1 Samuel 26:1-25
26 Tiempowanmi Zif+ llaqta runakunaqa Guibeá+ llaqtata rirqanku, jinaspan Saulta nirqanku: “Davidqa Akilá moqopin pakakushan, Jesimonpa*+ chimpanpi”, nispa.
2 Jinan Saulqa Israelmanta kinsa waranqa soldadokunata ajllarqan, jinaspa paykunawan Davidta maskhaq rirqan Zif ch’inneq ladoman.+
3 Chaymantataq Saulqa ñan patapi karpakurqan, Jesimonpa chimpanpi kaq Akilá moqopi. Davidqa yacharurqanmi Saúl payta maskhamushasqanta. Chay tiempopaqqa Davidqa ch’inneqpin tiyasharqan.
4 Chaymi Davidqa wakin runankunata kacharqan Saulpunichus jamusqanta yachamunankupaq.
5 Chaymantataq Davidqa Saulpa karpakusqanman rirqan, chaypin rikurqan maypichus Saulpas Abnerpas+ puñusharqan chayta. Abnerqa Nerpa churinmi karqan, Saulpa soldadonkunaq umallin. Saulqa chaupipin puñusharqan, soldadonkunataq muyuriqninpi karpasqa kasharqanku.
6 Davidwan kuskan kasharqanku Hetpa familianmanta+ Aimélec, Zeruyapa+ churin Abisaipiwan, Abisaiqa+ Joabpa wayqenmi karqan. Paykunatan Davidqa tapurqan: “¿Pin noqawan jaykunqa Saulpa kasqanman?”, nispa. Jinan Abisaiqa nirqan: “Noqawan jaykusun”, nispa.
7 Jinan Davidwan Abisaiwanqa tutallapi Saulpa kasqanman jaykurqanku, jinaspan Saulta puñushaqta tarirqanku karpa-karpa chaupipi. Lanzanmi umanpa ladonpi sayaykachisqa kashasqa, Abnertaq wakin soldadokunapiwan Saulpa muyuriqninpi puñushasqaku.
8 Jinan Abisaiqa Davidta nirqan: “Kunanmi Diosqa makiykiman enemigoykita entregashasunki.+ Ama jinachu kay, lanzawan pampaman juj kutillata sat’irusaq, chayllapaqmi kashan”, nispa.
9 Davidmi ichaqa Abisaita nirqan: “Ama imanaypaschu. Manan pipas Jehová Diospa ajllakusqanta+ wañuchispaqa jinallaqa qhepanmanchu”,+ nispa.
10 Davidqa nillarqantaqmi: “Wiñaypaq kausaq Jehová Diospa sutinpin jurayki, payqa wañunqapunin. Jehová Dioschus wañuchinqa,+ ichari llapa runa jinachus imaraykupas wañunqa,+ mana chayqa guerraman rispachus wañunqa.+
11 Noqan ichaqa manapuni jayk’aqpas Jehová Diospa ajllakusqantaqa imanaymanpaschu.+ ¿Jehová Dios chay ruwayta mana allinpaq qhawarisqanta yachashaspaychu kunan chayta ruwayman? Jaku ripullasunña, lanzantawan unu apanan jarrantawan aparikusun”, nispa.
12 Chaymantataq Davidqa Saulpa saunanpi kaq lanzanta unu apanan jarrantawan aparikuspa ripurqan, chaytaqa manan pipas yacharqanchu. Jehová Diosmi paykunataqa wañusqata jina puñurachipurqan chaymi mana repararqankuchu.+
13 Jinan Davidqa Saulpa kasqanmanta karuman rirqan, chimpanpi kaq orqo patakama.
14 Chay patamantan Davidqa Nerpa churin Abnerta+ llapa soldadokunatawan fuerteta nirqan: “¡Abner! ¡Uyariway!”, nispa. Abnertaq kutichirqan: “¿Pin kanki? ¿Imaraykun qaparkachaspa reyta rijch’achimunki?”, nispa.
15 Davidtaq nirqan: “¿Manachu qanqa valiente runa kanki? Israelpiqa manamá riki qan jinaqa pipas kanchu. Chhaynaqa, ¿imaraykutaq juj soldado reyta wañuchiq jaykumushaqtinri mana cuidarqankichu?+
16 Qanqa manan allintachu reyniykita cuidarqanki. Wiñaypaq kausaq Jehová Diospa sutinpin jurayki, qanqa wañunaykin reyta mana cuidasqaykimanta, Jehová Diospa ajllakusqanta+ mana qhawasqaykimanta. Qhawariy, ¿maymi reypa saunanpi kaq lanzanpas unu jarranpas?”,+ nispa.
17 Saultaq Davidpa kunkanta repararuspa nirqan: “Wawáy David, ¿qanchu kashanki?”,+ nispa. Davidtaq kutichirqan: “Arí, noqan kashani reyníy”, nispa.
18 Chaymantapas nillarqantaq: “¿Imaraykun kay kamachiykita qatikachawanki?+ ¿Imatan noqa ruwarqani? ¿Ima juchaymantan qatikachawanki?+
19 Reyníy, ama jinachu kay uyariykuway. Jehová Dioschus noqa contra churarqasunki chayqa, jak’u ofrendatan payman jaywasaq, paytaq chaskiykuwachun. Ichaqa runakunachus noqa contra churarqasunki+ chayqa Jehová Diospa ñaupanpi ñakasqa kachunku. Paykunan Jehová Diospa qowasqan herenciamanta t’aqawarqanku.+ Chayta ruwaspaqa: Lloqsiy, juj dioskunata yupaychamuy, nispapas nishawankuman jinan.
20 Kunanqa valekuykin reyníy, manan Jehová Diospa ñaupanmanta karupi wañuyta munanichu. Reyníy, noqaqa piki jinallan kani,+ ¿imaraykun p’isaqata* maskhaq jinaraq orqon-orqonta maskhamuwanki?”, nispa.
21 Jinan Saulqa nirqan: “Juchallikunin,+ kutimpuy wawáy, manañan imanasaykipaschu. Kunanmi noqata mana wañuchiwaspayki vidayta ancha valorniyoqpaq qhawarirqanki.+ Noqaqa sonso jinan ruwasharqani, chay ruwasqayqa sinchi mana allinpunin”, nispa.
22 Chaymi Davidqa nirqan: “Reyníy, kaypin lanzayki kashan, juj runaykita kachamuy apapunanpaq.
23 Jehová Diosña sapankanchisman kutichichun may chaninchus may junt’aqchus kasqanman jina.+ Kunan p’unchaymi Jehová Diosqa makiyman entregarqasunki, noqataq ichaqa mana imanarqaykipaschu Jehová Diospa ajllasqan kasqaykirayku.+
24 Jehová Dios vidayta chaninpaq qhawarichun, imaynan noqapas kay p’unchay vidaykita chaninpaq qhawarirqani jinata. Tukuy ñak’ariymantapas pay librawachun”,+ nispa.
25 Jinan Saulqa nirqan: “Wawáy David, Diosmi bendecisunki. Qanqa admiranapaq ruwaykunatan jamuq tiempopi ruwanki, lliu ruwasqaykipas allinkaman kanqa”,+ nispa. Chaymantataq Davidqa kutipurqan, Saultaq wasinman ripurqan.+
Uraypi willakuykuna
^ Chaypiqa yaqapaschá “ch’inneqpa” nillanmantaq.
^ P’isaqataqa “lluthu” nillankutaqmi.
