1 Crónicas 16:1-43
16 Diospa rimanakuynin arcataqa Davidpa ruwachisqan karpamanmi churarqanku.+ Chaymantataq Diosman jaywarqanku ruphachina ofrendakunata sumaq kausay sacrificiokunatawan.+
2 Chay ruphachina ofrendakunata+ sumaq kausay sacrificiokunatawan+ jaywayta tukuspataq Davidqa Jehová Diospa sutinpi llapa runakunata bendecirqan.
3 Llapa Israel runakunamantaq warmimanpas qharimanpas qorqan juj muyu t’antata, datilmanta juj tortata, pasasmanta juj tortatawan.*
4 Chaymantataq wakin Leví ayllu runakunata ajllarqan Jehová Diospa rimanakuynin arcaq ñaupanpi Israelpa Diosnin Jehová Diosta servinankupaq,+ yupaychanankupaq, graciasta qonankupaq, jatunchanankupaq ima.
5 Takiqkunaq umallinmi karqan Asaf,+ payman qatiq umallitaq karqan Zacarías. Arpatawan cuerdayoq tocanakunatawantaq tocarqanku:+ Jeiel, Semiramoj, Jeyel, Matitías, Eliab, Benaya, Obed-Edom, Jeielpiwan;+ Asaftaq platillota tocarqan.+
6 Sacerdote Benayawan sacerdote Jazielwantaq Diospa rimanakuynin arcaq ñaupanpi sapa kuti trompetata tocaqku.
7 Chay p’unchaymi Davidqa Jehová Diosta agradecekuspa juj takita paypaq ruwapurqan, chaytan takirqanku Asafwan+ wayqenkunapiwan. Davidpa ruwasqan takitaqa chay kutillapiraqmi paykunaqa takirqanku. Chay takin nin:
8 “¡Jehová Diosman graciasta qoychis,+ sutinmanta wajakuychis,imakunachus ruwasqanta llaqtakunaman willamuychis!+
9 Payman takiychis, jatunchay takikunata takiychis,*+llapa musphanapaq ruwasqankunapi yuyaymanaychis.*+
10 Ch’uya sutinmanta kusisqa rimaychis.+
Jehová Diosta maskhaqkunaq sonqon kusikuchun.+
11 Jehová Diosta maskhaychis,+ paypa kallpanpi confiaychis.
Tukuy tiempo paypa yanapayninta maskhaychis.+
12 Musphanapaq ruwaykuna ruwasqanta yuyariychis,+yuyariychis imaymana milagrokuna ruwasqanta, chaninchayninkunatapas.
13 Tukuy chaykunata yuyariychis, kamachin Israelpa mirayninkuna,+tukuy chaykunata yuyariychis, Diospa ajllakusqan Jacobpa churinkuna.+
14 Payqa Jehová Diosmi, paymi Diosninchisqa.+
Paypa chaninchayninkunaqa llapa kay pachantinpin kashan.+
15 Ama jayk’aqpas qonqaychischu qankunawan rimanakusqanta,ama jayk’aqpas qonqaychischu promesa ruwasqasuykichista.+
16 Ama qonqaychischu Abrahanwan rimanakusqanta,+ama qonqaychischu Isaacman jurasqanta;+
17 chay rimanakuytan kamachikuyta jina Jacobman qorqan,+Israelpaqmi wiñaypaq rimanakuyta jina churarqan.
18 Paytan nirqan: Canaán jallp’atan qanman qosayki,+chay jallp’an qankunaq herenciaykichis kanqa,+ nispa.
19 Chayta prometeshaqtinqa pisillaraqmi kasharqanku,chay jallp’apipas forastero jinallan purisharqanku.+
20 Paykunaqa llaqtan-llaqtantan purirqanku,juj nacionmanta juj nacionmanmi purirqanku.+
21 Diosqa manan munarqanchu pipas paykunata ñak’arichinanta,+chaymi payqa reykunatapas anyarqan.+
22 Nirqanmi: Aman ajllakusqaykunataqa llamiykunkichischu,aman profetaykunataqa imanankichispaschu,+ nispa.
23 ¡Llapa kay pachapi tiyaqkuna, Jehová Diosman takiychis!
¡Libraq kasqanmanta sapa p’unchay willaychis!+
24 May jatun kasqanta nacionkuna ukhupi willaychis,musphanapaq ruwaykuna ruwasqanta llapa llaqtakuna ukhupi willaychis.
25 Jehová Diosqa may jatunmi, alabanapaq jinapunin.
Payqa llapa dioskunamantapas aswan manchanapunin.+
26 Llaqtakunaq llapa diosninkuqa yanqan mana valeqmi,+Jehová Diosmi ichaqa janaq pachata kamaqqa.+
27 Payqa ancha jatun kaywan, k’anchaywan muyuykusqan kashan;+paypa tiyasqanpiqa kallpawan kusikuywanmi kashan.+
28 Pachantinpi familiakuna, Jehová Diosman imachus qonaykichista qoychis,Jehová Diosqa ancha jatunmi, atiyniyoqtaqmi kanpas,+payman jatunchaytapas alabaytapas qoychis.
29 Jehová Diospa sutinta jatunchaychis,+regalokunantin payman jamuychis.+
Ch’uya p’achayoqkama Jehová Diosman k’umuykuychis.*+
30 ¡Llapa kay pacha runakuna, Diospa ñaupanpi khatatataychis!*
Kay pachaqa allin tajyachisqan kashan, manan imapas chaytaqa kuyurichinmanchu.+
31 Janaq pacha kusikuchun, kay pacha kusikuchun;+llapa nacionkuna ukhupi willamuychis: ¡Jehová Diosmi rey kapun!,+ nispa.
32 Lamar-qochapas chaypi kaqkunapas kusikuymanta qaparichunku,campokunapas chaypi kaqkunapas kusikuchunku.
33 Sach’akunapas Jehová Diospa ñaupanpi kusikuymanta qaparichunku,payqa kay pachata juzgaqmi jamushan.
34 Jehová Diosta gracias niychis, payqa sumaq sonqo Diosmi;+mana tukukuq munakuyninqa* wiñay-wiñaypaqmi.+
35 Diosta niychis: Diosniyku, librawayku,+waj nación runakunaq makinmanta kacharichiwayku,nacionkunamanta juñumuwayku,chhaynapi ch’uya sutiykita jatunchanaykupaq,+kusisqa sonqowan qanta jatunchanaykupaq.+
36 Jatunchasqa kachun Israelpa Diosnin Jehová Diosqa,wiñay-wiñaypaq alabasqa kachun, nispa”.
Jinan llaqtantin runakunaqa nirqanku: “¡Amén!”,* nispa. Chaymantataq Jehová Diosta yupaychayta qallarirqanku.
37 Chay qhepamantaq Davidqa Asafta+ wayqenkunatawan churarqan Jehová Diospa rimanakuynin arcaq ñaupanpi+ sapa p’unchay servinankupaq.+
38 Punku qhawaqtataq churarqan Obed-Edomta wayqenkunatawan, llapanpiqa soqta chunka pusaqniyoqmi karqanku. Chaymantapas punku qhawaqtan churallarqantaq Josatawan Jedutunpa churin Obed-Edomtawan.
39 Sacerdote Sadoctaq+ sacerdotemasinkunapiwan Gabaonpi+ kaq Dios yupaychana patapi* kasharqanku. Chaypin paykunaqa Jehová Diospa karpanpa ñaupanpi kasharqanku
40 sapa tutamantan sapa tarden altar patapi ruphachina ofrendakunata Jehová Diosman jaywanankupaq, Jehová Diospa qosqan kamachikuyta junt’anankupaq ima. Chay kamachikuykunatan Diosqa Israelman qorqan.+
41 Paykunawanmi kasharqan Emán, Jedutún,+ wakin ajllasqa runakunapiwan. Paykunaqa takisqankuwanmi Jehová Diosta jatunchaqku.+ Paykunaqa “mana tukukuq munakuyninqa wiñay-wiñaypaqmi”+ nispan agradecekuspa takiqku.
42 Emanwan+ Jedutunwanmi chaypi kasharqanku trompetakunata, platillokunata, juj tocanakunatawan tocanankupaq, chhaynapi Diosta yupaychanankupaq. Jedutunpa+ churinkunataq punkuta qhawanankupaq churasqa karqanku.
43 Chaymantataq llapa runakuna wasinkuman ripurqanku, Davidtaq wasinpi kaqkunata bendecinanpaq ripurqan.
Uraypi willakuykuna
^ Chay tortakunaqa dátil purullamanta otaq pasas purullamanta k’umpasqan karqan.
^ Chaypiqa “paypaq musicata tocaychis” nillanmantaqmi.
^ Chaypiqa yaqapaschá “ruwasqankunata willaychis” nillanmantaq.
^ Chaypiqa “Jehová Diosta yupaychaychis” nillanmantaqmi.
^ Khatatataytaqa “kharkatiy” nillankutaqmi.
^ Qhaway Explicasqa simikuna nisqapi “Mana tukukuq munakuy” nisqata.
^ Chaypiqa “¡Chhayna kachun!” nillanmantaqmi.
^ Hebreo rimaypiqa “alto patapi” ninmi. Qhaway Explicasqa simikuna nisqapi “Yupaychana patakuna” nisqata.
