1 Reyes 13:1-34
13 Jeroboanmi sacrificiota q’osñichinanpaq ruwasqan altarpa ladonpi sayasharqan,+ chayllamanmi Judá ayllumanta Betel llaqtaman juj profeta chayamurqan, chay profetaqa Jehová Diospa kamachisqanmi jamurqan.+
2 Jinan Jehová Diospa kamachisqanman jina altar contra alto kunkawan nirqan: “¡Ay altar, altar! Jehová Diosmi nin: Davidpa familianmantan juj wawa nacenqa, paytan Josías nispa sutichanqaku.+ Paymi yupaychana patakunapi* sacrificiokunata q’osñichiq sacerdotekunata qan patapi sacrificanqa. Chaymantapas qan patapin runakunaq tullunkunata ruphachinqa,+ nispa”.
3 Chay p’unchaymi chay profetaqa juj señalta rikuchirqan, jinaspa nirqan: “Kay señaltan Jehová Diosqa qosunkichis rimasqay cheqaqpuni kasqanta yachanaykichispaq, paymi nin: Altarmi p’akikunqa, altar patapi kaq usphataq wisñikunqa,* nispa”.
4 Chay profeta Betelpi altar contra nisqanta uyarispataq rey Jeroboanqa makinta altar patamanta oqarirqan, jinaspa chay profetata señalaspa nirqan: “¡Jap’iychis chay runata!”,+ nispa. Chayllamanmi chay makinqa sayarapurqan,* manañataq kuyuripurqanchu.+
5 Jinan chay altarqa p’akikurqan, chay patapi kaq usphapas wisñikurqan. Chayqa pasarqan profetanwan Jehová Diospa willachisqanman jinan.
6 Chaymi rey Jeroboanqa Diospa profetanta valekurqan: “Ama jinachu kay, Jehová Diosniykita valeyakapuway kay makiyta qhaliyachiwananpaq”,+ nispa. Jinan chay profetaqa paypaq Jehová Diosmanta mañakurqan, chhaynapin reypa makinqa qhaliyapurqan.
7 Chaymantataq Jeroboanqa Diospa profetanta nirqan: “Jaku wasiyta, imallatapas mijuramunki, regalotapas qomusayki”, nispa.
8 Diospa profetanmi ichaqa reyta nirqan: “Kuskan wasiykitaña qowankiman chaypas, manan qanwanqa riymanchu. Manan kaypiqa t’antatapas mijuymanchu ni unutapas ujaymanchu.
9 Noqataqa Jehová Diosmi kamachiwarqan: Kay llaqtapiqa aman t’antatapas mijunkichu ni unutapas ujankichu, amallataq jamusqayki ñannintapas kutinkichu, nispa”.
10 Jinan chay profetaqa juj ñanninta kutipurqan, manataq Betel llaqtaman jamusqan ñannintachu.
11 Betel llaqtapin tiyarqan juj kuraq profeta. Paypa wasinmanmi churinkuna rirqanku jinaspa willarqanku Diospa profetanmanta. Lliutan willarqanku imakunatachus chay p’unchay Betelpi ruwasqanta, imakunatachus reyta nisqantapas. Chaykunata willasqanku qhepamanmi
12 taytankuqa tapurqan: “¿May ñannintataq pasapunri?”, nispa. Jinan churinkunaqa qhawarichirqanku may ñannintachus Judá ayllumanta jamuq Diospa profetan ripusqanta.
13 Chaymi kuraq profetaqa churinkunata nirqan: “Asnoyta caronarapuwaychis”, nispa. Churinkunataq asnonta caronapurqanku, chaymantataq payqa asnonman sillakurqan.
14 Jinan kuraq profetaqa Diospa profetanpa qhepanta rispa tariparurqan, chay profetaqa jatun sach’a k’uchupin tiyashasqa. Jinan tapurqan: “¿Qanchu kanki Judá ayllumanta jamuq Diospa profetan?”,+ nispa. Paytaq nirqan: “Arí, noqan kani”, nispa.
15 Chaymi kuraq profetaqa nirqan: “Jaku wasiyta t’antallatapas mijuramuy”, nispa.
16 Diospa profetanmi ichaqa nirqan: “Manan kutiymanchu, manan wasiykimanqa riymanchu, manan kay llaqtapiqa t’antatapas mijuymanchu ni unutapas ujaymanchu.
17 Noqataqa Jehová Diosmi kamachiwarqan: Kay llaqtapiqa aman t’antatapas mijunkichu ni unutapas ujankichu, amallataq jamusqayki ñannintapas kutinkichu, nispa”.
18 Jinan kuraq profetaqa payta nirqan: “Noqapas profetan kani, Jehová Diospa kachamusqan angelmi niwan: Wasiykiman kutichimuy, jinaspa t’antata mijuchiy unutapas ujachiy, nispa”. (Chhaynatan payta engañarqan).
19 Jinan payqa kuraq profetaq wasinman kutimurqan t’antatapas mijunanpaq unutapas ujananpaq.
20 Mesapi tiyashaqtinkutaq Jehová Diosqa kuraq profetata rimaykurqan.
21 Jinan payqa Judá ayllumanta jamuq Diospa profetanta fuerteta nirqan: “Jehová Diosmi kayta nisunki: ¿Imaraykun Jehová Dios contra sayarirqanki? ¿Imaraykun Jehová Diosniykiq kamachisqanta mana kasukurqankichu?
22 ¿Imaraykun kay llaqtaman kutimuspa t’antatapas mijurqanki unutapas ujarqanki? ¿Manachu noqaqa sut’ita kamachirqayki: Aman t’antatapas mijunkichu aman unutapas ujankichu, nispa? Qantaq ichaqa mana kasukuwarqankichu, chaymi ayaykiqa mana ñaupa taytaykikunaq sepulturanpichu p’ampasqa kanqa,+ nispa”.
23 Diospa profetan unutapas t’antatapas mijuyta tukuqtintaq kuraq profetaqa asnota caronapurqan.
24 Jinan Diospa profetanqa chaymanta ripurqan. Ichaqa ñanta purishaqtinmi juj león wañuchipurqan.+ Chaymi cuerponqa ñan patapi kasharqan, leonwan asnowantaq ladonpi sayasharqanku.
25 Chayninta puriq runakunan rikurqanku chay profetaq cuerponta ñan patapi wijch’urayashaqta, juj leontapas ladonpi sayashaqta. Jinan chay runakunaqa kuraq profetaq llaqtanman jaykuspa willarqanku ñanpi rikumusqankuta.
26 Chayta yacharuspa jinan kuraq profetaqa nirqan: “Jehová Diospa kamachisqanta mana kasukuq profetapunin kanman.+ Jehová Diospunichá paytaqa juj leonman entregarqan wañuchinanpaq, chhaynapi Jehová Diospa nisqan junt’akunanpaq”,+ nispa.
27 Jinan kuraq profetaqa churinkunata nirqan: “Asnoyta caronarapuwaychis”, nispa. Jinan churinkunaqa asnonta caronapurqanku.
28 Chaymantataq kuraq profetaqa maskhaq rirqan, jinaspa chay profetaq cuerponta ñanpi tarirqan. Chay cuerpoq ladonpin sayashasqaku asnopas leonpas. Chay leonqa manan mijusqachu profetaq cuerpontaqa, asnotapas manan imanasqapaschu.
29 Jinan kuraq profetaqa Diospa profetanpa cuerponta oqarispa asnoman cargarqan, jinaspa llaqtanman kutichimpurqan chhaynapi wañuqmanta waqananpaq jinaspa p’ampapunanpaq.
30 Chaymantataq kuraq profetaqa paypa sepulturanpi p’ampapurqan. Paymanta waqaspataq nirqanku: “¡Ay imaraqmi wayqéy!”, nispa.
31 P’amparuspataq kuraq profetaqa churinkunata nirqan: “Kay cheqaq Diospa profetanpa ladonmanmi noqatapas wañuqtiyqa p’ampapuwankichis, paypa tullunkunaq ladonmanmi tulluykunatapas churankichis.+
32 Kay runaqa Jehová Diospa kamachisqanmi rimarqan, chay rimasqanqa llapallanmi junt’akunqa. Betel llaqtapi altar contra rimasqanpas, lliu Samariapi yupaychanapaq templokuna contra rimasqanpas junt’akunqapunin”,+ nispa.
33 Jeroboanqa rikurqanña chaykuna pasasqanta chaypas manapunin saqerqanchu mana allinkuna ruwashasqantaqa. Payqa común runakunatan ajllashallarqan yupaychana patakunapi sacerdote kananpaq.+ Munasqanman jinan payqa runakunata niq: “Kay runa sacerdote kachun yupaychana cheqaskunapi”,+ nispa.
34 Chhaynatan Jeroboanpas familianpas juchallikurqanku,+ chayraykun kay pachamanta chinkachisqa kapurqanku.+
Uraypi willakuykuna
^ Hebreo rimaypiqa “alto patakunapi” ninmi. Qhaway Explicasqa simikuna nisqapi “Yupaychana patakuna” nisqata.
^ Chaypiqa “grasayoq usphataq wisñikunqa” nillanmantaqmi. Chay usphapi grasaqa karqan sacrificiokunaq wiranmi.
^ Hebreo rimaypiqa “ch’akirapurqan” ninmi.
