1 Reyes 19:1-21
19 Chaymantataq Ajabqa+ esposan Jezabelman+ willarqan Eliaspa lliu imachus ruwasqanta, Baalpa llapa profetankunata imaynatachus espadawan wañuchisqantapas.+
2 Jinan Jezabelqa juj kamachinwan Eliasman willachirqan: “¡Imaynatachus Baalpa profetankunata wañuchirqanki chhaynatan qantapas wañuchisayki! ¡Paqarin kay horaspaq jina mana wañusqachu kashanki chayqa dioskuna sinchita castigawachun!”, nispa.
3 Chayta uyarispan Eliasqa sinchita mancharikurqan, chaymi wañuchinankuta manchakuspa+ Judá ayllupi+ kaq Ber-Seba+ llaqtakama usqhaylla ayqekurqan, chaypitaq yanapaqninta saqerqan.
4 Chaymantataq Eliasqa ch’inneq ladoman rirqan, juj p’unchay ch’isiyaqta purispataq retama mallkiman chayarqan, jinaspa chay retama k’uchupi tiyaykurqan. Eliasqa wañukapuyta munaspan mañakurqan: “¡Kaykamallaña! Jehová Diosníy, wañuchipuwallayña,+ noqaqa manan ñaupa taytaykunamanta aswan allinchu kani”, nispa.
5 Chaymantataq Eliasqa chay retama k’uchupi puñurapurqan. Chayllamanmi juj ángel rijurimurqan, jinaspa llamiykuspa+ nirqan: “Jatariy, kayta mijuy”,+ nispa.
6 Elías qhawarinanpaqtaq saunanpi juj jarra unu kashasqa, ladonpitaq ruphashaq rumikuna patapi juj t’anta kashasqa. Chayta mijuspa ujaspan Eliasqa jujmanta puñupullarqantaq.
7 Chaymantataq Jehová Diospa angelninqa jujmanta kutimurqan, jinaspa Eliasta llamiykuspa nirqan: “Jatariy, mijuy. Karun purinayki kashan, mana mijunkichu chayqa manan chayankichu”, nispa.
8 Jinan Eliasqa jatarispa mijurqan ujarqan. Chay mijusqanmi Eliasmanqa kallpata qorqan, chaymi tawa chunka p’unchayta tawa chunka tutatawan purispa Horeb orqoman chayarqan, Diospa orqonman.+
9 Jinaspan chay orqopi kaq qaqa t’oqoman jaykuspa+ chaypi chay tuta puñurqan. Chayllamanmi Jehová Diosqa nirqan: “Elías, ¿imatan kaypi ruwashanki?”, nispa.
10 Eliastaq nirqan: “Ejercitokunata kamachiq Jehová Diosníy, qanta munakuspan noqaqa tukuy imaymanata qanpaq jina ruwarqani.+ Israel runakunan ichaqa rimanakusqaykita saqepunku,+ altarniykikunata thunipunku, lliu profetaykikunatapas wañuchipunku,+ noqallañan kausashani. Kunantaq noqatapas wañuchiyta munashawanku”,+ nispa.
11 Diosmi ichaqa nirqan: “Lloqsimuy chay t’oqomanta, jinaspa Jehová Diosniykiq ñaupaypi sayaykuy”, nispa. Jehová Diosqa chaynintan pasasharqan,+ Jehová Diospa ñaupantataq fuerte wayra orqokunataraq kicharisharqan, qaqakunataraq ch’eqtasharqan,+ Jehová Diosmi ichaqa mana chay wayrapichu kasharqan. Chaymantataq pacha chhafchikurqan,+ Jehová Diosmi ichaqa mana chay pacha chhafchiypichu kasharqan.
12 Pacha chhafchiy qhepamantaq nina rauray rijurimurqan,+ Jehová Diosmi ichaqa mana chay nina rauraypichu kasharqan. Nina rauray qhepamantaq sumaq samp’a kunka uyarikurqan.+
13 Chay kunkata uyarispa jinataq Eliasqa p’achanwan uyanta pakakuspa+ chay t’oqomanta lloqsirqan, jinaspa chay t’oqo jaykunapi sayaykurqan. Jinan Eliasqa juj kunkata uyarirqan: “Elías, ¿imatan kaypi ruwashanki?”, nispa nimuqta.
14 Eliastaq nirqan: “Ejercitokunata kamachiq Jehová Diosníy, qanta munakuspan noqaqa tukuy imaymanata qanpaq jina ruwarqani. Israel runakunan ichaqa rimanakusqaykita saqepunku,+ altarniykikunata thunipunku, lliu profetaykikunatapas wañuchipunku, noqallañan kausashani. Kunantaq noqatapas wañuchiyta munashawanku”,+ nispa.
15 Jinan Jehová Diosqa nirqan: “Phaway kutiy Damasco llaqtapi kaq ch’inneq ladoman. Chayman chayaspataq Azaelta+ churanki Siriapi rey kananpaq.
16 Ninsipa nieton Jehutataq+ churamunki* Israelpi rey kananpaq. Abel-Meolamanta Safajpa churin Eliseotataq* qanpa rantiykipi profeta kananpaq churamunki.+
17 Azaelpa wañuchinanmanta ayqekuqkunatan+ Jehú wañuchinqa,+ Jehupa wañuchinanmanta ayqekuqkunatataq Eliseo wañuchinqa.+
18 Israelpiqa kashanraqmi qanchis waranqa runakuna+ Baalman mana qonqorikuqkuna,+ Baalta mana much’aykuqkuna”,+ nispa.
19 Jinan Eliasqa chaymanta ripuspa Safajpa churin Eliseota torokunawan llank’ashaqta tarirqan. Eliseoqa chunka iskayniyoq masa torowanmi llank’asharqan, paymi qhepa kaq masa torowan llank’asharqan. Jinan Eliasqa Eliseoman asuykurqan, jinaspa profeta p’achanta ch’utikuspa Eliseoman churaykurqan.+
20 Chaymi Eliseoqa torokunata saqerparispa Eliaspa qhepanta phawarirqan, jinaspa nirqan: “Ama jinachu kay, tayta-mamaymantaraq despedirakamusaq,* chaymantataq qanta qatikusayki”, nispa. Jinan Eliasqa nirqan: “Phaway rillay, manan noqaqa jark’aykichu”, nispa.
21 Jinan Eliseoqa iskay torota aparikuspa wasinman kutirqan, jinaspa chay torokunata ñak’arqan. Chaymantataq aradotawan yugotawan llant’aruspa chay aychata wayk’urqan, jinaspa runakunaman mijuchirqan. Chay qhepamantaq Eliaswan ripurqan, jinaspa yanapaqnin kapurqan.+
Uraypi willakuykuna
^ Chaypiqa “aceitewan jich’aykamunki” nillanmantaqmi.
^ Eliseo sutiqa “Diosqa salvaqmi” ninantan nin.
^ Hebreo rimaypiqa “tayta-mamaytaraq much’ayramusaq” ninmi.
