1 Crónicas 22:1-19
22 Chaymantataq Davidqa nirqan: “Kaypin Jehová Diospa wasinqa kanqa, altartaq kaypi kanqa, chay altarpin Israel runakunaqa ruphachina ofrendakunata jaywanqaku”,+ nispa.
2 Chaymantataq Davidqa kamachirqan Israelpi kaq waj llaqtayoq runakunata juñumunankupaq.+ Chay runakunatan wakinta kamachirqan rumita kuchunankupaq wakintataq kamachirqan rumita thupanankupaq, chhaynapi Diospa wasinta ruwakunanpaq.+
3 Chaymantapas Davidqa askha fierrotan saqerqan punkukunapaq clavokunata jap’inakunatawan ruwanankupaq, cobretapas sinchi askhatapunin saqerqan mana pesay atiytaraq.+
4 Saqellarqantaqmi cedro sach’amanta askha maderakunata.+ Chay maderakunatan Davidpaq apamurqanku Sidón runakuna+ jinallataq Tiro llaqtamanta runakunapas.+
5 Davidmi yuyaykurqan: “Waway Salomonqa waynallaraqmi, jinaspapas manan allintaraqchu imatapas yachan,+ chayrayku Diospa wasinta ruwananpaq listota imatapas saqesaq. Jehová Diospa wasinqa ancha munaypunin kanan,+ kay pachapi allin reqsisqa kananpaq”,+ nispa. Chaymi Davidqa manaraq wañupushaspa listota imatapas saqerqan Diospa wasinta ruwakunanpaq.
6 Chaymantataq Davidqa wawan Salomonta wajachirqan, jinaspa nirqan Israelpa Diosnin Jehová Diospaq juj wasita ruwapunanpaq.
7 Chaymantapas Salomontan nillarqantaq: “Noqaqa maytan munarqani Jehová Diospaq juj wasita ruwapuyta, chhaynapi Diospa sutin jatunchasqa kananpaq.+
8 Ichaqa Jehová Diosmi niwarqan: Qanqa guerrakunapin maqanakurqanki, chaypin askha runakunaq yawarninta jich’arqanki, chaymi mana qanchu sutiyta jatunchaq wasitaqa ruwapuwanki,+ qanqa ñaupaypin askha runakunaq yawarninta jich’arqanki.
9 Ichaqa juj qhari wawaykin kanqa,+ sutintaqmi kanqa Salomón.*+ Payqa thajmi kausanqa, noqan enemigonkunamanta jark’aykusaq.+ Paypa kamachikusqan tiempopiqa Israel llaqtayqa thajpin kausanqa.+
10 Chay wawaykin sutiyta jatunchaq wasitaqa ruwapuwanqa,+ paymi waway kanqa noqataq taytan kasaq.+ Noqan paypa kamachikuynintaqa Israelpi wiñaypaq tajyachisaq,+ nispa.
11 ”Chhaynaqa wawáy, Jehová Dios qanwan kachun. Jehová Diosmi nirqasunki wasinta ruwapunaykipaq, chhaynaqa paymi yanapasunki wasinta tukunaykipaq.+
12 Jehová Diosmi qosunki allin yuyayta allin yachayta,+ chhaynapi Israel llaqtanta kamachinaykipaq, Jehová Diospa kamachikuyninkunatapas kasukunaykipaq.+
13 Sichus Jehová Diospa kamachikuyninkunata chaninchayninkunatapas+ kasukunki chayqa tukuy ruwasqaykipas allillanmi kanqa.+ Chay kamachikuykunata chaskispan Moisesqa Israel runakunaman qorqan. Chhaynaqa kallpachakuy ama manchakuychu nitaq khatatataychu.*+
14 Jehová Diospa wasinta ruwanaykipaqmi kaykunata saqeshani: pachaj waranqa talento* pesaq qorita, juj millón* talento pesaq qolqeta, mana pesay atiy sinchi askha cobretawan fierrotawan,+ chaymantapas maderakunatawan rumikunatawanmi listota saqeshani.+ Tukuy chaykunata juñunaypaqmi noqaqa kallpachakurqani, qanmi ichaqa astawanraq juñumunki.
15 Chaymantapas askhan llank’aqkunaqa kashan: rumi thupaqkuna, perqa sayarichiqkuna,+ maderawan llank’aqkuna, juj ruwaykunatapas allinta yachaqkuna.+
16 Askhan kashan qoripas, qolqepas, cobrepas, fierropas.+ Chhaynaqa wawalláy llank’allayña, Jehová Diosqa yanapasunkin”,+ nispa.
17 Chaymantataq Davidqa Israelpi kaq llapa autoridadkunata kamachirqan churin Salomonta yanapanankupaq. Paykunatan nirqan:
18 “Rikusqaykichis jina, Jehová Diosqa qankunawanmi kashan, paymi kay jallp’api thajpi tiyachishasunkichis. Paymi kay llaqtakunapi tiyaq runakunata makiyman entregawarqan, chhaynapin kay llaqta runakunaqa atipasqa karqanku Jehová Diospa ñaupanpi qankunaq ñaupaykichispi ima.
19 Kunanqa kallpachakuychis tukuy sonqowan tukuy almawan* Jehová Diosta maskhanaykichispaq,+ jinaspa Jehová Diospa wasinta ruwayta qallariychis.+ Chhaynapi Jehová Diospa rimanakuynin arcatapas ch’uya servicionkunatapas Diospa wasiman apamunaykichispaq.+ Chay wasiqa ruwakunqa Jehová Diospa sutinta jatunchanapaqmi”,+ nispa.
Uraypi willakuykuna
^ Salomón sutiqa hebreo rimaypi “thaj kay” ninan palabramantan jamun.
^ Khatatataytaqa “kharkatiy” nillankutaqmi.
^ Juj talentoqa 34,2 kilotan pesaq. Qhaway “Astawan yachanapaq B14” nisqata.
^ Juj millonqa waranqaq waranqanmi.
