1 Crónicas 19:1-19
19 Tiempowanmi Anmón runakunaq reynin Najasqa wañupurqan, jinan churin kamachikuyta qallarirqan.+
2 Chaymi Davidqa nirqan: “Najás khuyapayawasqanraykun noqapas churin Anunta khuyapayasaq”,*+ nispa. Jinan Davidqa kamachinkunata kacharqan papan wañupusqanmanta Anunta kallpachamunankupaq. Davidpa kamachinkuna Anmón runakunaq jallp’anman chayaqtinkun ichaqa,+
3 Anmón runakunaq autoridadninkuna rey Anunta nirqanku: “Papayta jatunchananpaqmi Davidqa kamachinkunata noqaman kachamushawan kallpachawananpaq nishankipaschá. Payqa llaqtanchista qhawaqtan kamachinkunata kachamushan, chhaynapi atipawananchispaq”, nispa.
4 Chaymi Anunqa Davidpa kamachinkunaq sunkhanta rutururqan,+ p’achankutataq sikipatanmanta urayman kuchurparirqan, chaymantataq kacharparipurqan.
5 Kamachinkunata millayta pisichasqankuta yacharuspan rey Davidqa runankunata kacharqan: “Jericó+ llaqtallapiraq qhepakamuychis sunkhaykichis wiñanankama, chaymantaña jampunkichis”, nispa nimunankupaq.
6 Tiempowanmi Anmón runakunaqa repararqanku David paykunata cheqnikusqanta. Jinan Anunqa Anmón runakunapiwan wakin runakunata kacharqanku waranqa talento* pesaq qolqewan carretakunata soldadokunata contratamunankupaq. Chaykunatan contratamurqanku Mesopotamia* runakunamanta, Aram-Macá runakunamanta, Zobá+ runakunamanta ima.
7 Jinan paykunaqa contratamurqanku kinsa chunka iskayniyoq waranqa carretakunata, Macá reyta runankunatawan. Chaymantataq chay contratamusqanku soldadokunaqa Medebá llaqtaq ñaupanpi karpakurqanku.+ Anmón runakunataq maqanakuq rinankupaq llaqtankumanta lloqsimurqanku.
8 Chayta yacharuspan Davidqa Joabta+ kacharqan llapa soldadokunatawan. Paykunawan kuskatan kachallarqantaq aswan kallpasapa soldadokunatapas.+
9 Anmón runakunataq llaqta punkuman lloqsimuspanku maqanakunankupaq filapi listo kasharqanku. Paykunata yanapaq reykunataq juj ladopi llaqta jawapi kasharqanku.
10 Joabmi rikurqan ñaupanta qhepanta paywan maqanakunankupaq soldadokuna jamushaqta, chaymi ajllarqan aswan allin Israel soldadokunata. Chay soldadokunatataq Siria soldadokunawan maqanakunankupaq listota filapi churarqan.+
11 Wakin soldadokunata umallinanpaqtaq wayqen Abisaita+ churarqan, chhaynapi Anmón runakunawan maqanakunankupaq.
12 Jinan Joabqa Abisaita nirqan: “Siria+ soldadokuna atipashawanqaku chayqa qan yanapawanki, qanta Anmón soldadokuna atipashasunki chaytaq noqa yanapasayki.
13 Chhaynaqa, llaqtanchisrayku Diosninchispa llaqtankunarayku ama manchakuspa+ maqanakusun, Jehová Diosmi yanapawasun”, nispa.
14 Jinan Joabqa soldadonkunapiwan Siria soldadokunawan maqanakuq rirqanku, Siria soldadokunan ichaqa ayqekurqanku.+
15 Chayta rikuspan Anmón runakunapas Joabpa wayqen Abisaimanta ayqekuspa llaqtanku ukhuman jaykurqanku. Chaymantataq Joabqa Jerusalenman kutipurqan.
16 Israel runakunawan atipachikusqankuraykun Siria soldadokunaqa Éufrates mayu+ ladopi kashaq Siria soldadokunata Sofac umallinkutawan wajachimurqanku. Sofacqa Adadezerpa soldadonkunaq umallinmi karqan.+
17 Chayta willaruqtinku jinan Davidqa Israelmanta llapa soldadokunata juñurqan, jinaspa Jordán mayuta chimpaspa chay soldadokunaq kasqanman chayarqan. Jinan Davidpas soldadonkunapas filapi churakurqanku Siria soldadokunawan maqanakunankupaq, chaymantataq maqanakuyta qallarirqanku.+
18 Siria soldadokunan ichaqa Israel soldadokunamanta ayqekurqanku. Chaypin Davidqa wañuchirqan qanchis waranqa carreta manejaqkunata, tawa chunka waranqa chakillapi puriq Siria soldadokunata. Wañuchillarqantaqmi Siria soldadokunaq umallin Sofactapas.
19 Israel runakunawan atipachikusqankuraykun+ Adadezerpa kamachinkunaqa Davidwan thajpi kausapunankupaq rimanakurqanku, chhaynapin paypa kamachinkuna kapurqanku.+ Chaymantapachan Siria runakunaqa manaña Anmón runakunata yanapayta munarqankuñachu.
Uraypi willakuykuna
^ Chaypiqa “Anunman mana tukukuq munakuyniyta rikuchisaq” nillanmantaqmi. Qhaway Explicasqa simikuna nisqapi “Mana tukukuq munakuy” nisqata.
^ Juj talentoqa 34,2 kilotan pesaq. Qhaway “Astawan yachanapaq B14” nisqata.
^ Hebreo rimaypiqa “Aram-Narain” ninmi.
