1 Crónicas 17:1-27
17 Davidqa wasinpiña* tiyashaspan profeta Natanta+ nirqan: “Noqaqa cedro maderamanta ruwasqa allin wasipin tiyashani,+ Jehová Diospa rimanakuynin arcataq ichaqa telamanta ruwasqa karpallapi kashan”,+ nispa.
2 Natantaq Davidta nirqan: “Sonqoykiq nisqanman jina ruway, Diosqa qanwanmi kashan”, nispa.
3 Chay tutapachan Diosqa Natanta nirqan:
4 “Phaway kamachiy Davidta nimuy: Kaytan Jehová Dios nin: Manan qanchu noqapaqqa wasita ruwapuwanki chaypi tiyanaypaqqa.+
5 Egiptomanta Israel llaqtayta orqomusqaymantapachaqa manan noqaqa juj wasipichu tiyarqani, aswanpas karpallapin tiyarqani may ladomanña chay karpata aparqanku chaypas.+
6 Israel runakunawan kashaspaqa manan jayk’aqpas noqaqa nirqanichu cedro maderamanta juj wasita ruwapuwanankupaqqa. Chaytaqa manan jayk’aqpas juezkuna churasqaytaqa nirqanichu.
7 ”Chaymantapas kamachiy Davidta nimuy: Kaytan ejercitokunata kamachiq Jehová Diosqa nin: Campopi oveja michisqaykimantan noqaqa orqomurqayki Israel llaqtayta umallinaykipaq.+
8 Maymanña rinki chaypas noqaqa qanwanmi kashasaq.+ Lliu enemigoykikunatan ñaupaykimanta chinkachisaq.+ Kay pachapi allin reqsisqa runakunaman jinan tukuchisayki.+
9 Israel llaqtaymanmi jallp’ata qosaq thaj tiyakunankupaq. Chaypin paykunata allinta tajyachisaq, manataqmi pipas tupaykunqachu. Millay runakunaqa manañan paykunataqa ñaupaqpi jinaqa ñak’arichinqakuchu,+
10 imaynan juezkunata churasqay tiempomantapacha ñak’arichirqanku jinataqa.+ Noqan llapa enemigoykikunata atipasaq.+ Chaymantapas noqan nirqayki: Noqa Jehová Diosmi familiaykita reykuna kanankupaq churasaq,* nispa.
11 ”Ñaupa taytaykikuna jina wañupuqtiykiqa, noqan familiaykimanta qanpa wawaykita reyta ajllasaq,+ paypa gobiernontan allinta tajyachisaq.+
12 Paymi juj wasita ruwapuwanqa.+ Noqataqmi wiñaypaq paypa gobiernonta tajyachisaq.+
13 Noqan taytan kasaq, paytaqmi waway kapunqa.+ Paytaqa munakushallasaqmi,*+ manan ñaupaykita kaq reyta jinachu paytaqa saqerparipusaq.+
14 Paytaqa tronoypin wiñaypaq tiyachisaq+ chaymi gobiernonqa wiñaypaq kanqa,+ nispa”.
15 Natanqa chaykuna uyarisqantan rijuriypi rikusqankunatan Davidman willarqan.
16 Chaymi rey Davidqa Jehová Diospa ñaupanpi tiyaykurqan, jinaspa nirqan: “Jehová Diosníy, ¿imataq noqari kani? ¿Imataq familiaypasri tukuy kaykunata noqaykupaq ruwanaykipaqri?+
17 Chaywanpas Diosníy, qanqa imaymanatañan noqapaq ruwashanki. Kunanpas niwallankitaqmi familiaymanta reykuna lloqsispa unaypaq kamachikunanta.+ Qanqa Jehová Diosníy, reykunaq wawanta jinaraqmi qhawariwanki.
18 Qanqa maytañan jatunchawanki Diosníy, kay kamachiykitaqa allintan reqsiwanki,+ imatawanñan astawan niykiman.
19 Jehová Diosníy, kay kamachiykiraykun munayniykiraykun qanqa tukuy kay admiranapaq kaqkunata ruwarqanki, chaywanmi atiyniyoq kasqaykita sut’ita rikuchirqanki.+
20 Jehová Diosníy, manan qan jinaqa pipas kanchu,+ uyarisqaykuman jinaqa manan juj Diosqa qan jinaqa kanchu.+
21 Diosnilláy, Israel llaqtayki jinaqa manan juj nacionqa kanchu.+ Qanllan cheqaq Diosqa kanki, qanmi paykunata llaqtayki kananpaq Egiptomanta orqomurqanki.+ Sutiykitan reqsichikurqanki admiranapaq kaqkunata ruwaspayki,+ juj nacionkunatapas llaqtaykiq ñaupanmanta wijch’uspayki.+
22 Qanmi Israel llaqtata ajllakurqanki wiñaypaq llaqtayki kananpaq.+ Jehová Diosníy, qanmi paykunaq Diosnin kapurqanki.+
23 Kunanqa Jehová Diosníy, amapuni qonqaychu noqamanpas familiaymanpas prometewasqaykikutaqa. Junt’aypuni imachus prometesqaykitaqa.+
24 Sutiykiqa wiñaypaq jatunchasqa kachun,+ chhaynapin runakuna ninqaku: Ejercitokunata kamachiq Jehová Diosmi Israel llaqtaq Diosninqa, paymi Israel runakunata kamachiqqa, nispa. Kay kamachiykiq familianpa gobiernontaq wiñaypaq tajyachisqa kachun.+
25 Diosníy, qanmi kay kamachiykiman sut’inchawarqanki: Familiaykitan reykuna kananpaq churasaq,* nispa. Chaymi mana manchakuspa mañakamushayki.
26 Jehová Diosníy, qanmi kanki cheqaq Diosqa. Qanmi kay kamachiykiman allin kaqkunata prometewarqanki.
27 Chhaynaqa kay kamachiykiq wasinta bendeciy, chhaynapi kamachikuynin wiñaypaq kananpaq. Qanmi Jehová Diosníy kay kamachiykiq familianpa gobiernonta bendecirqanki, chayraykun wiñaypaq bendecisqa kanqa”, nispa.
Uraypi willakuykuna
^ Chaypiqa “palacionpiña” nillanmantaqmi.
^ Hebreo rimaypiqa “juj wasita ruwapusayki” ninmi.
^ Chaypiqa “Paymanqa mana tukukuq munakuyniytan rikuchishallasaq” nillanmantaqmi. Qhaway Explicasqa simikuna nisqapi “Mana tukukuq munakuy” nisqata.
^ Hebreo rimaypiqa “Juj wasitan ruwapusayki” ninmi.
