1 Crónicas 12:1-40
-
Davidta rey kananpaq yanapaqkunamanta (1-40)
12 Quispa churin Saulmantan+ Davidqa Ziclag+ llaqtapi pakakusharqan, chay tiempopin kay runakuna Davidta yanapaq rirqanku. Chay runakunaqa Davidpa kallpasapa soldadonkunawan kuskan guerrakunapi payta yanaparqanku.+
2 Paykunaqa flechana arcokunayoqmi karqanku. Paña makinkuwanpas lloq’e makinkuwanpas+ allintan rumita ch’aqeqku+ flechatapas flechaqku. Paykunaqa Benjamín+ ayllumantan karqanku Saulpa wayqenkuna.*
3 Paykunaq umallinkun karqan Ayezerwan Joaspiwan, paykunaqa Guibeá+ llaqtayoq Semapa churinkunan karqanku. Chaymantapas kay runakunan Davidta yanaparqanku: Azmavejpa+ churinkuna Jezielwan Pelejpiwan, Beracá, Anatoj llaqtayoq Jehú,
4 Gabaón+ llaqtayoq Ismayá (Ismayaqa kinsa chunka allin maqanakuqkunamanta jujninmi+ karqan, paytaqmi umallirqanpas), Jeremías, Jaziel, Joanán, Guederamanta Jozabaj,
5 Eluzái, Jerimoj, Bealías, Semarías, Arif runa Sefatías,
6 Elcaná, Isías, Azarel, Corepa mirayninkuna+ Joezerwan Jasobeanpiwan,
7 jinallataq Guedor llaqtayoq Jeroanpa churinkuna Joelawan Zebadiaspiwan.
8 Chaymantapas Gad ayllumantan wakin runakuna Davidta yanapaq rirqanku Ziclag llaqtapi pakakushaqtin.+ Chay runakunapas karqanku allin kallpasapa soldadokunan, guerrapaq allin preparasqa, jark’apakuna jatun escudokunayoq lanzakunayoq ima. Chay runakunaq uyanqa leonkunaq uyan jinan karqan, orqo patapi tarukakuna jinataqmi usqhaylla phawaqkupas.
9 Paykunaq umallinmi karqan Ézer. Iskay kaqtaq karqan Abdías, kinsa kaqtaq karqan Eliab,
10 tawa kaqtaq karqan Mismaná, pisqa kaqtaq karqan Jeremías,
11 soqta kaqtaq karqan Atái, qanchis kaqtaq karqan Eliel,
12 pusaq kaqtaq karqan Joanán, isqon kaqtaq karqan Elzabaj,
13 chunka kaqtaq karqan Jeremías, chunka jujniyoq kaqtaq karqan Macbanái.
14 Chay Gad ayllu runakunaqa+ soldadokunaq umallinkunan karqanku. Pisi kallpayoq kaqmi pachaj soldadokuna jina karqan, aswan kallpasapa kaqtaq waranqa soldadokuna jina karqan.+
15 Chay runakunan ñaupaq kaq killapi Jordán mayuta chimparqanku askha unuyoq kashaqtin, jinaspan wayq’o pampapi tiyaq runakunata llapankuta ch’eqerichirqanku, wakinta inti lloqsimuy ladoman wakintataq inti jaykuy ladoman.
16 Chaymantapas Benjamín ayllumanta Judá ayllumanta wakin runakunan Davidpa pakakusqanman+ rirqanku payta yanapanankupaq.
17 Jinan Davidqa paykunawan tupaq rispa nirqan: “Sichus yanapawanaykichispaq jamushankichis chayqa amigoykunan kankichis, ichaqa mana juchayoq kashaqtiychus enemigoykunaq makinman entregawanaykichispaq jamushankichis chayqa ñaupa taytanchiskunaq Diosnin justiciata ruwachun”,+ nispa.
18 Jinan Diospa atiyninqa Amasaiman junt’aykurqan,+ payqa kinsa chunka soldadokunaq umallinmi karqan, paymi Davidta nirqan:
“Wiraqochayku David, qanpaqmi kayku; Jesepa churin,+ qantan yanapasaykiku.
Thajlla kausaychis qanpas yanapaqniykikunapas,Diosniykin qantaqa yanapashasunki”,+ nispa.
Chaymi Davidqa paykunata chaskirqan jinaspa soldadonkunaq umallinta churarqan.
19 Chaymantapas Manasés ayllumantan wakin runakuna Davidta yanapallarqankutaq. Paykunan Davidta yanapaq rirqanku Filistea soldadokuna Saúl contra maqanakuq rishaqtin. Davidqa Filistea soldadokunawan kuskan risharqan. Filistea runakunaq umallinkunan+ ichaqa paykunapura rimanakuspa Davidta wijch’umpurqanku chaymi payqa Filistea runakunata mana yanaparqanchu. Chay umallikunan nirqanku: “Paqtapas Saulman kutipunman jinaspa noqanchis contra sayarispa wañuchiwasunman”,+ nispa.
20 Ziclag+ llaqtaman David kutipuqtinmi Manasés ayllumanta+ kay runakuna yanapaq rirqanku: Ajná, Jozabaj, Jediael, Miguel, Jozabaj, Elihú, Ziletaipiwan. Paykunaqa sapankankun karqanku waranqa runakunaq umallinkuna.
21 Paykunan Davidta yanaparqanku suwa t’aqa soldadokunawan maqanakuqtin. Paykunaqa mana manchakuq kallpasapa soldadokunan karqanku,+ jinan Davidpa soldadonkunaq umallin kapurqanku.
22 Sapa p’unchaymi runakuna chayamuqku Davidta+ yanapanankupaq, chhaynapin Davidpa ejercitonqa sinchi askha kapurqan Diospa ejerciton jinaraq.+
23 Soldadokunaq umallinkunan Hebrón+ llaqtaman rirqanku Saulpa kamachikuyninta Davidman qopunankupaq, chaytaqa ruwarqanku Jehová Diospa kamachisqanman jinan.+ Paykunaqa askhan karqanku.
24 Judá ayllumantan karqanku soqta waranqa pusaq pachaj runakuna, paykunaqa jark’apakuna jatun escudokunayoq lanzakunayoq iman karqanku guerraman rinankupaq jina allin preparasqa.
25 Simeón ayllumantataq karqanku qanchis waranqa pachaj runakuna, paykunaqa allin kallpasapa mana manchakuq soldadokunan karqanku.
26 Leví ayllumantataq karqanku tawa waranqa soqta pachaj runakuna.
27 Jehoiadami+ karqan Aaronpa+ churinkunaq umallin, paywanmi kasharqan kinsa waranqa qanchis pachaj runakuna,
28 jinallataq kallpasapa mana manchakuq Sadoc+ wayna, paywanmi jamurqanku iskay chunka iskayniyoq familianmanta umallikuna.
29 Benjamín ayllumantataq jamurqanku kinsa waranqa runakuna Saulpa+ wayqenkuna.* Paykunaqa yaqa llapankun ñaupaqpi Saulta familiantawan yanaparqanku.
30 Efraín ayllumantataq jamurqanku 20.800 runakuna; paykunaqa karqanku mana manchakuq kallpasapa runakunan, familiankupi allin respetasqa.
31 Kuskan Manasés ayllumantataq jamurqanku chunka pusaqniyoq waranqa runakuna, paykunan Davidta reyta churanankupaq ajllasqa karqanku.
32 Isacar ayllumantataq jamurqanku iskay pachaj umallikuna, paykunaqa allintan repararqanku imachus chay tiempopi pasashasqanta imatachus Israel runakuna ruwananku kasqantapas. Llapa wayqenkutaq* paykunata kasukuqku.
33 Zabulón ayllumantataq jamurqanku pisqa chunka waranqa runakuna, paykunaqa guerraman rinankupaq allin preparasqan karqanku, armankupas imaymana clasen karqan. Llapa chay soldadokunaqa tukuy sonqomantan Davidta yanaparqanku.*
34 Neftalí ayllumantataq jamurqanku waranqa umallikuna, paykunawan kuskataq kasharqan kinsa chunka qanchisniyoq waranqa soldadokuna jark’apakuna jatun escudokunayoq lanzakunayoq ima.
35 Dan ayllumantataq jamurqanku 28.600 soldadokuna, paykunaqa liston kasharqanku maqanakuyman rinankupaq.
36 Aser ayllumantataq jamurqanku tawa chunka waranqa soldadokuna, paykunapas liston kasharqanku maqanakuyman rinankupaq.
37 Jordán mayu chimpamantataq+ jamurqanku Rubén ayllumanta Gad ayllumanta kuskan Manasés ayllumantawan pachaj iskay chunka waranqa soldadokuna, paykunaqa imaymana clase armantinmi jamurqanku.
38 Tukuy chay runakunan juj yuyaylla Hebrón llaqtaman jamurqanku Davidta Israelpi reyta churanankupaq, chay runakunaqa guerraman rinankupaq allin preparasqan karqanku. Wakin Israel runakunapas munarqankun David rey kananta.*+
39 Judá ayllu runakunan imaymanata paykunapaq ruwarqanku, chaymi chay runakunaqa llapanku Davidwan kinsa p’unchay chaypi qhepakurqanku mijuspa ujaspa.
40 Chaymantapas mijunatan apamurqanku chay qayllapi tiyaq runakuna, apamullarqankutaqmi Isacar ayllumanta, Zabulón ayllumanta, Neftalí ayllumantapas. Paykunan apamurqanku jak’uta, higosmantawan pasasmantawan tortakunata,* vinota, aceiteta ima. Chaykunatan apamurqanku asnokunapi, camellokunapi, mulakunapi, torokunapi ima. Chaymantapas apamullarqankutaqmi askha wakakunata ovejakunata. Tukuy chaykunatan apamurqanku Israelpi ancha kusikuy kasqanrayku.
Uraypi willakuykuna
^ “Saulpa wayqenkuna” nispaqa nishan kikin ayllumanta kasqankuraykun.
^ “Saulpa wayqenkuna” nispaqa nishan kikin ayllumanta kasqankuraykun.
^ “Llapa wayqenkutaq” nispaqa nishan kikin ayllumanta kasqankuraykun.
^ Chaypiqa “Davidta yanapaq jamuq runakunaqa manan mayqenpas iskay uyaqa karqanchu” nillanmantaqmi.
^ Hebreo rimaypiqa “juj sonqollan kasharqanku David rey kananpaq” ninmi.
^ Chay tortakunaqa pasas purullamanta otaq higos purullamanta k’umpasqan karqan.
