasharqan, chaypin Filistea runakunaqa juñukurqanku Israel runakunawan maqanakunankupaq. Israel soldadokunaqa Filistea runakunamantan ayqekurqanku,
14 Eleazarmi ichaqa mana ayqekurqanchu aswanpas Filistea runakunawanmi chay chajra chaupipi maqanakurqan, jinaspa paykunata wañuchirqan. Chhaynapin Jehová Diosqa chay p’unchaypi Israel runakunata salvarqan.*+
15 Kinsa chunka umallikunamantan kinsa umallikuna Adulan qaqa t’oqoman+ Davidwan tupaq rirqanku. Chay kutipiqa Refaín wayq’opin Filistea runakunamanta juj t’aqa soldadokunaqa karpakusharqanku.+
16 Davidqa pakakunallanpin kasharqan, wakin Filistea soldadokunataq Belén llaqtapi kasharqanku.
17 Jinan Davidqa khaynata nirqan: “¡Maytan munayman Belén+ llaqta punkupi kaq pozomanta unu ujayta!”, nispa.
18 Chayta David niqtinmi kinsantin allin maqanakuq soldadonkunaqa Filistea runakunawan maqanakuspa chay runakunaq karpakusqanman jaykurqanku, jinaspa Belén llaqta punkupi kaq pozomanta unuta apamurqanku, chaytataq Davidman aparqanku. Davidmi ichaqa mana ujayta munarqanchu, jinan Jehová Diospaq pampaman jich’apurqan.
19 Jinaspan nirqan: “Noqaqa Diosniytan manchakuni manapunin jayk’aqpas kay unutaqa ujaymanchu, kay runakunaqa kausayninkuta peligroman churasparaqmi unuta apamurqanku, kay unuqa paykunaq yawarnin jinan,+ manan ujaymanchu”, nispa. Jinan Davidqa chay unuta mana ujarqanchu. Chaykunatan Davidpa kinsantin allin maqanakuq soldadonkunaqa ruwarqanku.
20 Chaymantapas kinsa maqanakuqkunan kallarqantaq, paykunamanta jujninmi karqan Joabpa+ wayqen Abisái,+ paytaqmi karqan umallinku. Paymi kinsa pachaj runakunata lanzanwan wañuchirqan, payqa allin reqsisqan karqan ñaupaq kaq kinsa kallpasapa allin maqanakuq runakuna jina.+
21 Chay kinsa maqanakuq runakunamantaqa Abisaimi aswan allin maqanakuq karqan, paytaqmi paykunaq umallinpas karqan. Ichaqa manan igualaqchu ñaupaq kaq kinsa kallpasapa allin maqanakuq runakunamanqa.
22 Jehoiadapa churin Benayaqa+ mana manchakuq runan karqan,* paymi Cafzel+ llaqtapi admiranapaq ruwaykunata ruwarqan. Paymi Moab llaqtayoq Arielpa iskaynin churinkunata wañuchirqan. Jinaspapas juj p’unchaymi rit’ishaqtin juj pozoman jaykuruspa juj leonta wañuchirqan.+
23 Chaymantapas Benayaqa Egipto llaqtayoq jatunkaray runatan wañuchillarqantaq. Chay runaq sayayninmi karqan iskay metro más.*+ Chay runaqa juj lanzayoqmi kasharqan, chay lanzanpa mangonqa telarpi k’uyuna k’aspi jinan jatun karqan,+ Benayan ichaqa juj k’aspillayoq kasharqan. Chaywanpas Benayaqa chay runaq lanzantan qechururqan, jinaspa chay lanzawan wañuchipurqan.+
24 Chaykunatan Jehoiadapa churin Benayaqa ruwarqan. Payqa allin reqsisqan karqan ñaupaq kaq kinsa kallpasapa allin maqanakuq runakuna jina.
25 Benayaqa kinsa chunka maqanakuqkunamanta aswan allin maqanakuqña karqan chaypas, manan igualarqanchu kinsa kallpasapa allin maqanakuqkunamanqa.+ Chhaynaña kaqtinpas Davidqa payta cuidaq guardiakunaq umallintan Benayataqa churarqan.
26 Allin kallpasapa maqanakuq soldadokunan kaykuna karqan: Joabpa wayqen Asael,+ Belén llaqtamanta Dodopa churin Elanán,+
27 Aroj runa Samoj, pelonita runa Élez,
28 Tecoa llaqtayoq Iquespa churin Irá,+ Anatoj llaqtayoq Abí-Ézer,+
29 Jusá runa Sibecái,+ Aojí runa Ilái,
30 Netofá llaqtayoq Marái,+ Netofá llaqtayoq Banapa churin Hélej,+
31 Benjamín ayllupi+ kaq Guibeá llaqtamanta Ribaipa churin Itái, Piratón llaqtayoq Benaya,
32 Gas wayq’okunamanta+ Urái, Bej-Arabá llaqtayoq Abiel,
33 Baurin llaqtayoq Azmávej, Salbin llaqtayoq Eliabá,
34 guizonita runa Jasenpa churinkuna, ararita runa Saguepa churin Jonatán,
35 ararita runa Sacarpa churin Ajiam, Urpa churin Elifal,
36 mekeratita runa Héfer, pelonita runa Aíya,
37 Carmelo llaqtayoq Ezró, Ezbaipa churin Narái,
38 Natanpa wayqen Joel, Agripa churin Mibar,
39 Anmón runa Zélec, Beroj llaqtayoq Najarái, paymi karqan Zeruyapa churin Joabpa arma apaysiqnin;
40 Jéter runa Irá, Jéter runa Garef,
41 Het runa Urías,+ Alaipa churin Zabaj,
42 Rubén ayllumanta Sizapa churin Adiná, Adinaqa Rubén ayllu runakunaq umallinmi karqan, paywanmi kasharqanku kinsa chunka runakuna;
43 Macapa churin Janán, mijnita runa Josafaj,
44 Astaroj llaqtayoq Uzía, Aroer llaqtamanta Hotanpa churinkuna Samawan Jeielpiwan;
45 Sinripa churin Jediael, Jediaelpa wayqen Joá, Joaqa karqan tizita runan;
46 majavita runa Eliel, Elnanpa churinkuna Jeribaiwan Josaviaspiwan, Moab runa Ijmá;
47 Eliel, Obed, mezobaíta runa Jasielpiwan.
Uraypi willakuykuna
^ Chaypiqa “yawarniykin kayku” nillanmantaqmi.
^ Chaypiqa “kuraq runakunan” nillanmantaqmi.
^ Qhaway Explicasqa simikuna nisqapi “Ejercitokunata kamachiq Jehová Dios” nisqata.
^ Chaypiqa “atipachirqan” nillanmantaqmi.
^ Hebreo rimaypiqa “mana manchakuq runaq churinmi karqan” ninmi.
^ Hebreo rimaypiqa “pisqa codo” ninmi. Qhaway “Astawan yachanapaq B14” nisqata.
