1 Samuel 18:1-30
18 Saúl Davidwan rimayta tukuruqtin jinan, Jonatanwan+ Davidwanqa amigontin kapurqanku. Jonatanqa pay kikinta jinan Davidta munakuyta qallarirqan.+
2 Chay p’unchaymantapachan Saulqa Davidta wasinpi qhepachipurqan, manan taytanpa wasinta kutinantapas munarqanñachu.+
3 Jonatanpas Davidwan kuskan amigontin kanankupaq juj promesata ruwarqanku.+ Jonatanqa pay kikinta jinan Davidta munakurqan.+
4 Chaymantapas Jonatanqa jawa p’achanta ch’utikuspan Davidman qorqan. Qollarqantaqmi maqanakunan p’achantapas, espadantapas, flechanan arcotapas, cintura watakunantapas.
5 Davidqa guerramanmi lloqsiyta qallarirqan. Maymanña Saúl kachaq chaypas payqa atipallaqpunin,*+ chaymi Saulqa soldadokunata umallinanpaq churarqan.+ Chaytaqa allinpaqmi qhawarirqan Saulpa kamachinkunapas llapa Israelpi runakunapas.
6 Davidwan soldadokunapiwan Filistea runakunata atipamusqankumanta kutimuqtinkun, Israelpi kaq llaqtakunapi warmikunaqa Saulman aypaq riqku. Paykunaqa takiykuspa,+ tusuykuspa, tambortapas+ charangotapas tocaykuspa iman riqku.
7 Chay warmikunan atipamusqankuta festejaspa takiqku:
“Saulmi waranqa runata wañuchimun,Davidtaq chunka waranqa runata”,+ nispa.
8 Chayta uyarispan Saulqa sinchita phiñakurqan,+ manapunin paymanqa gustarqanchu chhaynata takisqankuqa, chaymi sonqollanpi nirqan: “Noqataqa waranqa wañuchiqllapaq qhawariwanku, Davidtataq chunka waranqa wañuchiqpaq. Chhaynaqa, ¡reyllataña aswanpas churapuchunku!”,+ nispa.
9 Chay p’unchaymantapachan Saulqa manaña Davidpi confiarqanñachu.
10 Tutamantantaq wasinpi kashaqtin Saulman jamurqan mana allin piensaykuna,*+ chaymi payqa waq’a jina* ruwayta qallarirqan. Davidqa juj kutikunapi jinan chay ratu arpanta tocasharqan,+ chayllamanmi Saulqa lanzanta jap’iruspa+
11 Davidman chanqarqan:+ “Perqaman ch’antarusaq”, nispa. Iskay kutitan chayta ruwarqan, Davidmi ichaqa chay iskaynin kutipas mana jap’ichikurqanchu.
12 Saulqa allintan yacharqan Jehová Dios Davidwan kashasqanta+ paytataq wijch’upusqanta,+ chaymi payqa Davidta manchakuyta qallarirqan.
13 Saulqa manañan munarqanchu David ladonpi kananta, chaymi waranqa soldadokunata umallinanpaq churarqan. Davidmi llapa soldadokunatapas guerrakunapi umallimuq.*+
14 Davidpa tukuy ima ruwasqanpas allillanpunin kaq,+ Jehová Diosqa paywanmi kasharqan.+
15 Davidpa ima ruwasqanpas allillanpuni kasqanta rikuspan Saulqa astawanraq manchakuyta qallarirqan.
16 Israel runakuna guerrakunaman riqtinkuqa Davidmi umalliq, chaymi Judá ayllu runakunapas Israelpi wakin ayllu runakunapas Davidtaqa munakuqku.
17 Saulmi sonqonpi nisharqan: “Ama noqachu Davidtaqa wañuchisaq, Filistea runakuna aswanpas wañuchichun”,+ nispa. Chaymi Davidta nirqan: “Qhawariy, kuraq ususiy Meraftan+ qopusayki paywan casarakunaykipaq.+ Ichaqa kayllatan mañakuyki: Yanapashallaway, Jehová Diospa guerrankunata+ maqanakuypipas yanapallaway”, nispa.
18 Davidmi ichaqa nirqan: “¿Ima allintaq noqari kani reypa qataynin kanaypaq? ¿Ima allintaq taytaypa familianpas kashan Israel llaqtapiri?”,+ nispa.
19 Ususin Merafta Davidman qonanpaq p’unchay chayamuqtinmi ichaqa Saulqa ususinta ña casarachipusqaña, payqa Meolá llaqtayoq Adriel+ runamanmi qorapusqa.
20 Saulpa jujnin ususin Micalmi+ Davidmanta enamorasqa kasharqan, chaytan Saulman willarqanku, jinan payqa allinpaq chayta qhawarirqan.
21 Saulqa sonqollanpin nisharqan: “Kay ususiyta qopusayki niqtiyqa ususiyraykun Filistea runakunawan maqanakuq rinqa, jinan wañumunqa”,+ nispa. Jinan Saulqa jujmanta nirqan: “Kunanmi qatayniy kapunki”, nispa.
22 Chaymantataq Saulqa kamachinkunata nirqan: “Davidta nimuychis: Reypa ususinwan casarakuy. Rey Saulqa allinpaqmi qhawarisunki, kamachinkunapas munakusunkikun, nispaykichis, ichaqa aman willankichischu noqa chayta nisqaytaqa”, nispa.
23 Saulpa kamachinkuna chayta willaqtinkutaq Davidqa paykunata nirqan: “¿Facilchu qankunapaq kanman reypa ususinwan casarakuy? Noqaqa wajcha* runan kakuni pisipaq qhawarisqa”,+ nispa.
24 Jinan Saulpa kamachinkunaqa willarqanku Davidpa imachus nisqanta.
25 Saulmi ichaqa kamachinkunata nirqan: “Davidta nimuychis: Rey Saulqa manan imatapas mañasunkichu* ususinwan casarakunaykipaqqa,+ payqa pachaj Filistea runakunaq qhari kaynin qarachata+ apamunallaykitan munashan, chhaynapi enemigonkunamanta vengakunanpaq, nispa”. Saulqa Filistea runakuna Davidta wañuchimunankutan munasharqan, chaymi chhaynata kamachirqan.
26 Chaymantataq Saulpa kamachinkunaqa Davidman chayta willamurqanku, chayta uyarispan Davidqa nirqan: “Chhaynaqa atiymanmi reypa qataynin kayta”,+ nispa. Chaymi Davidqa manaraq tiempo junt’akushaqtin
27 runankunawan kuska Filistea runakunawan maqanakuq rirqan, jinaspa iskay pachaj Filistea runakunata wañuchimurqan. Chay runakunaq qhari kaynin qarachatan apamurqan reypa qataynin kananpaq. Jinan Saulqa ususin Micalta Davidman qopurqan paywan casarakunanpaq.+
28 Saulqa allintapunin yacharqan Jehová Diosqa Davidwan kashasqanta,+ ususin Micalpas payta munakusqanta.+
29 Chaymi Saulqa Davidta astawan manchakurqan. Wañukapunan p’unchaykaman payqa Davidpa enemigon kapurqan.+
30 Sapa kuti Filistea umallikuna maqanakuq lloqsimuqtinmi Davidqa atipaqpuni paykunata.* Saulpa llapa kamachinkunamantapas paypunin tukuy imatapas aswan allinta ruwaq,+ payqa allin respetasqan kapurqan.+
Uraypi willakuykuna
^ Chaypiqa “allin yuyaywanmi imatapas ruwaq” nillanmantaqmi.
^ Hebreo rimaypiqa “Diosmanta jamuq mana allin espíritu” ninmi. Qhaway Explicasqa simikuna nisqapi “Espíritu” nisqata.
^ Chaypiqa “profeta jina” nillanmantaqmi.
^ Hebreo rimaypiqa “Davidmi Israel runakunaq ñaupanta lloqsiqpas jaykuqpas” ninmi.
^ Wajchataqa “pobre” nillankutaqmi.
^ Chaypiqa “manan ima preciotapas mañasunkichu” nillanmantaqmi.
^ Chaypiqa “allin yuyaywan imatapas ruwaq” nillanmantaqmi.
