1 Crónicas 15:1-29
15 Davidpa Llaqtan nisqapin Davidqa wasikunata paypaq jatarichishallarqan. Chaymantapas Diospa rimanakuynin arcapaqmi juj parteta t’aqarqan jinaspa chaypi karpata ruwapurqan.+
2 Jinan Davidqa nirqan: “Leví ayllu runakunallan Diospa rimanakuynin arcataqa apanqa. Paykunatan Jehová Diosqa ajllarqan rimanakuy arcata apanankupaq, wiñaypaq Jehová Diosta servinankupaqpas”,+ nispa.
3 Chaymantataq Davidqa llapa Israel runakunata Jerusalén llaqtapi juñurqan, chhaynapi ruwachisqan karpaman Jehová Diospa rimanakuynin arcata apamunankupaq.+
4 Davidmi wajachimurqan Aaronpa mirayninkunata+ Leví ayllu runakunatawan.+
5 Cohatpa mirayninmantan wajachimurqan umalli Urielta pachaj iskay chunka wayqenkunatawan,
6 Meraripa mirayninmantataq wajachimurqan umalli Asayata+ iskay pachaj iskay chunka wayqenkunatawan,
7 Guersompa mirayninmantataq wajachimurqan umalli Joelta+ pachaj kinsa chunka wayqenkunatawan,
8 Elizafanpa+ mirayninmantataq wajachimurqan umalli Semayata iskay pachaj wayqenkunatawan,
9 Hebronpa mirayninmantataq wajachimurqan umalli Elielta pusaq chunka wayqenkunatawan,
10 Uzielpa+ mirayninmantataq wajachimurqan umalli Aminadabta pachaj chunka iskayniyoq wayqenkunatawan.
11 Chaymantataq Davidqa paypa kasqanman wajachirqan sacerdote Sadocta+ sacerdote Abiatartawan,+ jinallataq Leví ayllumanta Urielta, Asayata, Joelta, Semayata, Elielta, Aminadabtawan.
12 Jinan Davidqa paykunata nirqan: “Qankunaqa Leví ayllu runakunaq umallinmi kankichis. Ch’uyanchakuychis qankunapas wayqeykichiskunapas, jinaspa Israelpa Diosnin Jehová Diospa rimanakuynin arcata apamuychis ruwasqay karpaman.
13 Ñaupaq kaq kutipiqa manan qankunatachu nirqaykiku Diospa rimanakuynin arcata apamunaykichispaq,+ jinaspapas manan Diospa kamachisqanman jinachu apamurqayku,+ chaymi Jehová Diosqa sinchita noqaykupaq phiñakurqan”,+ nispa.
14 Jinan sacerdotekunapas Leví ayllu runakunapas ch’uyanchakurqanku Israelpa Diosnin Jehová Diospa rimanakuynin arcata apamunankupaq.
15 Chaymantataq Leví ayllu runakunaqa Moisespa kamachisqanman jina Diospa rimanakuynin arcata rijrankupi apamurqanku.+ Chhaynatan Jehová Diosqa Moisesta kamachirqan.
16 Davidtaq Leví ayllu umallikunata nirqan wayqenkuna takinankupaq, wakintaq cuerdayoq tocanakunata, arpakunata,+ platillokunata+ tocanankupaq.
17 Jinan Leví ayllu umallikunaqa takiqkunata umallinankupaq nirqanku Joelpa churin Emanta,+ Berekiaspa churin Asafta,+ Cusayapa churin Etantawan,+ Etanqa Meraripa mirayninmantan karqan.
18 Paykunawan kuskan kasharqanku iskay kaq t’aqamanta wayqenku,+ paykunan karqanku: Zacarías, Ben, Jaziel, Semiramoj, Jeyel, Uní, Eliab, Benaya, Maseya, Matitías, Elifelu, Micneyá, Obed-Edom, Jeielpiwan. Obed-Edomwan Jeielwanqa punku qhawaqkunan karqanku.
19 Cobremanta platillokunatan+ tocarqanku Emanwan,+ Asafwan,+ Etanpiwan.
20 Ñañu kunkawan takinapaq*+ jina afinasqa tocanakunatataq tocarqanku Zacarías, Aziel, Semiramoj, Jeyel, Uní, Eliab, Maseya, Benayapiwan.
21 Rakhu kunkawan takinapaq*+ jina afinasqa arpakunatataq tocarqanku Matitías,+ Elifelu, Micneyá, Obed-Edom, Jeiel, Azaziaspiwan. Paykunan takiqkunatapas tocaqkunatapas pusariqku.
22 Leví ayllu runakunaq umallin Kenaniastaq+ encargakurqan Diospa rimanakuynin arcata apanankupaq, payqa allintan chay ruwayta yacharqan.
23 Berekiaswan Elcanawantaq encargasqa karqanku Diospa rimanakuynin arcata cuidanankupaq.
24 Sacerdotekunataq cheqaq Diospa rimanakuynin arcaq ñaupanpi trompetakunata fuerteta tocarqanku,+ paykunan karqanku: Sebanías, Josafaj, Netanel, Amasái, Zacarías, Benaya, Eliezerpiwan. Chaymantapas Diospa rimanakuynin arcatan cuidallaqkutaq Obed-Edomwan Jeiaspiwan.
25 Chaymantataq Davidqa Israelpi umalliqkunawan,* waranqa runakunaq umallinkunapiwan kusisqa rirqanku Jehová Diospa rimanakuynin arcata Obed-Edompa wasinmanta apamunankupaq.+
26 Jehová Diosmi Leví ayllu runakunata yanaparqan rimanakuy arcata apanankupaq, chaymi paykunaqa sacrificiopi jaywarqanku qanchis malta torokunata qanchis orqo ovejakunatawan.+
27 Davidqa munay p’achayoqmi kasharqan, chay p’achaqa karqan mana makiyoqmi; chhaynan kashallarqantaq Diospa rimanakuynin arcata apaq Leví ayllu runakunapas, takiqkunapas, Kenaniaspas. Kenaniasmi umallirqan rimanakuy arca apaqkunata takiqkunatawan. Chaymantapas Davidqa linomanta unkuwan* churasqan kasharqan.+
28 Llapa Israel runakunan Jehová Diospa rimanakuynin arcata apamusharqanku oveja waqrakunata, trompetakunata,+ platillokunata, arpakunata,+ cuerdayoq tocanakunata fuerteta tocaspa, kusisqa qaparispanku ima.+
29 Jehová Diospa rimanakuynin arcata Davidpa Llaqtan nisqaman chayachiqtinkutaq,+ Saulpa ususin Micalqa+ ventanamanta qhawarimuspa rey Davidta rikumurqan. Davidqa kusikuymantan salta-saltarispa tususharqan. Chayta rikuspan Micalqa Davidta sonqonpi pisicharqan.+
Uraypi willakuykuna
^ Chaypiqa “kuraq runakunawan” nillanmantaqmi.
^ Unkuqa jatun suéter otaq chaleco jinan karqan. Qhaway “Astawan yachanapaq B5” nisqata.
