1 Crónicas 14:1-17
14 Tiro llaqtaq reynin Hirammi+ willaqkunata Davidman kacharqan. Davidpa wasinta* ruwapunankupaqtaq kacharqan wasi sayarichiqkunata maderawan llank’aqkunata ima, chaymantapas cedro maderakunatan apachirqan.+
2 Jinan Davidqa repararqan Jehová Diospuni kamachikuyninta Israel llaqtapi tajyachisqanta,+ Israel llaqtanrayku kamachikuyninta jatunchasqantapas.+
3 Davidqa Jerusalén llaqtapin askha esposakunata yapakurqan,+ chay esposankunapin churinkunapas ususinkunapas kallarqantaq.+
4 Jerusalén llaqtapi naceq wawankunaqa kaykunan+ karqan: Samúa, Sobaf, Natán,+ Salomón,+
5 Ibar, Elisúa, Elpélej,
6 Noga, Néfeg, Jafía,
7 Elisamá, Beliadá, Elifelejpiwan.
8 Davidta Israelpi reyta churasqankuta yacharuspan+ Filistea runakunaqa Davidwan maqanakuq rirqanku.+ Chayta yacharuspan Davidqa Filistea runakunawan maqanakuq rillarqantaq.
9 Filistea runakunaqa Refaín wayq’oman+ chayamuspan chaypi tiyaq runakunawan maqanakurqanku.
10 Jinan Davidqa Diosta tapurqan: “¿Risaqchu Filistea runakunawan maqanakuq? ¿Makiymanchu paykunata entregawanki?”, nispa. Jehová Diostaq nirqan: “¡Arí, rillay! Noqan makiykiman chay runakunata entregasayki”,+ nispa.
11 Chaymi Davidqa Baal-Perazinman+ rispa Filistea runakunata atipamurqan. Chay qhepamanmi Davidqa nirqan: “Diosmi enemigoykunata makiywan atipan, imaynan mayu unu perqata thunin jinaraq”, nispa. Chaymi chay cheqasta suticharqanku Baal-Perazin nispa.
12 Filistea runakunaqa chaypin diosninkuta saqerparipurqanku, jinan Davidqa kamachirqan chay diosninkuta kanapunankupaq.+
13 Chaymantataq Filistea runakunaqa jujmanta Refaín wayq’oman jamullarqankutaq Israel runakunawan maqanakuq.+
14 Jinan Davidqa jujmanta Diosta tapullarqantaq, Diosmi ichaqa nirqan: “Ama uyapura tupaqqa riychu, aswanpas qhepankuta muyuramuy, jinaspa bacá nisqa sach’a-sach’a ukhumanta lloqsimuspa phawaykunki.+
15 Bacá nisqa sach’akunaq umanpa kuyusqanmi runaq purisqan jina uyarikunqa, chayta uyarispan maqanakuq lloqsinki. Chay ratun noqaqa ñaupaykita lloqsisaq Filistea soldadokunata atipanaypaq”,+ nispa.
16 Jinan Davidqa Diospa kamachisqanman jina ruwarqan,+ chhaynapin Filistea soldadokunata qatipaspa wañuchirqanku Gabaón llaqtamanta Guézer llaqtakama.+
17 Davidqa allin reqsisqan kapurqan llapa nacionkunapi. Davidtaqa Jehová Diosmi yanaparqan chaymi tukuy nacionmanta runakunaqa payta manchakurqanku.+
Uraypi willakuykuna
^ Chaypiqa “palacionta” nillanmantaqmi.
