1 Corintios 3:1-23
-
Corintopi iñiqkuna aychaq munayninman jinallaraq purishasqankumanta (1-4)
-
Wiñachiqqa Dios kasqanmanta (5-9)
-
Diospa llank’aqmasinkuna (9)
-
-
Ninaq mana ruphanan materialkunawan perqanamanta (10-15)
-
Corintopi iñiqkuna Diospa templon kasqankumanta (16, 17)
-
Kay pachaq yachaynin Diospaq mana valeq kasqanmanta (18-23)
3 Chaymi, wayqeykuna,* espirituwan pusachikuq runakunata jina rimapayanaymantaqa+ aychanpa munayninpi puriq runakunata jinalla rimapayarqaykichis, Cristo qatikuypi wawallaraq kaqkunata jinallan parlapayarqaykichis.+
2 Noqaqa lechellatan qorqaykichis, manan mijunatachu, mana mijunaykichispaq jinaraqchu kasqaykichisrayku. Kunanpas manan mijunaykichispaq jinaraqchu kashankichis+
3 aychaq munayninman jinallaraq purishasqaykichisrayku.+ Envidianakuspa phiñachinakuspa kausaspaqa, ¿manachu aychaq munayninman jina ruwashankichis?+ ¿Manachu kay pacha runakuna jina purishankichis?
4 “Noqaqa Pabloqmi kani”, “noqaqa Apolospan kani”+ ninakuspaykichisqa, ¿manachu kay pacha runakuna jina ruwashankichis?
5 Chhaynaqa, ¿pitaq Apolosri? ¿Pitaq Pablopasri? Noqaykuqa Señorpa qowasqanku llank’anata ruwaq kamachikunallan kayku,+ iñiq kanaykichispaq yanapakuqkunalla.
6 Noqan plantarqani,+ Apolostaq qarparqan,+ ichaqa Diosmi wiñachiqqa.
7 Chhaynaqa manan plantaqchu ni qarpaqchu imapas, aswanpas wiñachiq Diosmi.+
8 Ichaqa plantaqwan qarpaqwanqa jujllan* kanku, chaywanpas sapankan premiotaqa chaskinqa imaynachus llank’asqanman jina.+
9 Noqaykuqa Diospa llank’aqmasinkunan kayku, qankunataq Diospa llank’ashasqan chajra kankichis, Diospa ruwashasqan wasi.+
10 Dios ancha sumaq sonqowan qhawariwasqanraykun noqaqa wasi ruwaypi allin* maestro jina cimentacionta churarqani,+ jujtaq chay patapi perqashan. Ichaqa sapanka allinta qhawarikuchun imaynatachus chay pataman perqashan chayta.
11 Manan pipas atinmanchu churasqa cimentacionman juj cimentación churaytaqa, chay cimentacionqa Jesucriston.+
12 Chay cimentasqamanqa perqakunmanmi qoriwan, qolqewan, ancha valorniyoq rumikunawanpas; ruwakullanmantaqmi maderawan, ch’aki q’achuwan, ichhuwanpas.
13 Ichaqa yachakunqan piqpa llank’asqanpas imaynachus kashan chayta. Chaytaqa pruebaman churana p’unchaypin yachakunqa,+ chay p’unchaypin nina rikuchinqa piqpa llank’asqanpas imaynachus kashan chayta.
14 Chay cimentasqa patapi piqpa perqasqantachus nina mana ruphanqa chayqa, premiotan chaskinqa.
15 Piqpa ruwasqantaqchus q’ala ruphasqa kanqa chayqa, lliutan chinkachinqa, paymi ichaqa salvasqa kanqa, ichaqa ninamantapas orqosqa kashanman jinallañan.
16 ¿Manachu yachankichis qankunaqa Diospa templon kasqaykichista?+ ¿Manachu yachankichis Diospa espiritunpas qankuna ukhupi tiyasqanta?+
17 Pipas Diospa templonta thuninqa chayqa, Diosmi payta ch’usaqyachinqa; Diospa templonqa ch’uyan, qankunan chay temploqa kankichis.+
18 Ama pipas engañakuchunchu: Mayqenniykichispas kay pacha runakuna ukhupi yachaysapapaq piensakun chayqa, mana yachayniyoqman tukupuchun, chhaynapi yachayniyoq kananpaq.
19 Kay pachaq yachayninqa mana valeqmi Diospaqqa; simin qelqapas ninmi: “Paymi yachayniyoq runataqa ruwasqallanpitaq urmachin”,+ nispa.
20 Nillantaqmi: “Jehová* Diosqa yachanmi yachaysapakunaq imachus piensasqanqa mana valeq kasqanta”,+ nispa.
21 Chhaynaqa, ama pipas jatunchakuchunchu runakunaq imachus ruwasqanmantaqa, lliu imapas qankunaqmi.
22 Arí, Pablopas, Apolospas, Cefaspas,*+ kay pachapas, kausaypas, wañuypas, kunan kaqkunapas, jamuq kaqkunapas, tukuy imapas qankunaqmi;
23 qankunataq Cristoq kankichis,+ Cristotaq Diospa.
Uraypi willakuykuna
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Chaypiqa “juj yuyayllan” nillanmantaqmi.
^ Chaypiqa “yachayniyoq” nillanmantaqmi.
^ Qhaway “Astawan yachanapaq A5” nisqata.
^ Paytaqa “Pedro” nikullantaqmi.
