1 Samuel 20:1-42
-
Jonatán Davidpaq junt’aq kasqanmanta (1-42)
20 Jinan Davidqa Ramá llaqtapi Nayoj ladomanta ayqekamurqan, jinaspa Jonatanpa kasqanman chayarqan, paytan tapurqan: “¿Imatan ruwarqani?+ ¿Iman juchay? ¿Imanarqanin noqa taytaykita wañuchiyta munawananpaq?”, nispa.
2 Jinan Jonatanqa nirqan: “¡Qanqa manapunin wañunkichu! ¡Ama chaytaqa ni piensaypaschu!+ Papayqa manan imatapas ruwanmanchu noqaman mana willawaspaqa. ¿Imaraykutaq chaytari mana willawanmanchu karqan? Qanqa manan wañunkichu”, nispa.
3 Davidtaq juramentota ruwasparaq nirqan: “Papaykiqa allintan yachan noqata munakuwasqaykita,+ chaychu kunan willasunkiman karqan, yaqapaschá payqa nirqan: Ama Jonatanmanqa willasaqchu, llakikunmanmi, nispa. ¡Wiñaypaq kausaq Jehová Diospa sutinpi qanpa sutiykipi iman jurani, wañuy patallapiñan kashani!”,+ nispa.
4 Jinan Jonatanqa Davidta nirqan: “Imachus mañakuwasqaykitan ruwapusayki”, nispa.
5 Chaymi Davidqa nirqan: “Paqarinqa mosoq killa p’unchaymá+ riki. Chaypiqa reywanpunin mijuq kani. Ama jinachu kay, minchha p’unchay tardekama campopi pakakamusaq.
6 Papaykichus noqamanta tapukunqa chayqa ninki: Davidqa Belén+ llaqtata rinanpaqmi valekuwan, chaypis familiantin sapa wata jaywana sacrificiota jaywanqaku,+ nispa.
7 Chayta uyarispachus papayki allinmi ninqa chayqa, manan imamantapas manchakusaqñachu. Ichaqa phiñakunqachus chayqa, chaypin yachanki wañuchiytapuni munawasqanta.
8 Chhayna kaqtinqa, Jehová Diospa ñaupanpitaq juramentota ruwanchis+ chayqa, mana tukukuq munakuyniykitayá*+ rikuchiway. Imamantapas juchayoq kani chayqa,+ qan kikiyki aswanpas wañuchipuway, imapaqñan papaykiman entregawankiman”, nispa.
9 Jonatantaq nirqan: “¡Maypin kunan chhaynata niwankiman! Maypitaq papay wañuchiyta munashasuqtiyki mana willaykimanchu”,+ nispa.
10 Jinan Davidqa nirqan: “¿Pitaq willamuwanqa papayki noqapaq phiñasqa sayariqtinri?”, nispa.
11 Chaymi Jonatanqa Davidta nirqan: “Jaku campota”, nispa. Jinan iskayninku campoman rirqanku.
12 Chaypin Jonatanqa Davidta nirqan: “Israelpa Diosnin Jehová Dios testigo kachun, paqarinmi otaq minchhatan kay horasta jina papayta tapusaq imatachus piensashan chayta. Manachus qanwan phiñasqa kashan chayqa willachimusaykin piwanpas.
13 Ichaqa wañuchiytachus papay munashasunki chayqa, willamusaykin chaytapas, chhaynapi ayqekunaykipaq. Manachus chayta ruwasaq chayqa Jehová Dios sinchita castigawachun. Jehová Dios qanwan kachun+ imaynan papaywanpas karqan jinata.+
14 Qanpas Jehová Diospa mana tukukuq munakuynintayá rikuchiwanki kausashaqtiypas wañupusqay qhepamanpas.+
15 Amayá jayk’aqpas familiaytaqa qonqankichu*+ Jehová Diosña kay pachamanta llapa enemigoykikunata chinkachinqa chaypas”, nispa.
16 Chaymantataq Jonatanqa juj juramentota ruwarqan Davidpa familianwan:* “Jehová Diosqa Davidpa llapa enemigonkunamantan cuentata mañanqa”, nispa.
17 Jonatanqa pay kikinta jinan Davidta munakurqan,+ chaymi Davidta jujmanta jurachirqan paypas munakuyninta rikuchinanpaq.
18 Chaymantataq Jonatanqa Davidta nirqan: “Paqarinqa mosoq killa p’unchaymá+ riki. Manataq jamunkichu chayqa, tiyanaykiqa ch’usaqmi kanqa.
19 Minchha p’unchayqa astawanraqchá reparakunqa chaypi mana kasqaykiqa. Qayninpa jinan kay pakakusqaykiman jamunki, jinaspa kay rumi qayllallapi kanki.
20 Noqan jamuspay kinsa kutita flechamusaq chay rumiq ladonman. Imatapas flechashayman jinan juj jawallaman flechamusaq.
21 Chaymantataq kamachiyta nisaq: Flechakunata maskhamuy, nispa. Chay kamachitachus nimusaq: Flechakunaqa kay qayllallapin kashan, oqarimuy, nispa chayqa, kutimpullanki ama manchakunkichu. Wiñaypaq kausaq Jehová Diospa sutinpin jurayki, manan imapas pasasunkichu.
22 Ichaqa chay kamachitachus nimusaq: Flechakunaqa aswan jaqay ladopiraqmi kashan, nispa chayqa, usqhayllan ripunki, Jehová Diosmi kachapushasunki.
23 Jehová Dios wiñaypaq testigo kachun+ iskayninchis kay juramento ruwasqanchismanta”,+ nispa.
24 Jinan Davidqa imaynachus rimasqankuman jina campopi pakakamurqan. Mosoq killa p’unchay chayamuqtintaq rey Saulqa mijunanpaq mesapi tiyaykurqan.+
25 Saulqa maypichus tiyaqpuni chaypin perqa k’uchupi tiyasharqan. Ladonpin tiyasharqan Abner,+ chimpanpitaq tiyasharqan Jonatán. Davidpa tiyananmi ichaqa ch’usaq kasharqan.
26 Chay p’unchayqa manan Saulqa imanirqanpaschu Davidmantaqa, aswanmi sonqollanpi nirqan: “Imapaschá pasarun, chaypaschá ch’uyanchakunan kaqtin mana jamunchu”,+ nispa.
27 Qhepantin p’unchaypas* Davidpa tiyananqa ch’usaqllan kasharqan, chaymi Saulqa Jonatanta tapurqan: “¿Imaraykutaq Jesepa+ wawanri mana mijuq jamunchu qayna-unchaypas ni kunan p’unchaypas?”, nispa.
28 Jinan Jonatanqa Saulta nirqan: “Davidqa Belén llaqtata rinanpaqmi permisota mañakuwan.+
29 Niwanmi: Wayqeymi wajachimushawan familiantin sacrificiota jaywanaykupaq, chayrayku ama jinachu kay permisota qoykuway wayqeykunawan tupaq rinaypaq, nispa. Chaymi mana reypa mesanmanqa jamunchu”, nispa.
30 Chayta uyarispan Saulqa sinchi phiñasqa Jonatanta nirqan: “¡Yau mana kasukuq k’ullu warmiq wawan! Manan reparawanchu Jesepa wawanman sayapakusqayta nishankichu. Chay ruwasqaykiqa p’enqaymi qanpaqpas mamaykipaqpas.
31 Manachus Jesepa wawan wañunqa chayqa, manan qanpas ni gobiernoykipas allin sayasqachu kanqa.+ ¡Phaway chay Davidta maskhachimuy! Wañunanpunin payqa”,+ nispa.
32 Jonatanmi ichaqa Saulta nirqan: “¿Imaraykutaq Davidri wañunman?+ ¿Imatataq payri ruwarqan?”, nispa.
33 Jinan Saulqa wañuchiy yuyaywan Jonatanman lanzanta chanqarqan.+ Chhaynapin Jonatanqa yacharqan Saulqa Davidta wañuchiytapuni munasqanta.+
34 Chay ratupachan Jonatanqa tiyananmanta jatarispa sinchi phiñasqa ripurqan. Chay p’unchayqa manan payqa imatapas mijurqanchu. Sonqonmi nanarqan taytan chhaynata pisichasqanmanta, Davidmantapas llakisqan kasharqan.+
35 Tutamantantaq Jonatanqa Davidwan rimanakusqankuman jina juj wayna kamachita pusarikuspa campota lloqsirqan.+
36 Chaypin Jonatanqa chay kamachita nirqan: “Phaway flechasqay flechakunata maskhamunki”, nispa. Jinan kamachinqa usqhaylla phawarqan, chaykamataq Jonatanqa chay kamachiq phawashasqanmantapas aswan karumanraq flecharqan.
37 Maypichus flecha kasharqan chayman chay kamachi chayaruqtintaq Jonatanqa fuerteta nirqan: “¡Aswan jaqay ladopin flechaqa kashan!”, nispa.
38 Jonatanqa nillarqantaqmi: “¡Apuraylla phaway! ¡Ama tiempota usuchiychu!”, nispa. Chay kamachitaq flechakunata oqarimuspa Jonatanpa kasqanman kutimpurqan.
39 Chay kamachiqa manan imatapas repararqanchu, Jonatanwan Davidllawanmi chaytaqa yacharqanku.
40 Chaymantataq Jonatanqa armankunata kamachinman qospa nirqan: “Phaway llaqtaman kaykunata aparuy”, nispa.
41 Chay kamachi pasapuqtinmi Davidqa pakakusqanmanta lloqsimurqan, payqa manan Jonatanmanta nishu karupichu kasharqan. Jonatanpa kasqanman jamuspan Davidqa qonqoriykukuspa kinsa kutita pampakama k’umuykurqan. Chaymantataq abrazanakuspa* iskayninku waqaykurqanku. Davidmi aswan khuyaytaqa waqaykurqan.
42 Jonatanmi Davidta nirqan: “Ama llakikuychu, phaway rillayña. Ñamá riki Jehová Diospa sutinpi juraspa+ nirqanchisña: Jehová Dios wiñaypaq testigo kachun qanwan noqawan, familiaykiwan familiaywan juramento ruwasqanchismanta+ nispanchis”, nispa.
Jinan Davidqa ripurqan, Jonatantaq llaqtaman kutimpurqan.
Uraypi willakuykuna
^ Qhaway Explicasqa simikuna nisqapi “Mana tukukuq munakuy” nisqata.
^ Chaypiqa “Mana tukukuq munakuyniykitan familiayman rikuchishallanki” nillanmantaqmi. Qhaway Explicasqa simikuna nisqapi “Mana tukukuq munakuy” nisqata.
^ Hebreo rimaypiqa “Davidpa wasinwan” ninmi.
^ Hebreo rimaypiqa “Mosoq killa p’unchaypa qhepan p’unchaypas” ninmi.
^ Hebreo rimaypiqa “much’anakuspa” ninmi.
