1 Juan 4:1-21
4 Munasqa wayqe-panaykuna, askha falso profetakunan kay pachantinman rijurimushan,+ chayrayku ama llapa profeciakunatachu* creeychis,+ aswanpas allintapuni t’aqwiychis chay profeciakuna Diosmantapunichus jamushan icha manachus chayta.+
2 Kaypin yachankichis ima profeciapas Diosmantachus jamun icha manachus chayta: Ima profeciapas Jesucristo runa jina jamusqanmanta riman chayqa, Diosmantan jamushan chay profeciaqa.+
3 Ichaqa ima profeciapas mana Jesusmantachu rimanman chayqa, manan Diosmantachu jamushanman chay profeciaqa.+ Chaymantapas chay profeciaqa Cristoq contranpi kaqpa* rimayninmi kashanman, yachasqaykichis jina, chhaynatan rimanan karqan Cristoq contranpi kaqqa,+ ñataqmi kay pachapiqa chhaynataña rimakushanpas.+
4 Wawallaykuna, qankunaqa Diosmantan paqarimurqankichis, ñan vencenkichisña paykunatapas,*+ qankunawan jujllachasqa Diosqa+ kay pachawan jujllachasqa Saqramanta aswan jatun kasqanrayku.+
5 Paykunaqa kay pachamantan paqarimunku,+ chaymi rimanku kay pacha kaqkunamanta, chaymi kay pacha runakunapas uyarinku paykunataqa.+
6 Noqanchismi ichaqa Diosmantapuni paqarimunchis. Pipas Diosta reqsiqqa uyariwasunmi,+ pipas mana Diosmantachu paqarimuqmi ichaqa mana uyariwasunchu.+ Chhaynapin reparanchis mayqen profeciachus cheqaq kasqanta, mayqentaqchus yanqa kasqanta.+
7 Munasqa wayqe-panaykuna, jujkuna-jujkunawan munanakushallasun;+ munakuyqa Diosmantan paqarimun, chaymantapas pipas munakuqqa Diospa wawanmi, reqsintaqmi Diostapas.+
8 Pipas mana munakuqmi ichaqa mana reqsinchu Diostaqa, Diosqa munakuymi.+
9 Diosqa sapan Churinta kay pachaman kachamusqanwanmi munakuwasqanchista rikuchirqan,+ chhaynapi chay Churinrayku kausayta chaskinanchispaq.+
10 Manan noqanchischu Diostaqa munakurqanchis, aswanmi pay noqanchista munakuwarqanchis, chaymi Churinta kachamurqan juchanchisrayku+ allipunachiy sacrificiota ruwananpaq;+ chaymi munakuq kayqa.
11 Munasqa wayqe-panaykuna, chhaynatataq Dios munakuwanchis chayqa, noqanchispas munanakunanchispunin jujkuna-jujkunawanqa.+
12 Manan pipas jayk’aqpas rikurqanchu Diostaqa.+ Jujkuna-jujkunawanchus munanakushallasun chayqa, noqanchiswanmi Diosqa kashanqa, munakuyninpas junt’asqan noqanchispi kanqa.+
13 Chaymantapas noqanchisqa paywan jujllachasqan kashanchis, paytaq noqanchiswan jujllachasqa kashan, chaytan yachanchis espiritunta qowasqanchispi.
14 Jinaspapas noqaykuqa allintan yachayku Tayta Diosqa kay pacha runakunata salvananpaq Churinta kachamusqanta, chaymantan noqaykuqa rimashaykupas.+
15 Pipas tukuy sonqowan “Jesusqa Diospa Churinmi” niqwanmi+ Diosqa jujllachasqa kashan, chayta niqtaq Dioswan jujllachasqa kashan.+
16 Noqanchisqa allintamá riki yachanchis Diosqa munakuwasqanchista, manataqmi chaymantaqa iskayananchischu.+
Diosqa munakuymi,+ pipas munakuqqa paywan jujllachasqan kashan, Diostaq chay munakuq runawan jujllachasqa kashan.+
17 Chayraykun munakuyqa noqanchispi junt’a kashan, chhaynapi juicio p’unchaypi mana manchakuspa rimananchispaq;+ noqanchisqa imaynan Jesucristopas kashan, chhaynan kashanchis kay pachapiqa.
18 Pipas munakuqqa manan imatapas manchakunchu,+ chaymantapas junt’asqa munakuyqa manchakuytan wijch’un, manchakuymi ichaqa runata jark’an. Chayrayku, pipas manchakun chayqa, manan munakuyninqa junt’asqaraqchu kashanman.+
19 Noqanchisqa Diosta munakunchis ñaupaqtaraq pay munakuwasqanchisraykun.+
20 Pipas “Diostan munakuni” nishaspa wayqenta cheqnikushanman chayqa, llullakushanmanmi.+ Rikushaspataq wayqenta mana munakushanmanchu chayqa,+ ¿imaynapitaq mana rikusqan Diostari munakunman?+
21 Diospa kamachikuyninman jinaqa, pipas payta munakuqqa munakunallantaqmi wayqentapas.+
Uraypi willakuykuna
^ Griego rimaypiqa “anticristoq” ninmi. Qhaway Explicasqa simikuna nisqapi “Cristoq contranpi kaq (anticristo)” nisqata.
^ Chaypiqa falso profetakunamantan rimashan.
