1 Crónicas 13:1-14
13 Davidmi rimarqan waranqa soldadokunaq umallinkunawan, pachaj soldadokunaq umallinkunawan, llapa umallikunawan ima.+
2 Chaymantataq Davidqa llapa Israel runakunata nirqan: “Sichus qankuna munankichis Jehová Diospas munanqa chayqa, juj willakuyta apachisun Israelpi tiyaq wakin llaqtamasinchiskunaman, sacerdotekunaman, Leví runakunaq tiyasqanku llaqtakunamanpas.*+ Chhaynapi paykuna kayman jamunankupaq.
3 Jinaspa Diospa rimanakuynin arcata apakampusun”,+ nispa. Saulpa kamachikusqan p’unchaykunapiqa Diospa rimanakuynin arcataqa manan cuidaqkuchu jinatan qhawarpariqku.+
4 Chayta uyarispan llapa Israel runakunaqa nirqanku: “¡Allinmi kanman!”, nispa.
5 Jinan Davidqa juñumurqan Egipto mayumanta* Lebó-Amajkama*+ tiyaq llapa Israel runakunata, chhaynapi Quiryaj-Jearin+ llaqtamanta Diospa rimanakuynin arcata apamunankupaq.
6 Chaymantataq Davidqa llapa Israel runakunapiwan rirqanku Judá ayllupi kaq Balá llaqtaman,+ chay llaqtataqa Quiryaj-Jearin nikullantaqmi. Chay llaqtatan rirqanku Jehová Diospa rimanakuynin arcata apamunankupaq, payqa querubín angelkuna patapi* kaq trononpin tiyan.+ Chay rimanakuy arcapin runakunaqa Diospa sutinta wajakunku.
7 Chaymantataq Diospa rimanakuynin arcata mosoq carretaman churarqanku,+ jinaspa Abinadabpa wasinmanta apamurqanku. Chay carretataqa Juzawan Aiyowanmi aparqanku.+
8 Davidpas llapa Israel runakunapas ancha kusisqan Diospa ñaupanta risharqanku. Paykunan rirqanku arpakunata, cuerdayoq tocanakunata, tamborkunata,+ platillokunata,+ trompetakunata+ tocaspa takispa ima.
9 Kidón era pataman* chayaqtinkutaq carreta aysamuq torokunaqa yaqalla Diospa rimanakuynin arcata urmachirqanku, jinan Juzaqa makinwan ayparuspa chay rimanakuy arcata jap’irurqan.
10 Chaymi Jehová Diosqa Juzapaq sinchita phiñakurqan makinwan rimanakuy arcata jap’irusqanrayku,+ jinan Diosqa kaq ratupacha payta wañuchipurqan. Chhaynapin Juzaqa Diospa ñaupanpi wañupurqan.+
11 Davidmi ichaqa Jehová Diospaq sinchita phiñakurqan Juzata chhaynata wañuchisqanrayku. Chaymi chay cheqasta kunankama sutichakun Pérez-Juzá* nispa.
12 Chay p’unchaymi Davidqa Diospaq manchasqa kasharqan, chaymi nirqan: “Chhaynaqa, ¿imaynatataq Diospa rimanakuynin arcatari tiyasqayman apasaq?”,+ nispa.
13 Chaymi Davidqa Diospa rimanakuynin arcata mana aparqanchu tiyasqan llaqtaman, Davidpa Llaqtan nisqaman. Aswanpas Gaj* llaqtayoq Obed-Edompa wasinmanmi apachirqan.
14 Diospa rimanakuynin arcaqa kinsa killañan Obed-Edompa wasinpi kasharqan. Jehová Diostaq Obed-Edompa wasinpi kaqkunata kaqninkunatapas bendecisharqan.+
Uraypi willakuykuna
^ Hebreo rimaypiqa “pasto pampakunayoq llaqtakunamanpas” ninmi.
^ Chaypiqa “Egiptopi kaq Siormanta” nillanmantaqmi.
^ Chaypiqa “Amajman jaykunakama” nillanmantaqmi.
^ Chaypiqa yaqapaschá “chaupipi” nillanmantaq.
^ Era patataqa “wayrachina pata” nillankutaqmi.
^ Pérez-Juzá sutiqa “Juzá contra k’araqta phiñakuy” ninantan nin.
^ Chaypiqa yaqapaschá Gaj-Rimón llaqtamanta rimashan.
