1 Samuel 19:1-24
19 Qhepamantaq Saulqa Jonatanman llapan kamachinkunamanwan willarqan Davidta wañuchiy munasqanta.+
2 Chaytan Jonatanqa Davidman willarqan payta munakusqanrayku,+ nirqanmi: “David, papaymi wañuchiyta munashasunki. Paqarin tutamantanqa makillan kashanayki, maypipas pakakamunki jinaspa chayllapi qhepakunki.
3 Noqan papaywan kuska campota lloqsimusaq, maypichus qan kashanki chay qayllaman. Chaypin qanmanta rimapayasaq, imatapas yachaspayqa apuraymi qanman willamusayki”,+ nispa.
4 Jinan Jonatanqa Davidmanta allinta rimaspa+ papanta nirqan: “Reyníy, ama kamachiyki David contraqa juchallikuychu. Manan payqa imatapas qan contraqa ruwarqanchu, aswanmi payqa tukuy imatapas allinniykipaq ruwashan.
5 Payqa wañuytapas mana manchakusparaqmá riki Goliat-tapas* wañuchishan.+ Chaymá riki Jehová Diospas Israel runakunataqa salvashan. ¿Manachu qan kikiyki chayta rikuspa kusikurqanki? Chhaynaqa, ¿imaraykutaq mana juchayoq runaq yawarnintari yanqamanta jich’awaq? ¿Imaraykutaq David contrari juchallikuwaq?”,+ nispa.
6 Jinan Saulqa Jonatanta kasuspa nirqan: “Wiñaypaq kausaq Jehová Diospa sutinpin jurani, manan Davidtaqa wañuchisaqchu”, nispa.
7 Chaymantataq Jonatanqa Davidta wajamuspa lliuta willarqan. Jinamantaq Saulpa ñaupanman pusarqan, chaypin Davidqa Saulpa kamachisqanta ruwashallarqan.+
8 Tiempowanmi Israel runakunawan Filistea runakunawanqa jujmanta guerraman jaykurqanku, chaypin Davidqa askha Filistea runakunata wañuchirqan. Jinan Filistea runakunaqa manchakuymanta ayqekurqanku.
9 Juj p’unchaymi Saulqa wasinpi tiyasharqan makinpi lanzan jap’iykusqa. Davidtaq arpanta tocasharqan,+ chayllamanmi Jehová Diospa kachamusqan mana allin piensaykuna,* Saulman jamurqan.+
10 Jinan Saulqa qonqaylla Davidman lanzanwan chanqarqan, Davidmi ichaqa laq’ochirqan, jinan lanzaqa perqaman ch’antakurqan. Chaymantataq Davidqa lloqsispa chay tutapacha escapakurqan.
11 Qhepamantaq Saulqa wakin runakunata kacharqan Davidpa wasinta qhawamunankupaq, chhaynapi tutallamanta wañuchinankupaq.+ Esposan Micalmi ichaqa Davidta nirqan: “Manachus kunan tuta ayqekunki chayqa, paqarinmi wañuchisunkiku”, nispa.
12 Jinan Micalqa usqhaylla Davidta yanaparqan ventananta escapakunanpaq.
13 Chaymantataq Micalqa terafim* idolota jap’ispa puñunaman churarqan, uman ladomantaq cabra pelomanta ruwasqa mallata* churarqan, chaymantataq juj qatanawan qataykurqan.
14 Davidta jap’inankupaq Saulpa kachamusqan runakuna jamuqtintaq Micalqa nirqan: “Onqosqan kashan”, nispa.
15 Saultaq jujmanta runakunata kachallarqantaq: “¡Maski puñunantintapas apamuwaychis wañuchinaypaq!”,+ nispa.
16 Davidpa wasinman Saulpa kamachinkuna jaykuqtinkutaq, puñunanpi kapushasqa terafim* ídolo, uman ladopitaq cabra pelomanta ruwasqa malla.
17 Jinan Saulqa Micalta nirqan: “¿Imaraykun llullakuwarqanki? ¿Imaraykun jinallata qhawarqanki enemigoypa escapakunanta?”,+ nispa. Micaltaq nirqan: “Mana kachariwankichu chayqa sipirusaykin nispan niwan”, nispa.
18 Davidqa Ramá llaqtapi Samuelpa kasqanmanmi ayqekurqan,+ chaypin Saulpa imachus ruwasqanta llapanta willakurqan. Chaymantataq iskayninku Nayojman rirqanku, jinaspa chaypi qhepakurqanku.+
19 Tiempowanmi Saulman willarqanku: “Davidqa Ramá llaqtapi kaq Nayoj ladopin kashan”, nispa.
20 Chayta yacharuspan Saulqa runakunata kacharqan Davidta jap’imunankupaq. Chayman chayanankupaqmi kuraq profetakunaqa profetizashasqaku, Samueltaq paykunata umallishasqa. Chayllamanmi Diospa espiritunqa Saulpa kachasqan runakunamanpas junt’aykurqan, jinan paykunapas profetakuna jina portakurqanku.
21 Chayta yacharuspan Saulqa jujmanta runakunata kachallarqantaq, paykunapas profetakuna jinan portakullarqankutaq. Jinan Saulqa juj kutitawan runakunata kacharqan, chay kinsa kaq t’aqa runakunapas profetakuna jinan portakuyta qallarirqanku.
22 Chaymi Saulqa pay kikin Ramá llaqtata rirqan. Secú ladopi kaq jatun unu pozoman chayaspan Saulqa tapukurqan: “¿Maypin kashanku Samuelwan Davidwan?”, nispa. Runakunataq nirqanku: “Ramá llaqtapi kaq Nayoj+ ladopin kashanku”, nispa.
23 Ramá llaqtapi Nayoj ladoman rishaqtinmi Diospa espiritunqa Saulman junt’aykurqan, jinan paypas profeta jina portakuspa chay ladoman chayarqan.
24 Chayman chayaspan Saulpas p’achanta ch’utikurqan, jinaspa Samuelpa ñaupanpi profeta jina portakurqan. Chaypin payqa ukhu p’achallayoq* kumparayarqan chay p’unchay ch’isiyaq chay tuta illariqpiwan. Jinan “¿Saulpas profetachu kapun?”+ nisqa rimay karqan.
Uraypi willakuykuna
^ Hebreo rimaypiqa “Filistea runatapas” ninmi.
^ Hebreo rimaypiqa “mana allin espíritu” ninmi. Qhaway Explicasqa simikuna nisqapi “Espíritu” nisqata.
^ Chayqa tela jinan karqan.
^ Chaypiqa “q’alalla” nillanmantaqmi.
