1 Samuel 21:1-15
21 Chaymantataq Davidqa Nob+ llaqtaman chayarqan sacerdote Aimelecpa kasqanman. Davidta rikuruspan Aimelecqa mancharikurqan, jinaspa tapurqan: “¿Imaraykutaq sapallaykiri jamushanki? ¿Manachu pipas compañamusunki?”,+ nispa.
2 Jinan Davidqa nirqan: “Reypa kamachinta ruwaqmi jamushani, ichaqa aman kay kamachisqaytaqa ni ima nisqaytapas pimanpas willankichu nispan nimuwan. Chaymi runaykunawan rimanakurqani juj jawapi tupanaykupaq.
3 Chayrayku, ¿manachu pisqa t’antaykita qoykuwankiman? Mana kaqtinqa imallaykitapas qoykuway”, nispa.
4 Chay sacerdotetaq Davidta nirqan: “Kashanmi t’antayqa ichaqa manan común t’antachu, Diosman jaywasqay t’antallan+ kashan. Chaytachá qoykiman, ichaqa ¿runaykikunataq warmikunawan kashanman karqan?”,+ nispa.
5 Jinan Davidqa nirqan: “Manan wiraqocháy. Maytaña maqanakuq lloqsiyku chaypas manan ima warmiwanpas kaykuchu.+ Chhayna maqanakuykunapipas runaykunaqa ch’uyallapunin kanku. ¡Chaychu kunan kay jatun ruwayta ruwashaspayku warmiwan kamuykuman!”, nispa.
6 Jinan chay sacerdoteqa Diosman jaywasqa t’antata+ Davidman qorqan. Chay t’antaqa manañan Jehová Diosta yupaychana karpa ukhupiñachu kasharqan, chaytaqa chayllaraq ruwasqa t’antawanmi cambiana p’unchaypi cambiapusqakuña.
7 Chay p’unchaymi Saulpa kamachin Doegqa+ Jehová Diospa ñaupanpi kasharqan.* Chay runaqa Edom llaqtayoqmi+ karqan, Saulpa michiqninkunaq umallintaqmi karqanpas.
8 Davidmi Aimelecta nirqan: “¿Manachu lanzaykipas otaq espadaykipas kapusunki? Reypa kamachimuwasqan urgente kasqanraykun usqhaylla jamuspay mana espadaytapas ni imaytapas apakamusqanichu”, nispa.
9 Chaymi sacerdoteqa nirqan: “Elá wayq’opi+ wañuchisqayki Goliatpa espadallanmi+ kaypi kashan. Chayqa sacerdoteq churakunan unku*+ qhepapin juj telawan k’uyusqa kashan. Chayllan kashan, munanki chayqa chayta apakuy”, nispa. Jinan Davidqa nirqan: “Chayta qoykuway, manan chay espada jinaqa jujqa kanmanchu”, nispa.
10 Chay p’unchaymi Davidqa Nob llaqtamanta ripurqan, payqa Saulmantan ayqekusharqan.+ Jinaspan Akís reypa kamachisqan Gaj+ llaqtaman chayarqan.
11 Jinan Akís reypa kamachinkunaqa payta nirqanku: “¿Manachu kayqa Israel llaqtaq reynin David kashan? ¿Manachu paymanta takispa tususpa nisharqanku:Saulmi waranqa runata wañuchimun,Davidtaq chunka waranqa runata,+ nispa?”.
12 Chay uyarisqanpi piensaspan Davidqa Gaj llaqtapi rey Akista sinchita manchakurqan.+
13 Jinan Davidqa chay runakunaq ñaupanpi locoman tukuspa+ llaqta punkuta qelqayta qallarirqan. Thoqayninpas lliutan sunkhan urayta llausaykurqan.
14 Chayta rikuspan Akís reyqa kamachinkunata nirqan: “¡Kay runaqa locomá kashan riki! ¿Imapaqmi kayman pusamuwankichis?
15 ¿Locokunachu faltawan chaytaq kay runata pusamuwankichis? ¿Kaytachu kunan wasiyman jaykuchiyman?”, nispa.
Uraypi willakuykuna
^ Yaqapaschá payqa chaypi qhepakunan karqan prometekusqanrayku otaq qhelli kasqanrayku otaq lepra onqoyniyoq kasqanrayku.
^ Unkuqa jatun suéter otaq chaleco jinan karqan. Qhaway “Astawan yachanapaq B5” nisqata.