1 Crónicas 23:1-32
23 Davidqa machuñan kasharqan, wañupunanpaqpas pisillañan faltasharqan, jinan Davidqa churin Salomonta+ Israelpi rey kananpaq churarqan.
2 Chaymantataq Davidqa juñurqan Israelpi kaq autoridadkunata, sacerdotekunata,+ Leví ayllu runakunatawan.+
3 Leví ayllu qharikunatan yupakurqan kinsa chunka watayoqmanta wichayman.+ Llapankupiqa karqanku kinsa chunka pusaqniyoq waranqa qharikunan.
4 Chay qharikunamantan iskay chunka tawayoq waranqa runakuna Jehová Diospa wasinta ruwakunanpaq encargasqa karqanku, soqta waranqa runakunataq Israelpi umallikuna juezkuna ima karqanku,+
5 tawa waranqa runakunataq punku qhawaq karqanku,+ wakin tawa waranqa runakunataq Jehová Diosta yupaychanapaq+ tocanakunata tocarqanku. Chay tocanakunatan Davidqa ruwarqan Diosta yupaychanapaq.
6 Chay Leví runakunatan Davidqa kinsaman t’aqarqan,+ juj t’aqan karqan Guersonpa mirayninkuna, iskay t’aqataq karqan Cohatpa mirayninkuna, kinsa t’aqataq karqan Meraripa+ mirayninkuna.
7 Guersonpa mirayninmantan karqan Ladanwan Simeiwan.
8 Ladanpa churinkunan karqan kinsa: umalli Jeyel, Zetan, Joelpiwan.+
9 Simeipa churinkunan karqan kinsa: Selomoj, Aziel, Haranpiwan. Chaykunan karqan Ladanpa mirayninpi umallikuna.
10 Simeipa churinkunan karqan tawa: Jaj, Ziná, Jeús, Beriaspiwan.
11 Jajmi karqan paykunaq umallin, Zizataq karqan payman qatiq umalli. Jeuswan Beriaswanqa manan askha wawayoqchu karqanku, chaymi paykunamanqa juj llank’ayllata qorqanku juj familia jinalla yupasqa kasqankurayku.
12 Cohatpa churinkunan karqan tawa: Amram, Izar,+ Hebrón, Uzielpiwan.+
13 Amrampa churinkunataq karqan Aaronwan+ Moisespiwan.+ Aaronmi t’aqasqa karqan+ ch’uyay-ch’uya cuartopi wiñaypaq Diosta servinanpaq. Chaymantapas paymi churinkunapiwan t’aqasqa karqanku Jehová Diospa ñaupanpi sacrificiokunata jaywanankupaq, Diosta servinankupaq, runakunatapas Diospa sutinpi wiñaypaq bendecinankupaq.+
14 Diospa kamachin Moisespa churinkunaqa Leví ayllu runakunawan kuskan yupasqa karqanku.
15 Moisespa churinkunan karqan Guersomwan+ Eliezerpiwan.+
16 Guersompa churintaq karqan Sebuel,+ paymi chay familiapi umalli karqan.
17 Eliezerpa churintaq* karqan Reabías,+ paymi chay familiapi umalli karqan. Eliezerpa churinqa jujllan karqan, churin Reabiasmi ichaqa askha wawakunayoq karqan.
18 Izarpa+ churinmi karqan Selomij,+ paymi chay familiapi umalli karqan.
19 Hebronpa churinkunan karqan: Jerías, paymi karqan umalli, iskay kaq churintaq karqan Amarías, kinsa kaq churintaq karqan Jaziel, tawa kaq churintaq karqan Jecamean.+
20 Uzielpa+ churinkunan karqan Miqueaswan Isiaspiwan. Miqueasmi karqan umalli, Isiastaq karqan payman qatiq umalli.
21 Meraripa churinkunan karqan Maliwan Musiwan.+ Malipa churinkunataq karqan Eleazarwan Quiswan.
22 Eleazarpaqa ususinkunallan karqan manan churinkunaqa karqanchu, jinan wañukapurqan. Chaymi Eleazarpa ususinkunaqa Quispa churinkunawan casarakurqanku, paykunaqa familiantinmi karqanku.
23 Musipa churinkunan karqan kinsa: Malí, Éder, Jeremojpiwan.
24 Chaykunan karqanku Leví runakunaq mirayninkuna. Paykunan familiankumanta willaq qelqapi qelqasqa karqanku mayqen familiamantachus kasqankuman jina, pikunachus umallinku kasqanman jina. Paykunaqa iskay chunka watankumantapachan Jehová Diospa wasinpi llank’ayta qallariqku, sutinkupas familiankumanta willaq qelqapin qelqasqa karqan.
25 Davidmi nirqan: “Israelpa Diosnin Jehová Diosmi enemigonkunamanta llaqtanta samachin,+ payqa Jerusalenpin wiñaypaq tiyanqa.+
26 Chaymantapas Leví ayllu runakunaqa manañan Diosta servinankupaqqa Diospa karpantapas yupaychanapaq serviciokunatapas kayman jaqayman apanqakuñachu”,+ nispa.
27 Jinan Davidpa kamachisqanman jina iskay chunka watankumanta wichayman Leví ayllu runakunata yuparqanku.
28 Paykunan Aaronpa churinkunata yanaparqanku+ Jehová Diospa wasinpi. Paykunan yanapakuqku Diospa wasinpi kaq patiokunapi,+ mijuna cuartokunapi, Diospaq t’aqasqa kaqkunata ch’uyanchaspa, Diospa wasinpi juj ruwaykunapipas.
29 Chaymantapas paykunan ruwaqku Diosman jaywana t’antata,*+ jak’u ofrendapaq allin jak’uta,* mana levadurayoq llaflla* t’antata,+ sartenpi ruwasqa t’antata, aceitewan tupachisqa masatapas.+ Tukuy chaykunata ruwakunanpaqmi paykunaqa pesaqku, sayaynintapas mediqku.
30 Paykunaqa sapa tutamantanmi+ sapa tardenmi Diospa ñaupanman riqku Jehová Diosta yupaychanankupaq agradecekunankupaq ima.+
31 Chaymantapas paykunan Aaronpa churinkunata yanapaqku ruphachina sacrificiokunata Jehová Diosman jaywaqtinku. Chay sacrificiokunatan jaywaqku samana p’unchaypi,+ mosoq killa p’unchaypi,+ juj fiestakunapipas.+ Chay sacrificiokunataqa sapa kutinmi Jehová Diospa ñaupanpi jaywaqku jayk’a sacrificiokunatachus jaywakunan kasqanman jina.
32 Chaymantapas kallpachakuqkun Diospa karpanpi* ch’uya cuartopi ima llank’anankupaq. Chhaynatan paykunaqa Aaronpa churinkunata yanaparqanku Jehová Diospa wasinpi tukuy imaymanata ruwaspa.
Uraypi willakuykuna
^ Hebreo rimaypiqa “churinkunataq” ninmi.
^ Llafllataqa “llafsa, ch’illpa” nillankutaqmi.
^ Chaypiqa “ñut’u jak’uta” nillanmantaqmi.
^ Chaypiqa Diospaq t’aqasqa t’antamantan rimashan.
^ Chaypiqa “Dioswan tupana karpapi” nillanmantaqmi.
