1 Samuel 22:1-23
22 Chaymantataq Davidqa chay llaqtamanta ripuspa+ Adulan+ llaqtapi juj t’oqopi pakakurqan. Chaypi kasqanta yacharuspan wayqenkunapas, tayta-mamanpas, llapa familianpas paypa kasqanman ripurqanku.
2 Paymanmi juñukurqanku imaymana problemayoq runakuna, manupi tarikuq runakuna, phiñasqa runakuna ima. Llapanpiqa yaqa tawa pachaj runakunan karqanku. Paykunaq umallinkun kapurqan David.
3 Qhepamantaq Davidqa Moabpi+ kaq Mizpé llaqtata rirqan, jinaspa Moab reyta nirqan: “Ama jinachu kay, ¿manachu tayta-mamayta saqeykuykichisman? Imatachus Dios noqapaq ruwanqa chayta yachanaykamallan kanqa”, nispa.
4 Chhaynapin Davidqa Moab reyman tayta-mamanta saqeykurqan. Paykunaqa Davidpa tukuy pakakusqan+ tiempon chaypi tiyarqanku.
5 Qhepamanmi profeta Gadqa+ Davidta nirqan: “Ama chaypi pakakuyñachu, phaway Judá aylluman riy”,+ nispa. Jinan Davidqa ripuspa Jérej sach’a-sach’aman jaykurqan.
6 Juj kutinmi Saulqa Guibeá+ moqo patapi, tamarisco sach’a k’uchupi tiyasharqan, payqa soldadonkunaq chaupinpin lanzan jap’iykusqa kasharqan. Chaypin yacharqan maypichus Davidpas runankunapas kasharqanku chayta.
7 Jinan Saulqa chay soldadonkunata nirqan: “Uyariwaychis Benjamín ayllu runakuna. ¿Imatan qankuna piensashankichis? ¿Jesepa+ churinmi campokunata uvas chajrakunata qowanqaku nishankichischu? ¿Pachaj soldadokunaq umallinta, waranqa soldadokunaq umallintan churawanqaku nishankichischu?+
8 ¿Imaraykun qankuna noqa contra jatarishankichis? ¿Imaraykun mana mayqenniykichispas willawarqankichischu wawaywan Jesepa wawanwan juj juramento ruwasqankuta?+ ¿Imaraykun mana khuyapayakuq kankichis? ¿Manachu willawankichisman karqan kikin waway kamachiy Davidta noqa contra sayarinanpaq tanqasqanta? Qhawariychis ñan wañuchiytaña munashawanpas”, nispa.
9 Jinan Saulpa kamachinkunaq umallin Doegqa*+ Saulta nirqan:+ “Nob llaqtapin rikumuni Jesepa wawan Davidta, paymi Aitufpa+ wawan Aimelecpa kasqanman chayamurqan.
10 Chaypin Aimelecqa Davidpa sutinpi Jehová Diosta tapun. Chaymantapas mijunatan qoykun, jinallataq Goliatpa espadantapas”,+ nispa.
11 Chaymi Saulqa kaq ratupacha Aitufpa wawan Aimelecta, taytanpa familianmanta llapa sacerdotekunatawan Nob llaqtamanta wajachimurqan. Jinan paykunaqa llapanku Saulpa ñaupanman jamurqanku.
12 Chaypin Saulqa nirqan: “¡Uyariway Aitufpa wawan!”, nispa. Paytaq nirqan: “Niway wiraqocháy”, nispa.
13 Jinan Saulqa nirqan: “¿Imaraykun Jesepa wawanwan rimanakuspa noqa contra jatarishankichis? ¿T’antatawan espadatawantaqsi qosqanki? ¿Paypa sutinpitaqsi Diostapas tapusqanki? Davidqa enemigoymi, noqa contran sayarishan. Payqa wañuchiytan munashawan”, nispa.
14 Chayta uyarispan Aimelecqa reyta nirqan: “Davidqa llapa kamachiykikunamantapas aswan confiasqayki runamá riki.+ Chaymantapas payqa qanta cuidaq soldadoykikunaq umallinmi, qatayniykitaq kanpas,+ wasiykipipas ancha respetasqa.+
15 Noqaqa askha kutipin Davidpa sutinpiqa Diosta tapurqani,+ manan kunallanraqchu. ¡Manan noqaqa jayk’aqpas qan contraqa jatariymanchu! Reyníy, amapuni noqatapas taytaypa familiantapas juchachawaykuchu. Noqaqa manan kay niwasqaykimantaqa imatapas yacharqanichu”,+ nispa.
16 Jinan rey Saulqa Aimelecta nirqan: “¡Kunanmi wañuchisaykichis,+ qantapas taytaykiq familiantapas!”,+ nispa.
17 Chayta nispan Saulqa ladonpi kaq soldadokunata* nirqan: “¡Usqhaylla! ¡Wañuchiychis Jehová Diospa sacerdotenkunata! ¡Paykunaqa Davidmanmi sayapakushanku! ¡Ayqekushasqanta yachashaspankun mana willawarqankuchu!”, nispa. Saulpa soldadonkunan ichaqa Jehová Diospa sacerdotenkunata mana wañuchiyta munarqankuchu.
18 Chaymi rey Saulqa Edom llaqtayoq+ Doegta+ nirqan: “Chhaynaqa, ¡qan wañuchiy!”, nispa. Jinan Doegqa kaq ratupacha sacerdotekunata wañuchiyta qallarirqan. Chay p’unchaymi wañuchirqan linomanta unkuwan* p’achasqa pusaq chunka pisqayoq sacerdotekunata.+
19 Chaymantapas sacerdotekunaq tiyasqan Nob+ llaqtapipas llapa runakunatan wañuchirqan; qharikunata, warmikunata, erqekunata, qholla wawakunatapas; jinallataq torokunata, asnokunata, ovejakunatapas. Lliutan espadawan wañuchirqan.
20 Aimelecpa jujnin wawallanñan Davidpa kasqanman ayqekurqan, paypa sutinmi karqan Abiatar.+ Aimelecqa Aitufpa churinmi karqan.
21 Abiatarmi Davidta nirqan: “Saulmi wañurachipun Jehová Diospa sacerdotenkunata”, nispa.
22 Chayta uyarispan Davidqa Abiatarta nirqan: “Edom llaqtayoq Doegta Nob llaqtapi rikuspan nisharqani: Kayqa willarunqapunin Saulman,+ nispa. Noqan juchayoq kani taytaykiq llapa familian wañusqanmanta.
23 Ama manchakuychu, noqawan kaypi qhepakuy. Pipas qanta wañuchiyta munasunki chayqa noqatapas wañuchiyta munashawanman jinan kanqa. Noqan cuidasayki”,+ nispa.
Uraypi willakuykuna
^ Chaypiqa “Edom llaqtayoq Doegqa” nillanmantaqmi.
^ Hebreo rimaypiqa “phawaqkunata” ninmi. Chay phawaqkunaqa reypa carretanpa ñaupanta phawaq soldadokunan karqanku.
^ Unkuqa jatun suéter otaq chaleco jinan karqan. Qhaway “Astawan yachanapaq B5” nisqata.