1 Samuel 28:1-25
-
En-Dor llaqtapi wañusqakunata rimachiq warmiman Saulpa risqanmanta (1-25)
28 Chay p’unchaykunapin Filistea runakunaqa Israel runakunawan maqanakunankupaq juñukurqanku.+ Chaymi Akisqa Davidta nirqan: “Yachasqayki jina, qanpas runaykikunapas noqawan kuskan maqanakuq rinkichis”,+ nispa.
2 Chayta uyarispan Davidqa nirqan: “Qanqa allintan yachanki imatachus kay kamachiyki ruwanantaqa”, nispa. Akistaq nirqan: “Chayraykun ajllasayki tukuy tiempo cuidaqniy soldado kanaykipaq”,+ nispa.
3 Chay tiempopaqqa ñan Samuelqa wañupurqanña, lliu Israel runakunataq khuyayta waqaykuspa Ramá llaqtanpi p’ampapurqanku.+ Saulqa Israel llaqtamantan qarqopurqan watuqkunatapas, wañusqakunata rimachiqkunatapas.+
4 Filistea runakunaqa maqanakuq rinankupaqmi juñukurqanku, jinaspa Sunem+ llaqtaman rispa chaypi karpakurqanku. Chaymi Saulqa Israelmanta lliu soldadokunata juñurqan, jinaspa Guilboa orqopi+ karpakurqanku.
5 Filistea runakunaq karpakusqanta rikuspan Saulqa sinchita mancharikurqan, sonqonraqmi sinchita phataqerqan.+
6 Saulqa Jehová Diospa yanapaynintan mañakuq,+ Jehová Diosmi ichaqa mana jayk’aqpas kutichiqchu, ni mosqoypipas, ni profetakunawanpas, ni Urimwanpas.*+
7 Jinan Saulqa kamachinkunata nirqan: “Wañusqakunata rimachiq warmita maskhamuychis,+ tapuqmi riyta munashani”, nispa. Kamachinkunataq nirqanku: “En-Dor+ llaqtapin kan juj warmi wañusqakunata rimachiq”, nispa.
8 Chaymi Saulqa mana reqsinankupaq juj p’achawan churarukuspa iskay kamachinkunantin tutallapi rirqan chay warmiwan rimaq. Chayaspataq Saulqa nirqan: “Ama jinachu kay, espiritukunata tapuykapuway imachus pasawanqa chayta.+ Juj runawanmi rimayta munani, payta wajapuway”, nispa.
9 Chay warmin ichaqa nirqan: “¿Manachu yachanki Saúl kay llaqtamanta watuqkunatapas wañusqakunata rimachiqkunatapas lliuta chinkachisqanta?+ Chhaynaqa, ¿imaraykutaq kaytari ruwawanki? Qanqa wañuchiwanankupaqmi juj trampata churashawanki”,+ nispa.
10 Jinan Saulqa Jehová Diospa sutinpi jurarqan: “¡Wiñaypaq kausaq Jehová Diospa sutinpin jurayki, manan pipas kay ruwasqaykimantaqa juchachasunkichu!”, nispa.
11 Chayta niqtinmi chay warmiqa Saulta tapurqan: “¿Pitan wajapusayki?”, nispa. Saultaq nirqan: “Samuelta wajapuway”, nispa.
12 “Samuelta”* rikuruspataq+ chay warmiqa qaparirqan, jinaspa Saulta nirqan: “¿Imaraykun engañawanki? ¡Qanqa Saulmá kasqanki!”, nispa.
13 Jinan Saulqa nirqan: “Ama manchakuychu. Willaykuway, ¿pitan rikushanki?”, nispa. Chay warmitaq nirqan: “Juj runan wichamushan, chay runaqa juj dios jinan”, nispa.
14 Saultaq jujmanta tapullarqantaq: “¿Imaynan kasqa chay runa?”, nispa. Chay warmitaq nirqan: “Chay runaqa kuraq runañan, jawa p’achantaqmi mana mangayoq”,+ nispa. “Samuelpuni” kasqanta reparaspataq Saulqa qonqorikuspa pampakama k’umuykurqan.
15 Jinan “Samuelqa” Saulta nirqan: “¿Imapaqmi kaykama wichachimuwanki?”, nispa. Saultaq nirqan: “Sinchi llakipin tarikushani. Filistea runakunan noqayku contra jamushanku. Diostapas maytañan wajakuni, ichaqa manan uyariwanchu. Manan ni mosqoypipas ni profetakunawanpas kutichimuwanchu.+ Chayraykun wajamushayki, willaykuway, ¿imatan ruwasaq?”,+ nispa.
16 “Samueltaq” nirqan: “¿Imaraykutaq noqatari tapuwanki? Jehová Diosqa ñan qanmantaqa t’aqakapunña,+ enemigoykitaqmi kapunpas.
17 Jehová Diosqa ruwanqapunin imatachus qanman willachiwarqan chaytaqa. Jehová Diosmi qantaqa Israelpi rey kanaykimanta orqopusunki, rantiykipitaq Davidta churapunqa.+
18 Amalec runakunan Jehová Diosta phiñachirqanku, chaymi payqa kamachirqasunki chinkachinaykipaq, qantaq ichaqa mana kasukurqankichu.+ Chayraykun Jehová Diosqa kayta ruwashasunki.
19 Chaymantapas Jehová Diosmi qantapas Israel runakunatapas Filistea runakunaq makinman entregasunkichis.+ Paqarinmi qanpas+ churiykikunapas+ noqawan kankichis. Chaymantapas Jehová Diosmi Israel soldadokunata Filistea runakunaq makinman entreganqa”,+ nispa.
20 “Samuelpa” chay nisqanta uyarispa jinan Saulqa sinchita mancharikurqan, jinan pampaman wijch’ukurqan. Payqa manan chay p’unchaypas ni chay tutapas mijusqachu, chaymi kallpanpas manaña kapurqanchu.
21 Saulpa kasqanman qayllaykuspataq chay warmiqa repararqan Saulqa manapuni allinchu kashasqanta, jinan nirqan: “Wiraqocháy, kamachiwasqaykitaqa kasukurqaykin, kausayniyta peligroman churasparaqmi+ imachus niwasqaykitapas ruwarqani.
22 Kunanqa wiraqocháy, noqatañataq uyariykuway. Juj chhikan t’antata chaskiykuway, chhaynapi kallpachakuspa ripunaykipaq”, nispa.
23 Saulmi ichaqa mana munarqanchu, chaymi nirqan: “Manan imatapas mijusaqchu”, nispa. Chay warmin ichaqa Saulpa kamachinkunapiwan kuti-kutirispa nirqanku: “Jinatayá mijuy”, nispa. Jinan Saulqa kasukurqan, pampamanta jatarispataq puñuna patapi tiyaykurqan.
24 Chay warmitaq uywakusqan wira malta torota ñak’arqan,* jinallataq jak’umanta mana levadurayoq t’antatapas ruwarqan.
25 Chaymantataq wayk’usqan mijunata Saulman kamachinkunamanwan qaraykurqan, jinan paykunaqa mijurqanku, mijuyta tukuspataq chay tuta ripurqanku.+
Uraypi willakuykuna
^ Qhaway Explicasqa simikuna nisqapi “Urim, Tumim” nisqata.
^ Chaypiqa “Samuelman rijch’akuqta” nillanmantaqmi.
^ Chaypiqa “sacrificarqan” nillanmantaqmi.
