1 Crónicas 21:1-30
21 Satanasmi* Israel runakuna contra jatarirqan, jinaspan Davidman yuyayta qorqan Israel runakunata yupananpaq.+
2 Chaymi Davidqa Joabtawan+ Israelpi umallikunatawan nirqan: “Israelpi kaq llapa ayllukunata riychis, jinaspa Ber-Sebamanta Dankama+ runakunata yupamuychis. Chaymantataq willawankichis jayk’a runakunachus kasqanta”, nispa.
3 Joabmi ichaqa nirqan: “Wiraqocháy, Jehová Diosqa pachaj kutitawanraqmi llaqtantaqa mirachinqa. Chhaynaqa, ¿imapaqtaq yupaytari munashanki? Llapa Israel runakunaqa qanpan. ¿Imaraykun chayta ruwaspa Israel runakunata juchallichiyta munanki?”, nispa.
4 Rey Davidmi ichaqa yupanankutapuni munarqan, chaymi mana uyarirqanchu Joabta. Jinan Joabqa Israelpi kaq llapa runakunata yupaq rirqan, yupayta tukuspataq Jerusalén llaqtaman kutimpurqan.+
5 Jinan Joabqa jayk’a runakunachus kasqanta Davidman willarqan. Israelpi kaq ayllukunapin kasqa waranqaq waranqan pachaj waranqa runakuna, Judá ayllupitaq kasqa tawa pachaj qanchis chunka waranqa runakuna, llapa paykunaqa karqanku espadantinkaman.+
6 Joabmi ichaqa Leví ayllu runakunata Benjamín ayllu runakunata mana yuparqanchu.+ Joabqa sinchi mana allinpaqmi reypa nisqanta qhawarirqan,+ chaymi mana yuparqanchu.
7 Diosqa sinchi mana allinpaqpunin qhawarirqan Davidpa chay ruwasqantaqa, chaymi Israel runakunata castigarqan.
8 Chaymi Davidqa Diosta nirqan: “Diosníy, kay ruwasqaywanqa sinchitan juchallikuni.+ Ama jinachu, kay juchayta perdonaykuway,+ mana yuyayniyoq jinan chayta ruwaruni”,+ nispa.
9 Jinan Jehová Diosqa Gadman+ rimaykurqan, Gadqa Diospa rikuchisqantan Davidman willaq. Paytan nirqan:
10 “Phaway Davidta nimuy, Jehová Diosmi nin: Kay kinsa castigokunamanta ajllakuy, ¿ima ruwanaytan munanki?, nispa”.
11 Jinan profeta Gadqa Davidpa kasqanman jaykuspa nirqan: “Jehová Diosmi nin: ¿Mayqentan ajllakunki?
12 ¿Kinsa wata Israelpi yarqay kanantachu?+ ¿Kinsa killa enemigoykikuna atipanasuykitachu?+ Chay killakunapiqa sapa kutinmi enemigoykikuna espadawan atipasunki. ¿Icha ajllakunki kinsa p’unchay Israel llaqtaman mast’arikuq onqoyta Jehová Dios apamunantachu?+ Chay onqoytaqa Jehová Diospa angelninmi lliu Israel nacionman apamunqa,+ nispa. Chhaynaqa allinta yuyaykuspa niwanki kachamuwaqniyman willamunaypaq”, nispa.
13 Chaymi Davidqa Gadta nirqan: “May llakisqan kashani. Manan munaymanchu pi runapas ñak’arichiwanantaqa.+ Jehová Diosqa khuyapayakuqmi, paypa castigonta aswanpas suyakusaq”,+ nispa.
14 Jinan Jehová Diosqa Israel llaqtantinta mast’arikuq onqoywan jap’ichirqan,+ chaypin wañurqanku qanchis chunka waranqa runakuna.+
15 Chaymantapas juj angeltan Diosqa kachamurqan Jerusalén llaqta runakunata chinkachinanpaq. Ichaqa Jerusalén llaqta runakunata chinkachinanpaqña kashaqtinmi Jehová Diosqa onqoy apachimusqanmanta pesapakurqan,*+ jinan chay angelta nirqan: “¡Chaykamalla!+ Makiykita uraykachiy”, nispa. Jehová Diospa angelninqa Ornán+ sutiyoq Jebús runaq+ eranan pata* qayllapin kasharqan.
16 Davidpa qhawarinanpaqqa Jehová Diospa angelninmi espadanwan+ Jerusalén llaqtata señalashasqa, chay angelqa altollapin kashasqa chakinpas manan pampaman chayasqachu. Jinan Davidqa umalliqkunapiwan* umankuta taparukuspa pampakama k’umuykurqanku,+ paykunaqa qhasqa p’achawan churasqan kasharqanku.+
17 Jinan Davidqa Diosta nirqan: “Diosníy, noqan llaqtaykita yupanankupaqqa kamachirqani, noqan juchayoq kani, noqan pantaruni.+ Kay runakunaqa manan imatapas ruwarqankuchu. Jehová Diosnilláy, ama jinachu kay, noqata papaypa familiantawan castigawayku, amapuni kay runakunataqa castigaychu”,+ nispa.
18 Chaymi Jehová Diospa angelninqa Gadta+ nirqan: “Davidta nimuy: Ornán sutiyoq Jebús runaq+ eranan patapi Jehová Diospaq juj altarta ruwapuy, nispa”.
19 Gadqa Jehová Diospa sutinpin chaykunata Davidman kamachirqan, jinan Davidqa Gadpa nisqanman jina Ornanpa eranman rirqan.
20 Ornanqa trigotan erasharqan, jinan qonqaylla kutirispa juj angelta rikurqan, chaymi tawantin churinkunaqa pakakurqanku.
21 Rey David chayaqtintaq Ornanqa payta rikuspa usqhaylla eramanta lloqsimurqan, jinaspa reypa ñaupanpi qonqorikuspa pampakama k’umuykurqan.
22 Davidtaq Ornanta nirqan: “Kay eranayki patata vendepuway Jehová Diospaq juj altarta ruwapunaypaq, chhaynapi kay castigo sayananpaq.+ Jayk’achus valesqantan pagapusayki”, nispa.
23 Ornanmi ichaqa nirqan: “Reyníy, jap’ikapullay kay erataqa, qanña ima munasqaykitapas kaypi ruway. Torokunatapas qosaykin ruphachina ofrendata jaywanaykipaq, k’ullumanta sarunatapas+ qosaykin llant’aykipaq, trigotapas qosaykin jak’u ofrendata jaywanaykipaq. Kaykunataqa llapantan qopusayki”, nispa.
24 Rey Davidmi ichaqa Ornanta nirqan: “Noqaqa llapanmantan pagapusayki, kaykunaqa qanpan, manan gratisllaqa chaskiykimanchu. Jehová Diosmanqa manan mana qolqeywan rantisqa ruphachina sacrificiokunataqa jaywaymanchu”,+ nispa.
25 Jinan Davidqa chay jallp’anmanta soqta pachaj siclo* pesaq qorita Ornanman pagapurqan.
26 Chaymantataq Davidqa Jehová Diospaq juj altarta ruwapurqan,+ Jehová Diospa sutinta wajakuspataq chaypi jaywarqan ruphachina sacrificiokunata sumaq kausay sacrificiokunatawan. Jinan Diosqa Davidpa mañakusqanta uyarispa cielomanta ninata kachaykamurqan,+ jinaspa chay sacrificiokunata ruphapurqan.
27 Chaymantataq Jehová Diosqa chay angelta kamachirqan:+ “Espadaykita waqaychapuy”, nispa.
28 Davidmi repararqan mañakusqanman Jehová Dios kutichimusqanta, chaymi Ornán sutiyoq Jebús runaq eranpi sacrificiokunata jaywashallarqan.
29 Chay tiempopaqqa Jehová Diospa karpanpas ofrenda ruphachina altarpas Gabaonpi+ kaq Dios yupaychana patapin* kasharqan. Chay karpataqa Moisesmi ruwarqan ch’inneqpi kashaqtinku.
30 Davidqa manan chayman riyta atirqanchu Diosta tapuq, payqa sinchi manchasqan kasharqan Jehová Diospa angelninpa espadanta rikuspa.
Uraypi willakuykuna
^ Chaypiqa yaqapaschá “Contrapi churakuqmi” nillanmantaq.
^ Era patataqa “wayrachina pata” nillankutaqmi.
^ Chaypiqa “llakikurqan” nillanmantaqmi.
^ Chaypiqa “kuraq runakunapiwan” nillanmantaqmi.
^ Juj sicloqa 11,4 gramostan pesaq. Qhaway “Astawan yachanapaq B14” nisqata.
^ Hebreo rimaypiqa “alto patapin” ninmi. Qhaway Explicasqa simikuna nisqapi “Yupaychana patakuna” nisqata.
